Kingdom Bilong God i Stap Tru Long Nau

“Olsem wanem planti kantri em ol i gat narapela narapela kastam na sampela i gat planti mani na sampela nogat, ol inap i stap wanbel wantaim? Sampela i bin tok olsem sapos lain bilong narapela planet i kam pait long ol manmeri bilong graun, dispela tasol bai mekim olgeta lain man i stap wanbel.”​—⁠The Age, niuspepa bilong Australia.

SAPOS tru tru lain bilong narapela planet i kam pait, yumi no save sapos dispela bai mekim olgeta kantri i wanbel wantaim o nogat. Tasol Baibel i tok profet long wanpela pait bai kamap bihain em dispela pait bai mekim na olgeta kantri bai wanbel wantaim. Na tru tumas, dispela pait em pait ol ami bilong ples antap bai kirapim.

King Devit bilong Israel bilong bipo i tok profet long dispela samting bai kamap. Holi spirit i kirapim em long tok: “Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim bilong bosim ol manmeri bilong en. Ol i tok olsem, ‘Yumi brukim hankap bilong tupela. Yumi rausim ol baklain tupela i pasim yumi long en.’ ” (Song 2:​2, 3; Aposel 4:​25, 26) Lukim dispela tok olsem ol hetman bilong graun bai i bung wantaim na birua long Jehova, em Man Bilong Wokim heven na graun, na King em i makim, Jisas Krais. Olsem wanem dispela samting bai kamap?

Olsem ol yia Baibel i makim na ol tok profet em ol i kamap tru pinis, long yia 1914 Kingdom Bilong God i kamap long heven na Jisas Krais i stap King bilong en.a Long dispela taim ol kantri long olgeta hap i gat wanpela tingting tasol. Ol i no laik daun long wok bos bilong nupela Kingdom Bilong God, ol i insait long resis bilong kisim pawa​—⁠Bikpela Pait, o Wol Woa 1.

Jehova i ting olsem wanem long dispela pasin bilong ol hetman bilong graun? “God i sindaun long sia king bilong en long heven, na em i lap na tok bilas long ol. Em i belhat tru na i givim strongpela tok long ol. Na bikpela kros bilong en i mekim ol i pret moa yet.” Bihain, Jehova i tokim Pikinini bilong em: “Askim mi, na bai mi givim olgeta lain manmeri long yu, na bai yu bosim olgeta hap graun. Bai yu bosim ol long strongpela han bilong yu. Na bai yu brukim ol liklik liklik, olsem man i brukim sospen graun.”​—⁠Song 2:​4, 5, 8, 9.

Dispela wok bilong bagarapim ol lain i birua long em, em bai kamap long Armagedon. Laspela buk bilong Baibel, Kamapim Tok Hait, i stori long en olsem ‘pait bilong bikpela de bilong God I Gat Olgeta Strong,’ em “ol king bilong olgeta kantri bilong graun” bai i kam bung. (KTH 16:​14, 16) Ol spirit nogut bai mekim na ol kantri long olgeta hap bai wanbel long mekim wanpela samting tasol​—⁠pait long God i Gat Olgeta Strong.

Dispela taim we ol man bai bung wantaim bilong pait long wok bos bilong God i wok long kam hariap. Tasol sori tumas, dispela pasin wanbel bilong ol i no inap helpim ol. Samting ol i mekim em kirap bilong gutaim ol manmeri i bin wetim inap longtaim tru. Bilong wanem i olsem? Long dispela laspela pait, Kingdom Bilong God ‘bai i daunim na bagarapim ol arapela king [bilong graun] na kingdom bilong en bai i stap oltaim.’ (Daniel 2:44) Kingdom Bilong God em dispela gavman bai inapim laik bilong ol manmeri long kisim gutpela sindaun na bel isi, ol oganaisesen bilong ol man, nogat.

Nambawan Edministreta Bilong Kingdom

Kingdom Bilong God em dispela Kingdom planti gutpela manmeri i bin beten long en olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Kingdom Bilong God i no wanpela tingting samting i stap long bel, em i wanpela gavman tru tru i bin mekim ol gutpela wok kirap long taim em i kamap long heven long 1914. Orait nau yumi ken skelim sampela bikpela samting i soim olsem Kingdom Bilong God i stap tru na i mekim wok long nau.

Namba wan samting, Kingdom i gat strongpela na gutpela lain i bosim ol samting em King Jisas Krais i go pas long en. Long 33 C.E., God Jehova i mekim Jisas Krais i kamap Het bilong kongrigesen Kristen. (Efesus 1:​22) Kirap long dispela taim i kam inap nau, Jisas i bin mekim wok olsem het bilong kongrigesen, em i bin kamapim klia save bilong em long mekim gut wok olsem wanpela edministreta. Olsem: Taim bikpela hangre i kamap long Judia long taim bilong ol aposel, kwiktaim kongrigesen Kristen i givim helpim long ol memba bilong en. Ol i stretim wok bilong givim mani samting, na ol i makim Barnabas na Sol husat i stap long Antiok bilong i go givim helpim.​​—⁠Aposel 11:​27-​30.

Yumi ken save Jisas Krais bai mekim wankain samting long nau em taim Kingdom i mekim wok i stap. Taim ol bikpela bagarap i kamap​—⁠guria, hangre, tait wara, bikpela win ren, o volkeno i pairap​—⁠kwiktaim kongrigesen Kristen bilong ol Witnes Bilong Jehova i save helpim ol wanbilip na sampela arapela man long ol hap bagarap i kamap long en. Olsem: Taim ol bikpela guria i bagarapim El Salvado long Janueri na Februeri 2001, long olgeta hap bilong kantri ol i stretim ol wok bilong givim helpim, na ol Witnes Bilong Jehova long Kanada, Guatemala, na Amerika i givim helpim. Ol i wokim gen tripela haus bilong mekim lotu na winim 500 haus insait long sotpela haptaim.

Ol Lain i Stap Aninit Long Kingdom

Kirap long taim Kingdom Bilong God long heven i kamap long 1914, em i bin bungim na stretim ol lain i stap aninit long en, em ol manmeri bilong olgeta hap bilong graun. Dispela i truim wanpela bikpela tok profet Aisaia i bin raitim: “Wanpela taim bai i kamap bihain na dispela maunten, haus bilong Bikpela i sanap long en [lotu tru bilong em], em bai i stap antap tru . . . Na olgeta lain manmeri bai i kam bung long en.” Dispela tok profet i tok “ol lain manmeri bilong olgeta hap” bai go long dispela maunten na ol bai i bihainim ol tok na lo bilong Jehova.​—⁠Aisaia 2:​2, 3.

Dispela i bin kamapim wanpela bikpela samting long nau​—⁠wanpela lain brata bilong olgeta hap i gat moa long 6,000,000 Kristen long en long winim 230 kantri. Long ol kibung intenesenel bilong ol Witnes Bilong Jehova, ol man i save kirap nogut long lukim pasin laikim, pasin isi, na pasin wanbel i stap namel long planti lain man i bung wantaim, maski ol i bilong wanem kantri, ol lain, na tok ples. (Aposel 10:​34, 35) Ating bai yu wanbel long tok olsem sapos wanpela gavman inap bungim planti handet lain man na ol i stap bel isi na wanbel wantaim, dispela gavman i save mekim gut wok na i stap strong​—⁠na em i stap tru tru, laka?

Kingdom Bilong God na Skul

Olgeta gavman i gat ol lo em ol manmeri i mas bihainim, na olgeta man husat i laik stap aninit long dispela gavman i mas bihainim ol dispela lo. Na olsem tasol, Kingdom Bilong God i gat ol lo em ol lain husat inap i stap aninit long en i mas bihainim. Tasol bilong planti manmeri tru bilong kain kain sindaun i ken orait long bihainim wankain lo, em i wanpela bikpela wok tru. Olsem na em narapela samting i soim olsem Kingdom Bilong God i stap tru​—⁠gutpela wok bilong en long skulim ol man em dispela i save senisim tingting na bel bilong ol.

Olsem wanem Kingdom inap mekim dispela bikpela wok? Long rot bilong bihainim pasin bilong ol aposel long autim tok “long ol haus” na skulim ol wan wan man long Tok Bilong God. (Aposel 5:​42; 20:20) Dispela kain pasin bilong skulim man, em i wok gut o nogat? Long wanpela niuspepa bilong Kanada, Jacques Johnson, wanpela pris bilong lotu Katolik i stori long ol samting em i bin mekim bilong pasim wanpela meri long stadi wantaim ol Witnes Bilong Jehova. Em i tok: “Mi tingting planti na mi luksave olsem mi insait long wanpela pait mi no inap winim. Mi lukim olsem insait long sampela mun ol dispela JW meri i kamapim pasin bilong pas gut wantaim dispela yangpela mama i save stap long haus tasol. Long rot bilong helpim em, pren wantaim em, na kamapim long bel bilong ol, ol i pas gut wantaim em. I no longtaim na em i kamap wanpela memba long sios bilong ol na mi no inap mekim wanpela samting long pasim em.” Dispela meri bipo em i bilong lotu Katolik em i pilim tru pasin Kristen bilong ol Witnes Bilong Jehova na tok bilong Baibel ol i skulim em long en, na olsem tasol planti milion manmeri long olgeta hap ol i pilim tru ol dispela samting.

Dispela kain skul​—⁠skul bilong Kingdom​—⁠em Baibel i as bilong en, i kamapim klia ol lo bilong en long stretpela pasin. Em i skulim ol man long laikim na rispektim ol arapela maski ol i gat wanem kain sindaun. (Jon 13:​34, 35) Na tu, em i helpim ol manmeri long bihainim dispela tok: ‘Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God na ol pasin i gutpela na long ol pasin God i laikim tumas na long ol pasin i inap tru na i stret olgeta.’ (Rom 12:⁠2) Planti milion manmeri i lusim olpela pasin bilong ol na ol i amamas long bihainim ol lo na stiatok bilong Kingdom, na ol i painim pinis bel isi na amamas na ol i wetim gutpela samting bai kamap bihain.​—⁠Kolosi 3:​9-​11.

Wanpela bikpela helpim bilong kamapim pasin wanbel long olgeta hap bilong graun, em dispela magasin, Wastaua. Long rot bilong stretim gut wok bilong tanim tok na ol masin bilong prinim ol nius long kain kain tok ples, ol inap wokim ol bikpela stori bilong Wastaua long 135 tok ples, na winim 95 pesen bilong ol man i save ritim dispela nius ol i ken stadi long en long wankain taim long tok ples bilong ol yet.

Wanpela man bilong lotu Momon i save raitim ol stori, i raitim lista bilong ol wok ol narapela lotu i save mekim na i kamap gutpela. Em i makim Wastaua na Kirap!, em ol Witnes Bilong Jehova i wokim, olsem nambawan gutpela magasin i mekim wok autim tok. Em i tok: “I no gat wanpela man inap sutim tok olsem Wastaua na Kirap! i save kirapim ol man long ting ol samting i orait tasol​—⁠nogat, ol i kirapim ol man long luksave long ol samting i wok long kamap, em samting mi no bin lukim long ol buk na nius bilong ol narapela lotu. Wastaua na Kirap! i givim nupela strong, long wanem, tok bilong en i tru, ol i bin mekim gutpela wok painimaut bilong raitim stori, na ol i stori long ol samting i wok long kamap tru long nau.”

I gat planti samting i kamapim klia olsem Kingdom Bilong God i stap tru na i mekim wok long nau. Ol Witnes Bilong Jehova i amamas na i wok strong long toktok long “dispela gutnius bilong kingdom” wantaim ol neiba, na i singautim ol long kamap lain bilong i stap aninit long dispela Kingdom. (Matyu 24:14) Olsem wanem? Dispela samting i kirapim tingting bilong yu? Yu inap kisim ol blesing taim yu bung wantaim ol lain husat i skul long tok bilong dispela Kingdom na i wok strong long bihainim ol lo bilong en. Na gutpela samting moa, yu inap wet long i stap aninit long dispela Kingdom i bosim nupela graun God i tok promis long en em “stretpela pasin tasol bai i stap long en.”​​—⁠2 Pita 3:​13.

[Futnot]

[Piksa long pes 4, 5]

Long 1914 ol kantri i insait long pait bilong olgeta hap

[Ol Piksa long pes 6]

Wok bilong helpim ol arapela i soim pasin laikim bilong ol Kristen

[Piksa long pes 7]

Ol Witnes Bilong Jehova long olgeta hap i save kisim wankain skul