Askim

Bilong wanem Devit, em gutpela wokman bilong Jehova, i larim meri bilong em Mikal i holim wanpela imis, o god giaman, olsem 1 Samuel 19:​12, 13 i makim?

Pastaim yumi ken skelim ol tok i stap klostu long ol dispela ves. Taim meri bilong Devit i harim olsem King Sol i laik kilim i dai Devit, wantu em i kirap mekim sampela samting. Baibel i tok: “Mikal i kisim wanpela baklain na hangamapim long wanpela windo long haus na Devit i holim baklain na i go daun long graun na ranawe i go. Devit i go pinis, orait Mikal i kisim wanpela giaman god ol i bin wokim long diwai [ating longpela bilong en na mak bilong en i olsem wanpela man] na slipim dispela god long bet bilong Devit. Na em i kisim wanpela liklik pilo ol i bin wokim long gras bilong meme, na putim aninit long het bilong giaman god. Na bihain em i karamapim giaman god long wanpela longpela klos.” Orait taim ol wokman bilong Sol i kam bilong holim Devit, Mikal i tokim ol: “Devit i gat sik.” Ol wokman i lusim haptaim long dispela, na insait long dispela taim Devit inap ranawe.​—⁠1 Samuel 19:​11-16.

Ol samting ol man i bin painim insait long graun i makim olsem long taim bipo bipo ol man i gat dispela kain imis bilong mekim narapela wok long en na i no bilong lotu tasol. Long lo bilong gavman em i makim olsem man i bin baim graun samting na em i papa tru bilong en, olsem yumi save kisim pepa bilong makim olsem yumi bin baim graun o haus samting na em i bilong yumi stret. Na sampela taim, sapos man marit i holim kain imis olsem, orait taim papa bilong meri i dai man inap singaut long kisim graun na haus samting bilong em, na dispela i stret long lo bilong gavman. Ating dispela i as na bipo Resel i bin kisim ol dispela kain imis bilong papa bilong en na papa i sotwin stret long kisim bek. Tasol Jekop, man bilong Resel, em i no save long samting meri bilong em i bin mekim.​—⁠Stat 31:​14-34.

Taim ol Israel i kamap olsem lain bilong wanpela kantri stret, ol i kisim Tenpela Lo, na namba tu lo i tambuim ol long wokim ol imis bilong lotu. (Kisim Bek 20:​4, 5) Bihain ating profet Samuel i tingim dispela lo taim em i tokim King Sol: “Pasin bilong sakim tok bilong God i wankain olsem pasin sanguma, na pasin bilong bikhet long God i olsem pasin bilong bihainim ol giaman god [olsem mekim wok long dispela kain imis].” (1 Samuel 15:23) Long dispela as, ating long Israel ol i no bin holim ol dispela kain imis bilong makim olsem ol inap kisim graun bilong papa o tambu taim em i dai. Tasol i luk olsem sampela famili Israel i bin holim yet tingting bilong ol tumbuna Juda bilong bipo. (Hetman 17:​5, 6; 2 King 23:24) Pasin bilong Mikal long holim wanpela imis olsem, em i makim olsem em i no givim bel olgeta long Jehova. Ating Devit i no bin save long dispela imis bilong Mikal, o em i larim Mikal i holim, long wanem, em i pikinini bilong King Sol.

Devit i kamapim tingting bilong em long pasin bilong givim bel olgeta long Jehova na em i tok: “Bikpela em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela. Olgeta god bilong ol arapela lain manmeri, ol i giaman god tasol. Tasol Bikpela i bin wokim skai.”​—⁠1 Stori 16:​25, 26.

[Piksa long pes 29]

Namba tu bilong Tenpela Lo i tambuim pasin bilong wokim ol kain imis, olsem yumi lukim long dispela piksa

[Kredit Lain]

From the book The Holy Land, Vol. II, 1859