Laip Stori

Mi Painim Amamas Long i Stap Bilong Mi Maski Hevi i Kamap

Stori bilong Audrey Hyde

Mi tingting i go bek long 63 yia bilong mi long mekim wok bilong God fultaim​—⁠inap 59 yia mi stap long hetkota bilong ol Witnes Bilong Jehova​—⁠na mi ken tok olsem mi bin painim amamas long i stap bilong mi. Tru, bel bilong mi i bagarap stret taim mi bin lukim namba wan man bilong mi i dai isi isi long sik kensa, na namba tu man bilong mi i kisim sik Alsaima na sik i bagarapim em tru. Tasol mi laik stori long olsem wanem mi inap holimpas pasin bilong i stap amamas maski ol dispela hevi i painim mi.

TAIM mi pikinini yet mipela sindaun long wanpela fam klostu long liklik taun Haxtun long hap bilong not-is Colorado, klostu long boda bilong Nebraska. Mi namba 5 pikinini bilong Orille na Nina Mock, em ol i gat 6-pela pikinini. Mama i bin karim Russell, Wayne, Clara, na Ardis namel long 1913 na 1920, na mi kamap long yia bihain. Curtis i kamap long 1925.

Long 1913, mama i kamap wanpela Sumatin Bilong Baibel, em nem bilong ol Witnes Bilong Jehova long dispela taim bipo. Bihain mipela ol narapela bilong famili i mekim olsem.

I Stap Bilong Mipela i Gutpela

Papa i save kisim tingting long wokim ol kain kain samting. Mipela i gat lait bilong pawa long olgeta haus bilong mipela long fam, tasol klostu olgeta narapela man i no gat pawa. Na mipela i save kisim ol kaikai bilong fam, olsem ol kiau long ol kakaruk bilong mipela yet, na susu, krim, na bata samting long ol bulmakau bilong mipela yet. Mipela i gat ol hos bilong mekim wok bilong brukim graun, na mipela i planim liklik prut stroberi, poteto, wit, na kon.

Papa i ting mipela ol pikinini i mas lain long mekim wok. Taim mi no kirap yet long go long skul, mi lain long wok long gaden. Mi tingim yet taim bilong bikpela san na mi save mekim wok long baira na rausim gras i kamap insait long gaden, na san i hat moa. Mi save tingting, ‘Wanem taim bai mi pinisim dispela wok?’ Tuhat i go daun long skin bilong mi na ol binen i kaikaim mi. Sampela taim mi bel hevi, long wanem, ol narapela pikinini i no save wok strong olsem mipela. Tasol nau mi save tingting bek long dispela taim mi pikinini yet na mi amamas long papa i bin lainim mipela long mekim wok.

Mipela olgeta i gat wok bilong mipela yet. Ardis i save gut long kisim susu long bulmakau, winim mi. Olsem na mi gat wok bilong klinim ol ples bilong kaikai long haus bilong ol hos na rausim pekpek bilong ol. Tasol mipela i save kisim sampela amamas tu na mekim ol pilai. Mitupela Ardis i save pilai sofbal wantaim wanpela tim bilong ples. Sampela taim mi save tromoi bal, na sampela taim mi pilai namba 3 beis, na Ardis i pilai namba wan beis.

Mipela i stap long stretpela ples i no gat maunten samting, na long nait skai i klin tru. Ol planti tausen sta i kirapim mi long tingim Man Bilong Wokim yumi, em God Jehova. Maski mi liklik yet, mi save tingim Song 147:​4, em i tok: “Em [God] i makim pinis namba bilong ol sta, na em i save kolim nem bilong ol sta wan wan.” Long planti gutpela nait olsem, dok bilong mipela, Judge, em bai slipim het bilong en antap long lek bilong mi na stap wantaim mi. Planti taim long apinun mi save sindaun long veranda na mi lukim ol grinpela wit em win i meknaisim, na taim san i holim ol, kala bilong ol i olsem silva.

Mama i Stap Gutpela Piksa

Mama i givim bel tru long i stap gutpela meri bilong papa. Papa em i bos bilong haus na Mama i skulim mipela long daun na rispek long em. Long 1939 em tu i kamap wanpela Witnes Bilong Jehova. Mipela i save olsem papa i laikim tru mipela, maski mipela i mas wok strong na em i no save larim mipela i stap nating. Long taim bilong kol, planti taim em bai kisim ol hos na pasim long wanpela kain karis na hos bai pulim mipela long i go raun long ais. Mipela i amamas tru long lukim ais i lait!

Tasol mama yet i bin skulim mipela long laikim tru God na bilip long ol tok bilong Baibel. Mipela i kisim save olsem nem bilong God em Jehova na em i As bilong laip. (Song 36:9; 83:​18, NW ) Na mipela i lain tu olsem Jehova i bin givim ol tok long yumi bilong stiaim yumi, tasol i no bilong pasim yumi long kisim amamas​—⁠em bilong helpim yumi. (Aisaia 48:17) Mama i save tokim mipela olsem mipela i gat wanpela bikpela wok bilong mekim. Mipela i lain olsem Jisas i bin tokim ol disaipel: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:⁠14.

Long dispela taim bipo, taim mi kam bek long haus bihain long skul na mama i no stap long haus, mi save go painim em. Wanpela taim, taim mi gat 6-pela o 7-pela krismas samting, mi painim em insait long haus bilong putim ol tul na kaikai samting bilong gaden. Orait nau bikpela ren tru i kam daun. Mipela i stap long rum antap em ol i save bungim ol gras i drai, na mi askim em, nogut God i laik salim narapela Bikpela Tait i kam. Mama i tok, nogat, long wanem, God i tok promis olsem em i no ken salim gen narapela tait wara na bagarapim graun. Na mi tingim tu planti taim mi save ranawe i go hait insait long rum daunbilo, long wanem, sampela taim i gat strongpela win na ren kain olsem saiklon.

Taim mi no kamap yet, Mama i bin mekim wok bilong autim tok. Wanpela liklik lain i save bung long haus bilong mipela, em olgeta wantaim i gat tingting long i stap wantaim Krais long heven. Tru, i hatwok long Mama long go long ol haus na autim tok, tasol em i laikim tumas God na dispela i helpim em long daunim pret. Em i stap gut long God i go inap long taim em i dai long Novemba 24, 1969, taim em i gat 84 krismas. Mi tok isi long yau bilong em: “Mama, bai yu go long heven, na bai yu stap wantaim ol lain yu save pinis long ol.” Mi amamas tru long mi inap i stap wantaim Mama long dispela taim na tokim em long dispela bilip bilong mi! Em i tok isi olsem: “Yu save mekim gut tru long mi.”

Mipela i Kirap Autim Tok

Long 1939, Russell i kamap wanpela painia, em nem bilong ol Witnes Bilong Jehova i save wok fultaim long autim gutnius. Em i wok painia long Oklahoma na Nebraska i go inap 1944 na nau ol i singautim em i go long hetkota bilong ol Witnes Bilong Jehova (ol i kolim Betel) long Brooklyn, New York. Mi kirap painia long Septemba 20, 1941, na mi mekim dispela wok long ol hap bilong Colorado, Kansas, na Nebraska. Mi bin kisim gutpela amamas long ol dispela yia mi mekim wok painia, long wanem, mi inap helpim ol man long kisim save long Jehova, na tu, mi lain long wetim em i helpim mi.

Taim Russell i kirap long painia, Wayne i stap long kolis long is kos bihain long em i bin wok mani inap sotpela taim. Bihain ol i singautim em i go long Betel. Inap 11-pela yia em i bin wok long Kingdom Fam, klostu long Ithaca, New York. Long dispela hap ol i save planim kaikai bilong liklik lain i wok long fam wantaim 200 wokman long Betel long Brooklyn. Wayne i mekim wok long ol save bilong em bilong mekim wok bilong Jehova i go inap long taim em i dai long 1988.

Susa bilong mi Ardis i maritim James Kern, na ol i kamapim 5-pela pikinini. Em i dai long 1997. Narapela susa bilong mi, Clara, em i stap gut long Jehova i kam inap long nau, na taim mi kisim malolo mi save go lukim em long haus bilong em long Colorado. Laspela brata bilong mipela, Curtis, em i bin kam wok long Betel long Brooklyn long 1947. Em i save draivim trak i go i kam long Kingdom Fam na karim ol kaikai samting. Em i no bin marit, na em i dai long 1971.

Laik Bilong Mi Long Wok Long Betel

Ol bikbrata bilong mi i bin go wok long Betel, na mi tu mi gat laik long wok long dispela hap. Ol i bin stap olsem gutpela piksa na mi bilip olsem dispela i mekim na ol i singautim mi i go wok long Betel. Mama i bin stori long mi long ol samting bilong oganaisesen bilong God, na mi yet mi lukim ol tok profet bilong Baibel long taim bilong las de i wok long kamap tru, na dispela i kirapim laik bilong mi long wok long Betel. Mi beten na tok promis long Jehova olsem, sapos em i larim mi i mekim wok long Betel, bai mi no ken lusim sapos i no gat wok Kristen mi mas mekim long lukautim wanpela long famili.

Mi bin kam long Betel long Jun 20, 1945, na mi kisim wok long klinim ol rum. Long olgeta de mi gat 13 rum bilong klinim, na 26 bet bilong stretim, wantaim ol ples bilong wokabaut i go long ol rum, ol lata insait long haus, na ol windo. Mi mas wok strong tru. Long olgeta de taim mi wok i stap, mi save tokim mi yet, ‘Tru, skin bilong yu i les, tasol yu stap long Betel, em haus bilong God!’

Taim mi nupela yet long Betel, wanpela samting i kamap na mi sem tru long en. Mi bin go bikpela long hap bilong bus, olsem na mi no save long wanpela kain tok i makim liklik eleveta i save karim ol samting i go long ol narapela narapela plua, em ol i kolim weita i mauspas. Orait, wanpela taim long wok ol i ring na tokim mi, “Dispela weita i mauspas, salim em i kam daun.” Kwiktaim brata i ring i putim telefon i go daun, olsem na mi no klia long samting mi mas mekim. Orait nau mi tingim wanpela brata i save slip long plua mi wok long en na em i wanpela weita. Olsem na mi go paitim dua bilong em na mi tokim em, “Ol i laik bai yu go daun long haus kuk.”

Mi Maritim Nathan Knorr

Kirap long 1920 samting, ol lain bilong Betel i laik marit ol i mas lusim Betel na mekim wok bilong Kingdom long narapela hap. Tasol long 1952 samting, sampela em ol i winim 10-pela yia pinis long Betel, ol i ken marit na stap yet long Betel. Olsem na taim Nathan H. Knorr​—⁠long dispela taim em i lukautim wok bilong Kingdom long olgeta hap​—⁠em i gat laik long mi, mi tingting, ‘Em nau, dispela man bai stap olgeta long Betel!’

Nathan i gat planti wok bilong mekim long lukautim wok bilong ol Witnes Bilong Jehova long olgeta hap. Olsem na em i tokaut stret long mi na i kamapim planti as na mi mas tingting gut pastaim, nogut mi tok orait kwik long maritim em. Long dispela taim em i save go lukim ol brens ofis bilong ol Witnes Bilong Jehova long olgeta hap, na sampela taim em bai mekim i go inap planti wik. Olsem na em i toksave olsem planti taim mi bai stap wanpis inap planti wik.

Taim mi yangpela meri yet, mi tingting olsem mi laik marit long taim bilong kol i pinis na i go malolo long ol ailan bilong Hawaii long Pasifik. Tasol mitupela i marit long taim bilong kol, long Janueri 31, 1953, na long dispela Sarere na Sande mipela i go i stap long New Jersey. Long Mande mipela i kirap wok gen. Tasol wanpela wik bihain mitupela i go long wanpela hap na kisim malolo inap wanpela wik.

Poroman i Save Wok Strong

Nathan i gat 18 krismas taim em i kam wok long Betel long 1923. Em i bin kisim gutpela skul long ol man bilong longtaim olsem Joseph F. Rutherford, em i bin go pas long lukautim wok bilong ol Witnes, na Robert J. Martin, em i lukautim wok bilong prinim ol buk samting. Taim Brata Martin i dai long Septemba 1932, Nathan i kirap lukautim dispela wok. Long yia antap, Brata Rutherford i kisim Nathan i go wantaim em taim em i go lukim ol brens ofis bilong ol Witnes Bilong Jehova long Yurop. Long Janueri 1942, taim Brata Rutherford i dai, Nathan i kisim wok bilong lukautim wok bilong ol Witnes Bilong Jehova long olgeta hap.

Oltaim Nathan i tingting long ol nupela wok bilong redi long taim lain bilong Jehova bai i go bikpela. Sampela i ting dispela i no stret tumas, long wanem, ol i ting pinis bilong dispela taim i klostu. Wanpela brata i bin lukim ol samting Natan i laik mekim na em i askim em: “Bilong wanem yu laik mekim ol dispela wok, Brata Knorr? Ating yu no bilip, a?” Nathan i bekim tok olsem: “Mi bilip, tasol sapos pinis i no kamap hariap, bai yumi redi i stap.”

Wanpela samting Nathan i tingting strong long en, em bilong kamapim wanpela skul bilong ol misineri. Olsem na long Februeri 1, 1943, wanpela skul bilong ol misineri i kamap long bikpela fam em brata bilong mi Wayne i wok long en. Ol sumatin bai skul na stadi strong long ol tok bilong Baibel inap 5-pela mun, tasol Nathan i laik bai ol i mas i gat taim bilong malolo na kisim sampela amamas. Long ol klas i bin kamap pastaim, em i save pilai bal wantaim ol sumatin, tasol bihain em i no pilai, nogut em i kisim hap bagarap na em i no inap i go long ol kibung distrik. Olsem na em i mekim wok olsem referi. Ol sumatin i amamas tru taim em i senisim sampela lo bilong pilai bilong helpim ol sumatin bilong ol narapela kantri long winim pilai.

Mi Raun Wantaim Nathan

Bihain mi kirap raun wantaim Nathan long ol narapela kantri. Mi amamas long stori long ol gutpela ekspiriens wantaim ol lain i wok volantia long ol brens ofis na ol misineri. Mi yet mi inap lukim pasin bilong ol long laikim tumas Jehova na givim bel tru long em, na mi kisim save long ol wok ol i save mekim na sindaun bilong ol long ol kantri ol i mekim wok misineri long en. Insait long planti yia mi save kisim ol pas bilong tok tenkyu long mipela i bin go lukim ol.

Taim mi tingting i go bek long ol raun mipela i bin mekim, mi tingim planti samting i bin kamap. Taim mipela i go long Polan, mi stap wantaim tupela sista na tupela i toktok isi long tupela yet. Mi askim tupela, “Bilong wanem yutupela i toktok isi tru olsem?” Ol i tok sori na i tok, ol i lain pinis long toktok isi, long wanem, wok bilong ol Witnes Bilong Jehova long Polan i gat tambu long en na ol polis samting i save haitim ol liklik masin olsem maikrofon bilong harim ol tok ol i mekim.

Sista Adach em wanpela bilong planti ol Witnes i bin mekim wok bilong autim tok long Polan taim i gat tambu. Gras bilong em i tanim tanim na gras i kam daun liklik long pes bilong em. Wanpela taim em i apim gras i kam daun long pes na mi lukim wanpela mak i go insait tru long skin, em i kisim dispela mak long taim wanpela birua i bin paitim em long wanpela samting. Mi kirap nogut long lukim long ai bilong mi yet ol samting nogut ol i bin mekim long ol bratasista bilong yumi.

Ples mi laikim tru em Betel, na namba tu long en em Hawaii. Mi tingim yet kibung i bin kamap long Hawaii long 1957 long taun Hilo. Em i bikpela taim tru, na namba bilong ol manmeri i bin kam long dispela kibung i winim namba bilong ol Witnes bilong dispela hap. Bikman bilong taun i givim ki bilong taun long Nathan olsem mak bilong tok welkam. Planti ol i kam bilong tok gude long mipela, na ol i putim ol rop plaua olsem bilas long nek bilong mipela.

Na narapela kibung i bin kirapim tru bel bilong mi em i kamap long Nuremberg, Jemani, long 1955, na ol i wokim long hap bipo ol ami bilong Hitler i bin bung na mats long en. Hitler i bin tok tru antap olsem em bai pinisim tru lain bilong Jehova long Jemani, tasol nau ol Witnes Bilong Jehova i pulap long dispela haus stediam! Aiwara bilong mi i kam daun na mi no inap pasim. Pletfom i bikpela tru na long baksait bilong en i gat 144 traipela pos i sanap. Mi sanap long pletfom na mi inap lukim bikpela lain tru i bung, winim 107,000. Laspela lain sia i stap longwe tru long mi na mi no inap lukim gut.

Mipela inap pilim tru pasin bilong ol bratasista bilong Jemani long i stap gut long Jehova na strong ol i bin kisim long em long taim Hitler i bosim kantri na mekim nogut long ol. Dispela i strongim tingting bilong mipela olsem mipela yet i mas holimpas pasin bilong i stap gut long Jehova. Nathan i mekim laspela tok bilong kibung, na taim tok i pinis em i tromoi han na tok gutbai long ol bratasista. Wantu ol i holim hankisip na tromoi i go i kam bilong tok gutbai. Em i luk olsem wanpela naispela gaden plaua.

Na mi no inap lusim tingting tu long taim mipela i go long Potugal long Disemba 1974. Mipela i stap long namba wan miting bilong ol Witnes i kamap long Lisbon bihain long taim gavman i orait long wok bilong yumi long autim tok. Ol i bin tambuim dispela wok inap 50 yia! Long dispela taim bipo i gat 14,000 pablisa bilong Kingdom tasol i stap long Potugal, tasol winim 46,000 ol i bung long tupela miting i kamap. Aiwara bilong mi i kapsait taim ol brata i tok: “Yumi no gat wok moa long hait na mekim ol miting. Nau yumi stap fri.”

Kirap long taim mi bin raun wantaim Nathan na i kam inap long nau, mi amamas long autim tok long kain kain taim na ples​—⁠long balus, long ol haus kaikai​—⁠na long sanap long rot na autim tok. Oltaim mi save karim ol buk na nius samting na bai mi ken redi long autim tok. Wanpela taim balus i kam bihaintaim na mipela i wet i stap, na wanpela meri i askim mi long wanem kain wok mi save mekim. Em nau, mi kirap toktok wantaim em na ol narapela i stap klostu long mipela na ol i wok long harim. Wok bilong Betel na wok bilong mi long autim tok i mekim na oltaim mi gat planti wok na mi amamas tru.

Sik na Laspela Tok Bilong Strongim Mi

Long 1976, sik kensa i painim Nathan, na mi wantaim ol lain bilong Betel i helpim em long karim dispela hevi. Maski sik bilong em i wok long go bikpela, mipela i save singautim ol brata i kam long rum bilong mipela, em ol i bilong ol narapela brens ofis na ol i kam long Brooklyn bilong kisim skul. Mi tingim bek Don na Earlene Steele, Lloyd na Melba Barry, Douglas na Mary Guest, Martin na Gertrud Poetzinger, Pryce Hughes, na planti moa. Planti taim ol i bin stori long ol ekspiriens bilong ol brata long kantri bilong ol. Mi pilim tru ol ekspiriens i kamapim pasin bilong ol brata long sanap strong long taim i gat tambu long wok bilong ol.

Taim Nathan i save klostu nau em bai i dai, em i givim gutpela tok long mi bilong helpim mi long karim hevi bilong i stap wanpis. Em i tok: “Yumi bin kisim amamas long marit bilong yumi. Tasol planti ol i no bin kisim amamas olsem.” Wanpela samting i mekim na mi amamas long marit bilong mi, em pasin bilong Nathan long tingim mi. Taim mipela i raun long ol narapela hap, na mipela bungim sampela brata, em i save tokim mi: “Audrey, sapos sampela taim mi no kamapim nem bilong ol long yu, yu ken save, mi lusim tingting pinis long nem bilong ol.” Mi amamas long em i bin toksave long mi pastaim.

Nathan i tokim mi: “Taim yumi dai pinis, samting yumi wetim bai kamap tru, na bihain yumi no ken karim pen moa.” Orait nau em i tokim mi strong: “Lukluk i go long ol samting bilong bihain, long wanem, pe bilong yu i stap long dispela hap. No ken tingting oltaim long ol samting bilong bipo​—⁠tasol bai yu holim yet ol dispela tingting. Isi isi bel bilong yu bai orait gen. Yu no ken kros o bel nogut na sori long yu yet. Yu mas amamas long ol gutpela samting na ol amamas yu bin kisim. Bihain bai yu lukim olsem, taim yu tingting bek long ol samting, bai yu amamas. Pasin bilong holim ol samting long tingting em wanpela presen God i bin givim long yumi.” Na em i tok: “Mekim wok oltaim​—⁠wok long mekim ol samting bilong helpim ol narapela. Dispela bai helpim yu long kisim amamas long i stap bilong yu.” Long Jun 8, 1977, Nathan i dai.

Mi Maritim Glenn Hyde

Nathan i bin tokim mi, sapos mi laik, mi ken tingting oltaim long ol samting bilong bipo o mi ken painim nupela sindaun. Olsem na long 1978, taim mi go pinis long Wastaua Fam long Wallkill, New York, mi maritim Glenn Hyde, em i gat gutpela skin na em i gat pasin isi. Taim em i no kamap Witnes yet, em i stap long Nevi taim Amerika i mekim pait wantaim Japan.

Em i bin stap long bot bilong patrol i gat bom topido long en, na em i wok long rum bilong ensin. Pairap bilong ensin i mekim na yau bilong em i bagarap na em i no inap harim gut. Taim pait i pinis, em i kamap paiaman. Inap planti yia em i save kisim ol driman nogut long ol samting i bin painim em long taim bilong pait. Em i bin lain long tok i tru bilong Baibel long kuskus bilong em i bin autim tok long em.

Bihain, long 1968, ol i singautim Glenn i kam long Betel bilong mekim wok paiaman long Brooklyn. Orait taim Wastaua Fam i kisim paia ka bilong ol, em i go wok long dispela hap long 1975. Bihain em i kisim sik Alsaima. Mipela i marit inap 10-pela yia pinis na Glenn i dai.

Olsem wanem mi inap karim dispela hevi? Gutpela savetingting Nathan i bin givim mi long taim em i laik dai i mekim gut bel bilong mi. Oltaim mi ritim ol tok em i bin raitim long mi long pasin bilong karim hevi bilong i stap wanpis. Mi save kamapim yet ol dispela tok long ol narapela em poroman bilong ol i dai pinis, na dispela tok bilong Nathan i mekim gut bel bilong ol tu. Tru tumas, i gutpela long lukluk i go long ol samting bilong bihain, olsem em i bin tokim mi long mekim.

Gutpela Lain Bratasista

Samting i bin helpim mi long i stap amamas na belgut long i stap bilong mi, em ol gutpela pren insait long famili Betel. Wanpela em Esther Lopez, em i bin winim namba 3 klas bilong Wastaua Baibel Skul Bilong Gileat long 1944. Em i go bek long Brooklyn long Februeri 1950 bilong tanim tok bilong ol buk na nius samting bilong Baibel i go long tok Spen. Taim Nathan i raun long sampela hap, Esther i save poromanim mi. Em tu i stap long Wastaua Fam. Nau em i winim 95 krismas samting, na skin bilong em i no strong moa, na ol i save lukautim em long liklik haus sik bilong mipela.

Long famili tru bilong mi, Russell na Clara tasol i stap yet. Russell i winim pinis 90 krismas na em i wok yet long Betel long Brooklyn. Em i insait long namba wan lain ol inap i stap yet long Betel taim ol i marit. Long 1952 em i maritim Jean Larson bilong Betel. Brata bilong Jean, em Max, em i bin kam wok long Betel long 1939, na long 1942 em i kisim ples bilong Nathan long bosim wok bilong prinim ol samting. Max i holim yet bikpela wok long Betel na em i save helpim wok bilong lukautim meri bilong em Helen, em i gat bikpela sik (multiple sclerosis).

Taim mi tingim bek dispela 63 yia mi bin mekim wok bilong Jehova fultaim, mi inap tok olsem, mi amamas long i stap bilong mi insait long ol dispela yia. Betel i kamap olsem ples tru bilong mi, na mi kisim amamas yet long mekim wok hia long Betel. Mi tenkyu long papamama em ol i bin lainim mipela olsem mipela i mas wok strong, na ol i putim laik long bel bilong mipela long mekim wok bilong Jehova. Tasol samting i mekim na mi stap amamas tru, em gutpela lain brata bilong yumi na gutpela samting yumi wetim, em yumi bai stap wantaim ol brata na sista bilong yumi long Paradais bai kamap long graun, na mekim wok bilong dispela wanpela God tru, Jehova, i go inap oltaim oltaim.

[Piksa long pes 24]

Papamama bilong mi long de ol i marit, long Jun 1912

[Piksa long pes 24]

Kirap long han kais i go long han sut: Russell, Wayne, Clara, Ardis, mi, na Curtis long 1927

[Piksa long pes 25]

Mi sanap namel long Frances na Barbara McNaught, taim mi wok painia long 1944

[Piksa long pes 25]

Long Betel long 1951. Kirap long han kais i go long han sut: Mi, Esther Lopez, na tambu bilong mi, Jean

[Piksa long pes 26]

Mi wantaim Nathan na papamama bilong em

[Piksa long pes 26]

Mi wantaim Nathan long 1955

[Piksa long pes 27]

Mi wantaim Nathan long Hawaii

[Piksa long pes 29]

Mi wantaim namba tu man bilong mi, Glenn