Bikpela Wok Bilong Skulim Ol Pikinini Long Nau
LONG nait papa bilong wanpela haus kaikai i redi long pasim ol dua na go bek long haus. Orait nau tupela meri wantaim wanpela pikinini ol i kam insait na ol i laik kaikai. Skin bilong man i les tru na em i laik tokim ol olsem em i pasim pinis haus kaikai, tasol em i tingting gen na em i givim kaikai long ol. Tupela meri i toktok wantaim na kaikai i stap, na pikinini i ran i go i kam na tromoi ol bisket long plua na memeim long lek bilong em. Tasol mama i no pasim em—em i lap tasol long pikinini. Bihain, taim ol i lusim haus kaikai, tarangu papa bilong haus i mas klinim ol pipia i pulap long plua.
Dispela samting i bin kamap tru i soim yumi olsem, long planti famili papamama i no skulim gut ol pikinini bilong ol. I gat kain kain as bilong dispela. Sampela papamama i larim ol pikinini i mekim ol samting long laik bilong ol yet, long wanem, ol i ting ol pikinini i mas i stap fri long sindaun bilong ol na yumi no ken pasim ol. O ol i gat planti wok na ol i no lusim haptaim bilong i stap wantaim ol pikinini na skulim ol. Sampela papamama i ting olsem nambawan bikpela samting em pikinini i mas skul gut, olsem na ol i larim em i bihainim laik bilong em sapos em i winim ol tes long skul na em inap go long wanpela kolis i gat nem.
Tasol sampela i tok, ol papamama na ol narapela ol i mas stretim tingting bilong ol long wanem samting i bikpela samting. Ol i tok, long nau ol pikinini i wok long go insait long olgeta kain pasin raskol, na pasin bilong pait long ol skul i go bikpela moa long olgeta de. Olsem na hetmasta bilong wanpela skul long Seoul, long Ripablik Bilong Korea, em i tok nambawan samting papamama i mas tingim em wok bilong skulim ol pikinini long kisim gutpela pasin. Em i tok: “Pastaim yu mas skulim pikinini long kisim gutpela pasin, orait nau em i ken kisim save.”
Planti papamama i laik bai pikinini i go long bikpela kolis na kisim ol wok i gat nem, na ol i pasim yau long ol tok lukaut i go long ol. Sapos yu wanpela papa o mama, yu laik bai pikinini bilong yu i kamap wanem kain man o meri? Yu laik bai em i bihainim pasin i stret na mekim gut wok bilong em? Yu laik bai em i tingim ol narapela, na em i redi long senisim pasin bilong em long mekim ol samting, na em i gat pasin bilong amamas na helpim ol man? Sapos olsem, orait plis ritim stori i kamap bihain long dispela.