Askim

Wanem insait bilong tok bilong Jisas taim em i bin tokim ol disaipel: “Mi lukim Satan i lusim heven na i pundaun olsem lait bilong klaut i pairap”?

Nau tasol Jisas i makim 70 disaipel, na em i “salim ol i go tupela tupela, na ol i go paslain long em. Em i salim ol i go long olgeta taun na ples em yet i laik i go long en.” Taim dispela 70 disaipel i kam bek pinis, ol i amamas tru long wok autim tok ol i bin mekim, na ol i tok: “Bikpela, mipela i bin kolim nem bilong yu, na ol spirit nogut tu ol i bihainim tok bilong mipela.” Orait nau Jisas i tok: “Mi lukim Satan i lusim heven na i pundaun olsem lait bilong klaut i pairap.”​—⁠Luk 10:​1, 17, 18.

Ating pastaim bai yumi ting Jisas i toktok long wanpela samting i bin kamap pinis. Tasol 60 yia bihain long taim Jisas i mekim dispela tok antap, lapun aposel Jon i mekim wankain tok, em i tok: “Ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”​—⁠KTH 12:⁠9.

Taim Jon i raitim dispela tok, Satan i stap yet long heven. Olsem wanem yumi save long dispela? Long wanem, Buk Kamapim Tok Hait i gat ol tok profet long en​—⁠em i no stori long ol samting i kamap pinis bipo. (KTH 1:⁠1) Olsem na long taim bilong Jon, ol i no rausim yet Satan na tromoi em i kam daun long graun. I gat ol samting i makim olsem dispela samting i bin kamap bihain liklik long taim Jisas i kamap King bilong Kingdom Bilong God long 1914.a​—⁠KTH 12:​1-10.

Orait taim Jisas i toktok long Satan i raus long heven, bilong wanem em i mekim tok olsem dispela samting i kamap pinis? Sampela saveman bilong Baibel i ting Jisas i tok olsem bilong krosim ol disaipel, long wanem, ol i hambak long gutpela wok ol i bin mekim. Ol dispela saveman i ting Jisas i laik tok: ‘Yupela i bin daunim ol spirit nogut, tasol yupela i no ken hambak long dispela. Satan tu i hambak, na dispela i mekim na em i pundaun pinis.’

Yumi no ken strong long dispela samting. Tasol yumi ken ting olsem Jisas i amamas wantaim ol disaipel na em i toktok long bihain bai Satan i raus long heven. Jisas i save moa yet long pasin birua bilong Satan. Olsem na yumi ken ting Jisas i amamas tru taim em i harim olsem ol spirit nogut i bin daun long ol disaipel bilong em, em ol man bilong graun tasol! Dispela pasin olsem ol spirit nogut i daun long ol disaipel, em i olsem piksa bilong makim samting bai kamap bihain, taim nambawan ensel Maikel i pait wantaim Satan na tromoi em i kam daun long graun.

Taim Jisas i tok em i lukim Satan i “lusim heven na i pundaun,” ating em i laik strongim tok olsem, Satan bai pundaun tru. Dispela i wankain olsem sampela tok profet moa bilong Baibel i toktok long ol samting bai kamap bihain tasol i olsem ol i kamap pinis. Yumi ken tingim tok profet i toktok long Mesaia, long Aisaia 52:13–53:12. Taim yumi ritim, i olsem sampela samting i kamap pinis na sampela samting i no kamap yet. Ating Jisas i laik kamapim strong olsem em i bilip tru long Satan bai raus long heven na dispela bai kamap stret olsem Papa Bilong Em i tingting pinis long mekim. Na tu, Jisas i save tru olsem, long taim God yet i bin makim, ol bai kalabusim Satan wantaim ol spirit nogut bilong em i go daun long hul na bihain ol bai bagarap na pinis olgeta.​—⁠Rom 16:20; Hibru 2:14; KTH 20:​1-3, 7-10.

[Futnot]