Nambawan Samting i Dia Tumas Bilong Givim Pikinini

TAIM aposel Jon i lapun pinis, em i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.”​—⁠3 Jon 4.

Aposel Jon i toktok long ol pikinini bilong em long spirit. Tasol planti papamama bai mekim wankain tok long ol pikinini bilong ol. Ol i bin wok strong long “stretim gut ol pikinini bilong [ol] na skulim ol long tok bilong Bikpela” taim ol i wok long mekim bikpela long ol, na nau ol i amamas long lukim ol pikinini i bikpela pinis na ol “i bihainim tok tru.” (Efesus 6:⁠4) Yes, sapos papamama i skulim ol pikinini long rot bilong kisim laip i stap oltaim, dispela em i nambawan gutpela samting ol inap givim long ol. Long wanem, pasin bilong givim bel bilong yumi long God​—⁠olsem yumi bihainim ol pasin em Jehova i laik bai ol Kristen i bihainim long laip bilong ol​—⁠dispela bai “helpim yumi long dispela laip nau yumi stap long en, na long laip yumi bai kisim bihain tu.”​—⁠1 Timoti 4:⁠8.

Jehova, em nambawan Papa tru, em i save tingim tru ol papamama i stap aninit long God na ol i save wok strong long skulim ol pikinini long ol samting bilong spirit. Taim ol pikinini i bihainim ol dispela tok, ol i kisim bikpela amamas tru long bihainim lotu i tru wantaim papamama bilong ol. Taim ol dispela pikinini i wok long go bikpela, ol i save putim gut long tingting dispela gutpela samting ol i bin mekim. Sampela i save amamas long tingim namba wan taim ol i bin mekim tok long Skul Tiokratik Bilong Autim Tok.a O ol i tingim namba wan taim ol inap ritim wanpela ves bilong Baibel taim ol i autim tok wantaim papa o mama long haus bilong ol man. Na ol i no inap lusim tingting long taim ol i bin harim papamama i ritim Baibel Stori Buk Bilong Mi o buk Harim Tok Bilong Bikpela Tisa.b Gabriel i tingim yet wanpela samting em i laikim tru. Em i tok: “Taim mi gat 4-pela krismas tasol, mama i save singsing long mi long olgeta de taim em i kukim kaikai. Mi tingim yet wanpela singsing bilong Kingdom. Bihain dispela singsing i helpim mi long pilim tru olsem wok bilong Jehova i bikpela samting.” Ating yu tu yu tingim yet dispela gutpela singsing Gabriel i toktok long en. Em singsing namba 157 long buk Mekim Singsing Long Jehova, het tok bilong en “Lotuim Jehova Taim Yu Yangpela Yet.”

Singsing i kirap olsem: “Maus bilong ol pikinini bipo/ol i bin mekim gut nem bilong Krais.” Tru tumas, bipo i gat ol pikinini i save bung wantaim Jisas, na yumi ken save em i bin amamas long gutpela pasin bilong ol, em ol i save tokaut stret na ol i no giaman. Na Jisas i bin tokim ol disaipel long bihainim pasin bilong ol pikinini, em ol i amamas long ol man i skulim ol. (Matyu 18:​3, 4) Olsem na i stret ol pikinini i insait long wok bilong lotuim Jehova. Tok bilong singsing i go moa olsem: “Nau tu ol liklik i ken wok wantaim/ol man na meri na lotuim God.”

Planti pikinini ol i save bihainim gutpela pasin tru long haus, long skul, na long ol narapela hap, na dispela pasin bilong ol i givim biknem long God na famili bilong ol. Em i gutpela samting tru long ol i gat ol “papamama ol i Kristen tru.” (Lo 6:⁠7) Ol papamama i stap aninit long God ol i save bihainim tok bilong God, em gutpela Papa i save skulim ol manmeri bilong em long wokabaut long rot ol i mas bihainim. Na ol i save kisim gutpela blesing tru! Orait taim ol yet i skulim ol yangpela insait long famili, ol i amamas tru long ol i gat ol pikinini i save “bihainim tok bilong ol” na nau “papamama bai stap amamas!” (Aisaia 48:​17, 18) Angélica, nau em i mekim wok long brens ofis bilong ol Witnes Bilong Jehova long Meksiko, em i tok: “Oltaim papamama i bin wok strong long bihainim ol stiatok bilong Baibel. Tupela i mekim na i stap bilong mi taim mi pikinini yet i gutpela, na mi stap amamas.”

Ol kain Kristen olsem ol i wanbel long tok olsem, sapos yu lukautim gut ol samting bilong spirit yu bin kisim long papamama, dispela bai helpim yu tru. Ating yu wanpela yangpela i go bikpela insait long famili i save bihainim ol lo Kristen tru. Sapos olsem, orait dispela singsing i tokim yu: “Yangpela Kristen mas stap gut oltaim.” Bihain, taim yu bikpela, yu yet bai skelim ol samting yu mas mekim, olsem na long nau yu mas “tingim Jehova na lo bilong em.”

Sapos yu gat tingting kranki olsem yu laik tru bai ol yangpela i laikim yu, olgeta skul yu bin kisim long papamama bai lus nating na bai yu nogutim tru i stap bilong yu long bihain. Sapos yu strong long ol yangpela i ken laikim yu, bai yu no was gut long pasin bilong yu. Sampela yangpela i bin kirap na poroman wantaim ol lain i luk olsem ol i gat gutpela pasin na i no save mekim nabaut, tasol ol i no save tingim ol lo Kristen, nogat. Dispela i kamap klia tru long stori bilong Tara long vidio Young People Ask​​—⁠How Can I Make Real Friends? Olsem Tara, sapos yangpela Kristen i poroman wantaim ol lain i no save tingim pasin bilong lotu tru long God, em bai kisim save olsem tok bilong dispela singsing i stret, em i tok, “Yu no ken raun wantaim porman nogut;/pasin bilong ol bai i pundaunim yu!” Yumi mas wok strong inap planti yia long kisim ol gutpela pasin, tasol kwiktaim ol inap bagarapim gutpela pasin bilong yumi.

Tru, pasin bilong i stap aninit long God i gat hatwok long en. Tasol olsem singsing i tok, sapos yu “tingting long God taim yu yangpela yet” na “givim bel long mekim wok bilong em,” dispela bai mekim na bihain ol wok samting bilong yu bai kamap gutpela. Na “taim yu bikpela bai yu belgut tru.” Bai yu pilim tru olsem taim yu stap aninit long Jehova na em i lukautim yu, i no gat wanpela samting inap pasim yu long mekim ol samting i stret long ai bilong em. Dispela em rot bilong kamap olsem man o meri i bikpela pinis na i stap aninit long God. Na tu, taim yu tingim gut ol skul Kristen yu bin kisim long papamama na mekim wok long en, dispela bai mekim “na God bai amamas oltaim long yu!” I no gat wanpela samting bilong yumi ol man i winim dispela, a?​—⁠Sindaun 27:⁠11.

Olsem na yupela ol yangpela, yupela no ken lusim tingting: Ol samting Jehova na papamama Kristen i skulim yu long en i gutpela samting moa yet. Pasin bilong ol long laikim yu tru i mas kirapim yu long mekim ol samting Jehova i laikim. Olsem Jisas Krais na yangpela man Timoti, bai yu mekim Papa bilong yu long heven na papamama bilong yu long graun i amamas. Na bihain sapos yu kamap wanpela papa o mama, ating bai yu wanbel long tok bilong Angélica, yumi stori pinis long em, em i tok: “Sapos bihain mi gat wanpela pikinini, bai mi wok strong tru long putim pasin bilong laikim tru Jehova i go daun long bel bilong em kirap long taim em i liklik yet, na bai dispela i stap olsem lait bilong soim rot long em.” Tru tumas, dispela stretpela rot i bringim man i go long laip i stap oltaim em i nambawan gutpela samting tru ol papamama inap givim long ol pikinini!

[Ol Futnot]