Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol askim i stap daunbilo:

• Komplutensian Poliglot em i wanem samting? Bilong wanem em i bikpela samting?

Em wanpela Baibel ol i raitim long planti tok ples. Long wanpela blok ol raitim long tok Hibru, long narapela blok klostu ol raitim long tok Grik, na tok Latin, na sampela hap long tok Aram. Dispela Baibel em i wanpela bikpela samting bilong helpim ol man long tanim gut Baibel long ol tok ples bilong pastaim.​​—⁠4/15, pes 28-​31.

• Olsem wanem ol man inap mekim God i belgut tru?

Jehova em wanpela man i stap tru, na em inap long tingting, mekim wok, na pilim samting. Em i God bilong “amamas,” na em i kisim amamas long kamapim ol laik bilong em. (1 Timoti 1:11; Song 104:31) Sapos yumi lain na kisim save long filings bilong God, yumi bai save gut long ol samting yumi ken mekim na bai God i belgut.​​—⁠5/15, pes 4-7.

• Bilong wanem Devit i larim meri bilong em, Mikal, i holim imis?

Taim King Sol i laik kilim Devit i dai, Mikal i helpim Devit long ranawe, em i slipim wanpela imis long bet, ating longpela bilong en i olsem bilong wanpela man. Ating em i gat dispela imis, long wanem, em i no givim bel olgeta long God. Devit i no save long dispela samting o em i larim Mikal i holim dispela samting, long wanem, em i pikinini meri bilong King Sol. (1 Stori 16:​25, 26)​​—⁠6/1, pes 29.

• Wanem nambawan bikpela as tru bilong lo bilong God long blut?

Tok God i mekim bihain long Bikpela Tait, long Lo Bilong Moses, na long tok i stap long Aposel 15:​28, 29, i makim blut bilong Jisas em i givim olsem ofa. Long rot bilong blut tasol God inap lusim sin bilong yumi na yumi ken stap wanbel wantaim em. (Kolosi 1:​20)​​—⁠6/15, pes 14-​19.

• Baibel i stori long hamas mirakel bilong Jisas?

Ol Gutnius i stori long 35 mirakel Jisas i bin mekim. Tasol Baibel i no kamapim namba stret bilong olgeta mirakel bilong Jisas, na dispela i makim tu ol mirakel ol man i no stori long en. (Matyu 14:14)​​—⁠7/15, pes 5.