Wanpela Gavman i Mekim Wok Ol Man i No Inap Mekim
“Yupela kam lukim samting God i bin mekim! Lukim ol bikpela bikpela samting em i mekim namel long ol manmeri.”—SAM 66:5.
1, 2. (a) Ol samting yumi inap lukim long antap, olsem wanem ol dispela samting i kamapim strong bilong Man bilong wokim olgeta samting? (b) Olsem wanem na i stret yumi mas bilipim ol tok Jehova i mekim long Baibel long ol samting i mas kamap long taim bilong yumi?
JEHOVA i gat bikpela strong inap long mekim. Olsem: Ol man i pret long strong bilong bom nuklia, tasol strong bilong san i bikpela moa. Na san i wanpela tasol bilong ol 200 bilion sta i stap long dispela lain sta graun bilong yumi i stap long en. Na ol man bilong skelim ol sta ol i tok, i gat 100 bilion samting lain sta olsem, em ol i gat planti bilion bilion sta long en. Man bilong wokim olgeta dispela samting em i gat bikpela strong tru! (Aisaia 40:26) Yumi tingim bikpela strong bilong dispela Man bilong wokim olgeta samting na yumi save, strong bilong ol man i samting nating.—Aisaia 40:15.
2 Olsem na yumi no ken ting God i no inap mekim ol samting em i tok em bai mekim. Nogat. (Aisaia 46:9, 10; 55:11) Na taim Baibel i tok, liklik taim na bai Em i pinisim ol man i bikhet, orait, yumi mas bilipim dispela tok profet bilong Em. Ol man i bin bagarapim ol yet na ol animal na dispela graun, olsem na i stret Jehova i ken pinisim olgeta samting nogut ol i bin mekim.—Hos. 4:1-3; Jut 14, 15.
3. Baibel i tok wanem long ol samting liklik taim bai kamap?
3 Ol samting i kamap long graun long nau i makim olsem yumi stap long “las taim” bilong dispela pasin bilong nau, olsem 2 Timoti sapta 3 i tok profet long en. Liklik taim tasol na bai Jehova i pinisim dispela pasin olgeta na kalabusim het bilong en, em Seten. Bihain bai nupela pasin i kamap long graun na gavman bilong heven bai bosim. Jisas i lainim ol disaipel long beten askim God long dispela gavman. Em i tok ol i mas beten olsem: “Kingdom bilong yu i mas i kam. Mipela i mas bihainim. laik bilong yu long graun olsem ol i bihainim long heven.”—Matyu 6:10; Danyel 2:44; Rom. 16:20.
Lo Bilong Baim Bek Man
4. Bipo, long lain Isrel, God i mekim wanem wok long lo bilong baim bek man?
4 Ol gavman ol man i bin kamapim ol i no inap pinisim sin na sik na i dai, a? Tasol gavman bilong God bai mekim ol dispela samting ol man i no inap mekim. Sapos yumi skelim ol samting God i bin mekim long lain bilong em long bipo, em lain Isrel, dispela bai helpim yumi long save olsem wanem gavman bilong em bai mekim dispela wok. God i bin givim lo long ol Isrel long baim bek man. Sapos wanpela Isrel i kamap rabis olgeta, em i ken baim em yet i go long man bilong narapela lain bilong wok kalabus long em. Tasol wanblut tru bilong dispela Isrel i ken baim bek em sapos wanblut i gat mani inap long mekim.—Levitikas 25:47-49.
5, 6. (a) Olsem wanem long dispela lo bilong baim bek man na wok bilong baim bek ol man long kalabus bilong sin? (b) Olsem wanem? Sin i tekewe nating long olgeta manmeri?
5 Olsem tasol God i wokim rot bilong baim bek yumi ol manmeri, em yumi kalabus long sin. Pe bilong baim bek yumi i mas stret wantaim samting i lus. (Diuteronomi 19:21) Orait, Adam i lusim wanem samting? Em i lusim laip bilong em olsem wanpela man i gutpela olgeta na i no gat sin na em inap i stap oltaim. No gat wanpela man long lain bilong Adam i gat gutpela laip olsem o wanpela samting em inap baim bek dispela samting i lus. I no gat wanpela man bilong dispela graun em inap “baim bek em yet” o ‘baim bek brata bilong em.’ (Sam 49:7) Tasol Baibel i tokim yumi long wanpela man em inap mekim. Dispela man em Krais Jisas. Baibel i tok taim Jisas i no kam daun yet long graun, em i bin i stap wantaim God long heven olsem wanpela strongpela ensel. Orait, olsem wanem em i kamap man long graun? Long strong bilong Jehova. Jehova i putim laip bilong em long bel bilong Maria na Maria i karim em i kamap man long graun. Tasol God em i Papa bilong em, olsem na em i no gat sin, em dispela samting i bagarapim yumi olgeta narapela manmeri.—Matyu 1:18-21; Jon 1:1, 14; 1 Pita 2:22.
6 Jisas em i wankain olsem Adam long pastaim. Em i gutpela olgeta. Jisas tasol i gat laip i gutpela olgeta bilong baim bek dispela laip i lus. Tasol Jisas i no bihainim pasin bilong Adam. Jisas i no bikhet long God. Jisas i bihainim tok bilong God. Olsem na taim em i givim dispela laip bilong em bilong baim bek ol man, Jehova i orait long dispela ofa o pe bilong baim bek man. (Galesia 1:4) Olsem na ating yumi no ken mekim sampela wok, ating sin bai tekewe nating long yumi olgeta manmeri na taim Kingdom i bosim graun bai skin na tingting bilong yumi i kamap gutpela olgeta? Nogat, long wanem Jon 3:16 i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Yumi mas bilip long dispela ofa Jisas i mekim bilong baim bek yumi na yumi mas mekim ol wok i stret long dispela bilip bilong yumi, na long dispela rot tasol bai yumi inap i stap long Paradais na skin na tingting bilong yumi i kamap gutpela olgeta.—Revelesen 21:4.
Skul Bilong Nupela Taim
7, 8. Bihain bai kru bilong man inap mekim wanem?
7 Nau yumi no gutpela olgeta, tasol yumi inap wokim tingting na kisim bikpela save. Taim sin i tekewe long yumi long Nupela Taim bihain, bai yumi inap mekim bikpela wok moa long tingting bilong yumi na kisim bikpela save moa. Wanpela buk i stori long kru bilong man (The Brain Book). Man bilong raitim ol tok bilong dispela buk, em i tok: ‘Kru bilong yumi i winim tru ol masin komputa ol man i bin wokim. Kru inap mekim kain kain wok na i gat bikpela strong bilong kisim save.’ Na em i tok moa, olsem: ‘Yumi save mekim wok long liklik hap tingting tasol bilong yumi.’
8 Olsem na taim yumi kamap gutpela olgeta long Nupela Taim bihain, bai yumi inap kisim save long planti samting. Bai yumi inap kisim save long ol gutpela gutpela samting Jehova i bin putim long dispela graun, olsem ol animal na pis na diwai samting. Na bai yumi inap kisim save long ol sta na ol bilion bilion lain sta i stap long antap. Na bai yumi inap lain na wokim piksa na musik na wokim kain kain samting long han bilong yumi.
9. Wanem kain skul bai helpim tru ol man long Nupela Taim?
9 Na bai yumi kisim narapela kain skul tu long dispela Nupela Taim em bai helpim tru yumi olgeta. Jisas i tok: “God bai i skulim olgeta manmeri.” (Jon 6:45) Em gutpela skul tru. Olgeta manmeri i stap aninit long kingdom bilong God, ol manmeri i bin winim taim bilong pinis tu, bai ol inap kisim dispela skul. (Revelesen 7:9, 14) Na Jon 5:28, 29 i stori long sampela moa ol tu bai stap aninit long Kingdom. Long Jon 5:28, 29 Jisas i tok: “Taim i laik kamap na olgeta man i stap long matmat bai ol i harim maus bilong em, na bai ol i lusim matmat na i kam ausait.” Yes, ol bilion bilion manmeri i dai pinis bai ol i kirap bek. Ol man bilong dispela graun ol i no inap kirapim bek ol man i dai pinis. Nogat tru! Tasol God bai kirapim bek ol na bai i gat bikpela wok bilong skulim ol!
10. Long Nupela Taim ol man bai skul olsem wanem?
10 Long nau i gat kain kain pasin bilong skulim man. Tasol long Nupela Taim gavman bilong God long heven bai bosim olgeta wok bilong skulim na lainim ol manmeri long tok i tru bilong Jehova. Olsem na bai i gat wanpela pasin tasol bilong lainim ol. Wanpela samting ol manmeri i mas lain long en, em olsem: Ol i mas lain long sindaun gut wantaim ol narapela man. Ol i no ken lain long hambak na ting lain bilong ol i winim ol narapela lain. Nogat. Olgeta manmeri i stap long graun bai lain long mekim pasin sori long ol narapela man; narapela bai sori long narapela na tingim gut em. Dispela kain skul bai helpim ol man long stretim pasin bilong ol na bihainim ol gutpela pasin bilong Jehova.—Aposel 10:34, 35; Kolosi 3:9-12.
11, 12. Olsem wanem yumi inap save, long Nupela Taim dispela kain skul bai wok gut na inapim wok bilong en?
11 Tasol sampela man i ting kain skul olsem i no inap kamap na i no inap wok gut. Tasol em bai kamap na em bai wok gut. Long wanem, Jehova em i no save giaman na em i tok dispela gutpela skul bai kamap. (Taitas 1:2) Na i kamap pinis na i wok i stap! Jehova i gat oganaisesen bilong em long graun long nau na ol i kirap pinis long lainim milion milion manmeri bilong olgeta hap long Kingdom o gavman bilong God na long ol lo bilong en. Kingdom i kamap pinis long heven na i wok i stap! Kingdom i kirap mekim wok bilong en long 1914 na nau yumi stap long “las taim.”
12 Kirap long 1914 ol samting Matyu sapta 25 i stori long en em i bin kamap. Matyu sapta 25 i soim yumi Jisas i kam olsem king bilong Kingdom taim ol birua bilong God i stap yet. Na ves 32 i tok: “Olgeta lain manmeri bai ol i bung long pes bilong em. Na em bai i tilim ol na i putim long tupela lain, olsem wasman i save tilim ol sipsip i go long hap na ol meme i go long hap.” Jehova i skulim ol dispela manmeri i kain olsem sipsip. Em i skulim ol long rot bilong oganaisesen bilong em hia long graun. Ol i pilim tru ol tok ol i lain long en na ol i wok long senisim pasin bilong ol na bihainim pasin bilong God. Gutpela skul ol dispela manmeri i kisim long nau em i helpim gut ol. Olsem na yumi save, long Nupela Taim God bai kamapim, dispela gutpela skul bai helpim ol man moa yet.
Kamapim Paradais
13. Taim Kingdom i bosim graun, wanem gutpela wok bilong wokim ol haus bai kamap?
13 Na i gat narapela wok em bai kamap taim Kingdom i bosim graun, em wok bilong mekim dispela graun i kamap gutpela ples gen, olsem Paradais. Na long Paradais bai i no gat ol rabis haus nogut, a? Bai ol man i laikim gutpela haus na ol i laik bai ol i gat hap graun i gat ol diwai na plaua long en na ol i ken wokim gaden. Olgeta man i laik bai God i skulim ol, bai ol i kisim ol dispela gutpela samting. Aisaia 65:21, 22 (NW) i tok: “Bai ol i wokim ol haus na sindaun long en; bai ol i planim gaden wain na kaikai long en. Ol i no ken wokim haus na narapela man i sindaun long en; ol i no ken planim kaikai na narapela man i kisim na kaikai. ․․․ lain bilong mi bai kisim gutpela samting long wok bilong han bilong ol.”
14, 15. Olsem wanem na yumi ken bilip tru olsem bai ol wokboi bilong Jehova inap kamapim paradais long graun?
14 Jehova bai mekim bikpela wok long han bilong lain bilong em, long wanem ol bai givim bel long mekim wok bilong em long Nupela Taim. Ol Witnes Bilong Jehova long nau i save mekim bikpela wok long wokim ol Haus Kingdom long tupela de samting na ol man bilong wokim ol haus ol i save kirap nogut long dispela samting. Ol i wokim wanpela Haus Kingdom olsem long Amerika na bihain wanpela nius i tok: ‘Ol 2,000 volantia i wokim dispela haus ol i kamapim wanpela samting i winim tru haus. Gutpela sapos ol kaunsil na hetman bilong ples i tingim gut dispela wok ol Witnes i mekim long Sarere Sande. Ol i givim bel tru long mekim dispela wok na ol i laik tru long mekim, olsem na gutpela wok i kamap. Sapos ol lain bilong dispela hap inap wok gut wantaim olsem, orait, wanem wanem wok ol i laik mekim—bilong wokim gutpela samting long pipia o pasim pasin nogut o helpim ol man—bai ol inap mekim. Dispela bikpela lain i mekim wok, ol i soim yumi, sapos ol man i stap wanbel na ol i wok gut wantaim ol inap mekim bikpela wok. Dispela Haus Kingdom i mas kirapim tingting bilong kongrigesen bilong ol Witnes na oltaim ol i mas givim bel long mekim wok. Em i kirapim pinis tingting bilong mipela na mipela i laik bihainim pasin bilong ol.’
15 Ol wokboi bilong Jehova ol i redi long mekim wok na ol i lain long mekim. Long Nupela Taim God bai kamapim, bai ol i mekim moa yet ol gutpela wok. Bai ol i amamas long rausim ol samting i bagarapim graun long nau na wokim ol gutpela haus na planim ol gutpela diwai na plaua samting klostu long ol haus! Long olgeta de bai ol i amamas long ol wok ol i mekim, long wanem ol i save, dispela wok bai mekim olgeta hap bilong graun i kamap gutpela ples Paradais!
Bikpela Lain Brata i Stap Wanbel
16. Olsem wanem na ol man i stap long Nupela Taim ol i no ken pret long raskol samting na pasin bilong pait?
16 Na long dispela Nupela Taim bai ol manmeri i no ken pret long raskol na pasin nogut na pait. Sam 46:9 i tok: “[God] i save mekim i dai pait long olgeta hap graun.” “King Bilong Gutaim,” em Krais Jisas, em bai kamapim gutaim long olgeta hap bilong graun na dispela gutaim i no ken pinis. “Wok king bilong em bai go bikpela, na gutaim i no ken pinis.” (Aisaia 9:6, 7, NW) Pasin sekan tru bai stap, na bai olgeta manmeri i lain long bihainim ol lo bilong Kingdom, olsem na bai ol i pas tru wantaim olsem ol brata sista tru na bai narapela i sori long narapela. Ol i no ken bruk moa long ol narapela narapela lain.
17. Ol wokboi bilong God ol i stap bel isi na wanbel long nau o olsem wanem?
17 Tasol ating sampela man bai tok, ol dispela tok promis i gutpela, tasol kain gutpela pasin olsem i no inap kamap. Tasol em bai kamap, long wanem kain gutpela pasin olsem i kamap pinis long nau namel long ol manmeri i daun long lo bilong Kingdom. Ol i stap bel isi na wanbel. Tingim dispela samting: I gat 2,500,000 samting witnes bilong Jehova long olgeta hap. Ol i bilong kain kain skin na kain kain lain, tasol ol i truim tok bilong Aisaia sapta 2 ves 4 (NW) i tok: “Ol i mas wokim ol bainat bilong ol i kamap samting bilong wokim gaden, na ol i mas wokim ol spia bilong ol i kamap sisis bilong katim han bilong diwai. Narapela lain i no ken holim bainat bilong pait long narapela lain, na ol i no ken lain moa long pait.” Ol Witnes Bilong Jehova i no laik kilim i dai brata bilong ol o narapela man maski ol i bilong wanem wanem hap. Wanpela nius bilong Itali (Il Corriere di Trieste) i tok: ‘Ol Witnes Bilong Jehova i no ken tru kalapim dispela lo i tok, YUPELA NO KEN KILIM MANMERI I DAI. Ol i redi long i dai tu bilong holimpas dispela lo.’ Ol Witnes Bilong Jehova i bihainim ol lo bilong God, olsem na ol i stap bel isi na ol i stap wanbel tru. Ol manmeri bilong dispela graun ol i no i stap wanbel—ol i stap birua birua. Tasol bikpela lain Witnes i stap namel long ol na ol i stap wanbel. Olsem na yumi save, taim Kingdom bilong God i bosim graun bai olgeta manmeri long graun i stap wanbel tru.—Jon 13:34, 35; 1 Jon 3:10-12.
18, 19. Ol man i save bihainim ol lo bilong Jehova, wanem sampela narapela gutpela samting i save painim ol?
18 Ol man i bihainim ol gutpela lo bilong God ol i stap bel isi na wanbel, na ol i save tingim gut ol narapela man na ol samting bilong ol. Ol i save “wokabaut stret long olgeta taim.” (Hibru 13:18) Wanpela niusman bilong Kanada (Le Journal de Montreal) i tok: ‘Sapos ol Witnes Bilong Jehova tasol i stap long graun, yumi no ken lokim dua long nait.’
19 Long dispela graun pasin nogut i kamap bikpela. Tasol ol manmeri i stap gut long lo bilong gavman bilong God, ol i no gat hevi long pasin nogut insait long lain bilong ol. Ol i bihainim ol stretpela lo bilong Baibel i tambuim pasin pamuk samting, olsem na ol i no gat hevi long sik bilong pamuk na pasin bilong rausim bel. Tasol long ol narapela lain long nau pasin pamuk na pasin bilong rausim bel i kamap bikpela tru. Ol wokboi bilong Jehova i tingim gut marit na famili. Ol i no olsem ol man bilong dispela graun em ol i bihainim laik bilong wan wan na famili na marit bilong ol i bagarap. Olsem wanem na ol Witnes Bilong Jehova inap bihainim ol dispela lo? Long wanem Jehova i soim rot long ol manmeri i stap gut long em na lotu long em, na “God em inap long mekim olgeta samting.”—Matyu 19:26.
Bung Wantaim Bilong Mekim Lotu i Tru
20. Wanem nambawan bikpela wok i bin kamap long taim bilong yumi?
20 Maski ol man i save o ol i no save, tasol wok bilong bungim ‘ol sipsip’ i kam long oganaisesen bilong Jehova em i nambawan bikpela wok long nau. Dispela samting i truim tok bilong Aisaia sapta 2 ves 2 na 3 (NW), olsem: “Long taim bilong bihain tru maunten bilong haus bilong Jehova [em lotu tru bilong em] bai kamap strong na i stap antap, ․․․ na olgeta lain man i mas i go long en. Na planti lain man bai go na ol bai tok: ‘Yupela ol man yupela kam, na yumi go antap long maunten bilong Jehova, ․․․ na bai em i lainim yumi long pasin bilong em, na bai yumi wokabaut long rot bilong em.’”
21. Ol man i gat gutpela bel, gutpela sapos ol i mekim wanem?
21 Mipela i laik kirapim olgeta man i gat gutpela bel long i kam long lotu bilong Jehova na long stretpela gavman bilong em. Yu mas bung wantaim dispela lain ol i skul long lo bilong God na bai yu inap kisim blesing wantaim ol. Yu mas i stap gut long dispela Kingdom o gavman, em liklik taim bai em i mekim dispela graun i kamap gutpela ples paradais. Yu mas bilip strong long dispela Kingdom na wetim Kingdom i helpim yu; ol samting ol man bilong dispela graun i tingting long mekim em i no inap helpim yu. Sam 127 ves 1 i tok: “Sapos [Jehova] i no wokim haus, ol kamda i wok nating.” Bihainim tok bilong Sam 66 ves 5, i tok: “Yupela kam lokim samting God i bin mekim! Lukim ol bikpela bikpela samting em i mekim namel long ol manmeri.” Yes, kam long dispela God em bai kamapim gutpela gavman tru bilong bosim ol man, em dispela gavman bai mekim ol samting ol man i no inap mekim, na liklik taim bai dispela wanpela gavman tasol i bosim graun.
Bai Yu Bekim Wanem Tok?
◻ Olsem wanem yumi ken save Jehova bai mekim ol samting em i laik mekim?
◻ Lo bilong baim bek man i wok olsem wanem bilong tekewe sin bilong ol man?
◻ Long Nupela Taim wanem bikpela wok bilong skulim ol man na wokim ol haus bai kamap?
◻ I gat wanem samting long nau na yumi ken save long Nupela Taim bai olgeta manmeri i stap bel isi na wanbel na narapela bai sori long narapela?
[Piksa long pes 17]
Taim Kingdom i bosim graun, bai Jehova i “skulim olgeta manmeri” i laikim tumas tok i tru
[Piksa long pes 19]
Ol manmeri i aninit long dispela Kingdom o gavman, nau ol i stap bel isi na wanbel