Askim
Long Taim Bilong Wan Tausen Yia Bilong Krais i Stap King, ol spirit nogut bai stap we?
Baibel i no kamapim stret bekim bilong dispela askim. Tasol yumi inap save long ol bai stap we long Taim Bilong Wan Tausen Yia Bilong Krais i Stap King.
Aposel Jon i lukim driman long wanem samting bai kamap long kirap bilong Wan Tausen Yia na long pinis bilong en, em i tok: “Mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.” (KTH 20:1-3) Ol dispela ves i tok tasol long Satan bai stap long bikpela hul i no gat as na bihain ol bai lusim em i kam ausait inap liklik taim. Tasol maski ol dispela ves i no stori long ol spirit nogut, i stret long ting olsem taim ensel i holim ki bilong hul i no gat as—em King Jisas Krais—i pasim Satan na tromoi em i go daun long hul, em bai mekim wankain samting long ol spirit nogut.—KTH 9:11.
Taim Jisas Krais i kamap King long heven long 1914, em i kirap mekim wok na dispela i mekim sampela samting long Satan, na ol spirit nogut tu. Kamapim Tok Hait 12:7-9 i tok: “Bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en [ol spirit nogut] ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” Kirap long dispela taim, Satan na ol spirit nogut bilong em ol i stap tasol long graun. Yumi inap ting olsem taim Jisas Krais i pasim ol wok bilong Satan bambai graun i ken stap fri long ol pasin nogut bilong Satan, Em bai mekim wankain samting long ol spirit nogut tu.
Tingim tu namba wan tok profet bilong Baibel. Em i tok: “Bai mi [God] mekim yu [Satan] i stap birua bilong meri [oganaisesen bilong God long heven], na meri i stap birua bilong yu. Na bai mi mekim ol lain bilong yu [Satan] i birua long lain [Jisas Krais] bilong meri. Bai ol i krungutim het bilong yu, na bai yu kaikaim lek bilong ol.” (Stat 3:15) Wok bilong krungutim het bilong snek i insait long wok bilong pasim Satan insait long hul i no gat as long Taim Bilong Wan Tausen Yia Bilong Krais i Stap King. Tok profet i tok moa olsem, bai i gat pasin birua namel long Man i krungutim het na lain bilong Satan. Dispela lain, o oganaisesen, i gat wanpela hap bilong en em yumi no inap lukim, em ol ensel nogut, olsem ol spirit nogut. Olsem na i stret long ting olsem taim Jisas i pasim Satan long hul i no gat as, em bai pasim ol spirit nogut tu long dispela hul. Ol spirit nogut i bin kamapim olsem ol i pret nogut tru long hul i no gat as na dispela i makim olsem ol i save long dispela samting em bai painim ol bihain.—Luk 8:31.
Tasol olsem wanem? Yumi ken ting Kamapim Tok Hait 20:1-3 i no kolim ol spirit nogut, long wanem, ol i bin bagarap long Armagedon wantaim lain bilong Satan hia long graun? Baibel i kamapim olsem dispela tingting i no stret. Em i tok long samting bai painim Satan, olsem: “Satan i bin giamanim ol, olsem na God bai i tromoi em i go daun long bikpela hul i gat hatpela paia bilong ol ston salfa. Wel animal wantaim giaman profet tupela i stap pinis long dispela hul, na tripela bai i karim pen long san na long nait inap oltaim oltaim.” (KTH 20:10) Wel animal na profet giaman i makim ol gavman politik na ol i hap bilong oganaisesen bilong Satan long graun. (KTH 13:1, 2, 11-14; 16:13, 14) Ol bai bagarap long Armagedon taim Kingdom Bilong God i daunim na pinisim olgeta gavman bilong dispela graun. (Daniel 2:44) Baibel i tok, Satan bai go long “dispela paia ol i redim pinis bilong Satan wantaim ol ensel bilong en.” (Matyu 25:41) Jisas bai tromoi Satan na ol ensel bilong em i go long wankain “hul i gat hatpela paia bilong ol ston salfa,” em wel animal na ol giaman profet i go long en, na ol tu bai bagarap na pinis olgeta. Sapos ol dispela pikinini spirit bilong Satan i bin bagarap long Armagedon, orait ating Baibel bai tok olsem ol spirit nogut i stap pinis long hul i gat hatpela paia wantaim wel animal na giaman profet. Kamapim Tok Hait 20:10 i no mekim wanpela tok long ol dispela spirit nogut na dispela i makim olsem ol i no bagarap long Armagedon.
Baibel i no kamapim stret olsem Jisas i tromoi ol spirit nogut i go daun long hul i no gat as, na em i no kolim stret olsem ol i bin lusim dispela hul i no gat as. Tasol samting bai painim ol em i wankain long samting bai painim Satan. Taim Jisas i rausim pinis ol wantaim Satan long hul na ol i wok wantaim Satan long laspela hap bilong dispela wan tausen yia—ol spirit nogut tu bai go daun long bikpela hul i gat hatpela paia na ol bai bagarap na pinis olgeta.—KTH 20:7-9.
Tasol maski Kamapim Tok Hait 20:1-3 i toktok tasol long Jisas i bin pasim Satan na tromoi em long hul i no gat as na em i no inap mekim wanpela wok, yumi ken ting olsem em bai pasim ol ensel bilong Satan tu na tromoi ol long hul i no gat as. Olsem na Satan na ol spirit nogut bilong em i no inap mekim wanpela samting bilong bagarapim wok bilong God long kamapim laik bilong em long mekim graun i kamap Paradais na helpim ol man i kamap gutpela gen long Taim Bilong Wan Tausen Yia Bilong Krais i Stap King.