Yumi “Wanmaus” na Litimapim Nem Bilong God
“Yupela i stap . . . wanmaus na litimapim nem bilong God, em God na Papa bilong Bikpela bilong yumi Jisas Krais.”—ROM 15:6, Nupela Testamen na Ol Sam.
1. Aposel Pol i bin givim wanem skul long ol wanbilip long pasin bilong stretim hevi taim laik na tingting bilong ol i no wankain?
OLGETA Kristen i no gat wankain laik na makim wankain samting ol i laik mekim. Tasol olgeta Kristen i mas wokabaut wantaim long rot i go long laip. Olsem wanem? Dispela samting inap kamap? Yes, em inap kamap sapos yumi no larim ol liklik samting yumi no wanbel long en i kamap bikpela samting. Aposel Pol i bin skulim ol wanbilip long dispela samting long taim bilong em. Em i bin kamapim dispela bikpela poin olsem wanem? Olsem wanem yumi inap bihainim dispela tok kaunsel long nau?
Pasin Wanbel Kristen Em i Bikpela Samting
2. Pol i tok wanem bilong kamapim klia yumi mas i stap wanbel?
2 Pol i save pasin wanbel Kristen em i bikpela samting, na em i givim gutpela tok kaunsel bilong helpim ol Kristen long bihainim pasin laikim na karim ol hevi ol arapela Kristen i givim ol. (Efesus 4:1-3; Kolosi 3:12-14) Tasol insait long 20 yia, taim em i bin kamapim planti nupela kongrigesen na raun lukim ol narapela kongrigesen, em i save pasin bilong i stap wanbel em i hatwok. (1 Korin 1:11-13; Galesia 2:11-14) Olsem na em i kirapim ol wanbilip i stap long Rom: “Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long . . . i stap wanbel, na wanmaus na litimapim nem bilong God, em i God na Papa bilong Bikpela bilong yumi Jisas Krais.” (Rom 15:5, 6, Nupela Testamen na Ol Sam) Long nau tu yumi mas “wanmaus” na litimapim nem bilong God Jehova, olsem lain bilong em ol i stap wanbel. Olsem wanem? Yumi save mekim olsem?
3, 4. (a) Ol Kristen long Rom i gat wanem narapela narapela sindaun na pasin ol i bin go bikpela long en? (b) Olsem wanem ol Kristen long Rom inap “wanmaus” na mekim wok bilong Jehova?
3 Planti Kristen long Rom ol i gutpela pren bilong Pol. (Rom 16:3-16) Maski pasin ol i go bikpela long en na sindaun bilong ol i narapela narapela, Pol i orait long ol na em i pilim olsem “God i givim bel bilong em” long ol. Em i tok: “Long olgeta hap graun ol man i save stori long strongpela bilip bilong yupela. Olsem na mi ting long yupela olgeta, na long nem bilong Jisas Krais mi tenkyu long God bilong mi.” Tru tumas, ol Rom i stap gutpela piksa long planti samting. (Rom 1:7, 8; 15:14) Tasol tu, sampela insait long kongrigesen i gat narapela tingting long sampela samting. Long nau sindaun na pasin ol Kristen i go bikpela long en i narapela narapela, olsem na pasin bilong skelim gut tok kaunsel Pol i bin givim long stretim ol hevi i save kamap inap helpim ol long “wanmaus” na mekim tok.
4 Long Rom i gat ol Juda na ol man bilong ol arapela lain em tupela lain wantaim ol i bilipman. (Rom 4:1; 11:13) Sampela Juda Kristen ol i no inap lusim sampela pasin ol i bin bihainim taim ol i stap aninit long Lo Bilong Moses, maski ol i mas save pinis olsem ol i no gat wok long bihainim ol dispela pasin na bai God i ken kisim bek ol. Tasol tu, i gat sampela Juda Kristen ol i bilip pinis olsem ofa bilong Krais i mekim na ol i no kalabus moa long ol lo bipo ol i bin bihainim taim ol i no kamap Kristen yet. Olsem na ol i bin senisim sampela pasin bilong ol. (Galesia 4:8-11) Tasol olsem Pol i bin tok “God i givim bel bilong em” long olgeta bilong ol. Olgeta inap “wanmaus” na litimapim nem bilong God sapos ol i holim stretpela tingting long ol arapela wan wan. Ating long nau tu yumi gat kain kain tingting long sampela samting, olsem na yumi laik skelim gut ol tok Pol i mekim long dispela bikpela stiatok.—Rom 15:4.
“Kisim Ol Arapela Kristen i Kam”
5, 6. Bilong wanem i gat kain kain tingting long sampela samting long kongrigesen Rom?
5 Long pas em i raitim long ol Rom, Pol i stori long wanpela samting em ol brata i gat kain kain tingting long en. Em i tok: “Wanpela man i strong long bilip, na em i save kaikai olgeta kain samting. Tasol bilip bilong narapela man em i no strong, olsem na em i no save kaikai mit.” Bilong wanem i olsem? Long wanem, Lo Bilong Moses i tambuim ol long kaikai pik. (Rom 14:2; Wok Pris 11:7) Tasol bihain long indai bilong Jisas Lo i pinis. (Efesus 2:15) Na tripela yia na hap bihain long indai bilong Jisas, wanpela ensel i tokim aposel Pita olsem long tingting bilong God olgeta kaikai i klin na i no gat tambu. (Aposel 11:7-12) Sampela Juda Kristen i tingim ol dispela samting na ol i ting i orait long kaikai pik—o sampela narapela kaikai Lo i bin tambuim.
6 Tasol ating sampela narapela Juda Kristen bai pilim olsem em i samting nogut tru long kisim ol dispela kaikai bipo i tambu long ol long kaikai. Ol man i gat kain tingting olsem bai pilim nogut tru taim ol i lukim ol arapela Juda Kristen i kisim ol dispela kain kaikai. Na tu, sampela Kristen bilong ol narapela lain em lotu bilong ol long bipo i no gat ol tambu long kisim sampela kaikai, ating ol bai i no inap save wanem samting i mekim na ol man i toktok planti long kaikai ol i kisim. Tru, i no gat rong sapos man i no laik kisim sampela kain kaikai, tasol em i no ken tok olsem man i mas tambu long kisim dispela kaikai na bai God i ken kisim bek em. Tasol ol dispela narapela narapela tingting inap kamapim ol hevi insait long kongrigesen. Ol Kristen long Rom i mas was gut, nogut ol dispela tingting ol i holim i pasim ol long “wanmaus” na litimapim nem bilong God.
7. Ol i gat wanem narapela narapela tingting long tingim wanpela bikpela de long olgeta wik?
7 Pol i kamapim namba tu samting: “Wanpela man i ting wanpela de em i bikpela moa na i winim ol arapela de. Na narapela man i ting olgeta de i wankain tasol.” (Rom 14:5a) Lo Bilong Moses i tok man i no ken mekim wok long de Sabat. Man i no inap raun tumas long dispela de. (Kisim Bek 20:8-10; Matyu 24:20) Taim Lo i pinis, ol dispela tambu tu i pinis. Tasol ating sampela Juda Kristen inap tingting planti long mekim sampela wok o raun longwe long dispela de, em bipo ol i ting em i de holi. Na taim ol i kamap Kristen pinis, ating ol i makim de namba seven long mekim ol samting bilong spirit tasol, maski long ai bilong God ol i no gat wok moa long bihainim lo bilong Sabat. Yu ting samting ol i mekim i gat rong? Nogat, sapos ol i no tok God i laik bai ol man i mas bihainim lo bilong Sabat. Olsem na Pol i tingim maus bilong bel bilong ol brata Kristen na em i tok: “Tasol olgeta man wan wan ol i mas save gut long wanem tingting em i stret long bel bilong ol.”—Rom 14:5b.
8. Em i gutpela sapos ol Kristen long Rom i tingim gut maus bilong bel bilong ol arapela, tasol ol i no ken mekim wanem samting?
8 Pol i mekim gutpela tok bilong strongim ol brata long ol i mas isi long ol arapela em bel bilong ol i kotim ol long sampela samting bipo ol i ting i no stret, tasol nau i no gat rong long en. Tasol Pol i tok strong olsem ol brata i no ken tokim ol wanbilip olsem ol i mas bihainim Lo Bilong Moses bilong God i ken kisim bek ol. Olsem: Klostu long 61 C.E., Pol i bin raitim Buk Hibru, wanpela strongpela pas long ol Juda Kristen i stori klia tru olsem pasin bilong bihainim Lo Bilong Moses i no inap helpim ol, long wanem, ol Kristen i gat samting i gutpela moa ol i wetim em ofa bilong Jisas i as bilong en.—Galesia 5:1-12; Taitus 1:10, 11; Hibru 10:1-17.
9, 10. Ol Kristen i no ken mekim wanem? Stori long dispela.
9 Olsem yumi skelim pinis, Pol i tok maski yumi no makim wankain samting yumi laik mekim olsem ol narapela i makim, dispela i no inap bagarapim pasin wanbel sapos dispela i no brukim sampela stiatok Kristen. Olsem na Pol i askim ol Kristen em maus bilong bel bilong ol i no strong tumas: “Yu, bilong wanem yu skelim pasin bilong brata bilong yu na tok nogut long em?” Na em i askim ol Kristen i strong (ating em ol lain em maus bilong bel i orait long ol i ken kisim kaikai bipo Lo i tambuim o mekim wok long Sabat): “Na yu, bilong wanem yu tok bilas long brata bilong yu?” (Rom 14:10) Olsem Pol i tok, ol Kristen em maus bilong bel i no strong tumas i no ken kotim ol brata bilong ol husat i gat narapela tingting. Na ol Kristen husat i strong i no ken tok bilas long ol lain em maus bilong bel bilong ol i no strong tumas long sampela samting. Olgeta i mas rispektim astingting ol arapela i gat na ol “i no ken ting save na pasin bilong [ol] i winim ol arapela.”—Rom 12:3, 18.
10 Pol i kamapim tingting i stret olsem: “Man i save kaikai olgeta samting, em i no ken tingting nogut long man i no save kaikai mit. Na man i no save kaikai mit, em i no ken ting man i save kaikai olgeta samting em i mekim sin. Nogat. God i bin kisim dispela man tu.” Na em i tok moa: “Olsem na yupela olgeta i mas amamas long kisim ol arapela Kristen i kam i stap wantaim yupela, olsem Krais tu i bin amamas . . . na long dispela pasin bai yupela i kamapim biknem bilong God.” God na Krais i orait long man i gat strong na man i no strong tumas, olsem na yumi tu i mas i gat wankain tingting na “kisim ol arapela Kristen i kam.” (Rom 14:3; 15:7) Dispela tok i stret, a?
Pasin Laikim i Save Kamapim Pasin Wanbel Long Nau
11. Wanem samting i bin kamap long taim bilong Pol tasol?
11 Long pas Pol i raitim long ol Rom, em i stori long samting i kamap long dispela taim tasol. Paslain liklik Jehova i bin pinisim wanpela kontrak na kamapim wanpela nupela kontrak. Dispela senis i givim hatwok long sampela. Long nau dispela wankain samting i no save kamap, tasol i gat sampela samting i wankain liklik i save kamap.
12, 13. Wanem sampela samting inap kamap long nau na ol Kristen i ken soim olsem ol i tingim maus bilong bel bilong ol brata bilong ol?
12 Olsem: Pastaim wanpela meri Kristen i bin stap insait long wanpela lotu i strong olsem ol meri i no ken bilas liklik. Taim em i kisim tok i tru, em i painim hat long senisim tingting bilong em olsem i no stret long werim ol gutpela klos i gat kala kala o long putim ol lipstik samting. Tingting bilong em i no brukim wanpela stiatok bilong Baibel, olsem na i no stret long arapela i laik kirapim em long sakim maus bilong bel bilong em long dispela samting. Tasol tu, em i no ken mekim tok bilong daunim ol arapela meri Kristen husat bel bilong ol i no gat tok long putim ol kain samting olsem.
13 Tingim narapela samting. Wanpela man Kristen i bin i go bikpela long hap we ol man i ting pasin bilong dring alkohol i no stret. Taim em i kisim save long tok i tru, em i save Baibel i tok wain em i wanpela presen bilong God na ol man i ken dring liklik. (Song 104:15) Em i orait long dispela tingting. Tasol pasin em i go bikpela long en i mekim na em i no laik dring liklik, tasol em i no mekim tok bilong daunim ol arapela husat i dring liklik. Olsem na em i bihainim tok bilong Pol: “Yumi mas bihainim olgeta pasin i save mekim yumi i stap wanbel, na olgeta pasin i save strongim bilip bilong ol arapela.”—Rom 14:19.
14. Wanem ol samting i save kamap na ol Kristen i ken bihainim astingting bilong ol tok kaunsel Pol i bin givim long ol Rom?
14 I gat sampela samting moa i save kamap na yumi mas bihainim astingting bilong tok kaunsel Pol i bin givim long ol Rom. Kongrigesen Kristen i gat planti manmeri insait long en, na olgeta i gat narapela narapela laik. Olsem na ol inap makim narapela narapela samting ol i laik mekim—olsem ol klos bilong werim na stail bilong gras. Baibel i kamapim sampela stiatok i klia tru na ol Kristen i gat gutpela bel ol i save bihainim. Yumi no laik werim ol klos o stailim gras i narakain olgeta o klos i no haitim gut skin o i makim olsem yumi insait long wanpela lain nogut bilong dispela graun. (1 Jon 2:15-17) Ol Kristen i save, long olgeta taim, taim ol i malolo tu, ol i stap wokman bilong King Bilong Heven na Graun. (Aisaia 43:10; Jon 17:16; 1 Timoti 2:9, 10) Tasol long planti samting i gat kain kain samting man inap makim bilong mekim na i stret long ol Kristen.a
No Ken Pundaunim Ol Arapela
15. Long wanem kain taim bai wanpela Kristen i tingim ol brata bilong em na em i no mekim samting i stret em i ken mekim?
15 Long tok kaunsel Pol i bin givim long ol Kristen long Rom, i gat wanpela bikpela stiatok moa Pol i kamapim. Sampela taim, wanpela Kristen husat i bin lainim gut maus bilong bel, em bai tok nogat long mekim wanpela samting maski i no gat rong long mekim. Bilong wanem i olsem? Long wanem, em i save sapos em i mekim, dispela inap nogutim ol arapela. Long kain taim olsem yumi mas mekim wanem? Pol i tok: “Sapos yu kaikai mit o yu dring wain o yu mekim narapela samting, na dispela i mekim brata bilong yu i pundaun, orait mobeta yu no mekim dispela pasin.” (Rom 14:14, 20, 21) Olsem na “yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol. Yumi no ken ting long helpim yumi yet tasol. Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong.” (Rom 15:1, 2) Taim samting yumi laik mekim inap bagarapim maus bilong bel bilong wanbilip, orait pasin laikim bai kirapim yumi long tingim em na bai yumi no mekim dispela samting. Kain samting olsem inap kamap long pasin bilong dring. I stret Kristen i ken dring liklik wain. Tasol sapos dispela inap pundaunim poroman bilong em, orait bai em i no strong long mekim.
16. Yumi ken mekim wanem bilong soim olsem yumi tingim ol man i stap long teritori bilong yumi?
16 Yumi inap bihainim tu dispela stiatok long ol samting yumi mekim long ol man ausait long kongrigesen Kristen. Olsem: Ating yumi sindaun long wanpela hap we lotu bilong planti man i skulim ol man long tingim wanpela de long wik i olsem de malolo. Yumi no laik pundaunim ol neiba bilong yumi na mekim samting i givim hatwok long yumi taim yumi autim tok, olsem na, bai yumi no mekim ol samting long de malolo bilong ol em inap bagarapim bel bilong ol. O narapela samting i olsem: Wanpela Kristen i gat planti mani i lusim ples na i go sindaun long hap we i no gat planti Witnes na ol man long dispela hap i no gat planti samting bilong skin. Ating Kristen hia bai tingim ol nupela neiba bilong em na bai em i no werim ol klos i gat bikpela pe o kisim planti samting bilong skin maski em i gat mani long baim ol samting.
17. Bilong wanem i stret yumi mas tingim ol arapela taim yumi makim ol samting yumi laik mekim?
17 Olsem wanem? I stret ol “man i gat strongpela bilip” i mas mekim olsem? Tingim dispela tok piksa: Yumi draivim ka long rot, na yumi lukim ol pikinini i wokabaut klostu tru long rot. Olsem wanem? Yumi draivim ka siksti i go, long wanem, lo i tok yumi inap spit i go olsem? Nogat. Yumi tingim ol pikinini na yumi draiv isi. Sampela taim yumi mas redi long mekim wankain samting, olsem isi long ol wanbilip o ol arapela man. Ating yumi mekim samting i no gat rong long en. Yumi no kalapim wanpela stiatok bilong Baibel. Tasol sapos samting yumi mekim inap nogutim o bagarapim bel bilong ol arapela, em maus bilong bel bilong ol i no strong tumas, orait pasin laikim Kristen bai kirapim yumi long tingting gut long samting yumi laik mekim. (Rom 14:13, 15) Pasin bilong i stap wanbel na helpim wok bilong Kingdom em i bikpela samting moa, winim laik bilong yumi long mekim ol samting i no gat rong long mekim.
18, 19. (a) Bilong tingim ol arapela, olsem wanem yumi bihainim pasin bilong Jisas? (b) Yumi wanbel olgeta long wanem samting? Bai yumi skelim wanem samting long stadi i kamap bihain long dispela?
18 Taim yumi bihainim dispela kain pasin, yumi bihainim nambawan gutpela piksa. Pol i tok: “Krais tu i no bin ting long helpim em yet tasol. Pasin i kamap long em olsem buk bilong God i tok, ‘Ol man i bin tok nogut long yu, na dispela tok nogut bilong ol i pundaun antap long mi tu.’ ” Jisas i redi long givim laip bilong em bilong helpim yumi. Olsem na yumi mas redi long lusim sampela samting yumi laik mekim na i no gat rong long en, sapos dispela bai helpim ol man “i no gat strongpela bilip” long litimapim nem bilong God wantaim yumi long pasin wanbel. Tru tumas, taim yumi redi long bihainim laik bilong ol Kristen em maus bilong bel bilong ol i no strong tumas o yumi orait long lusim sampela samting yumi laik mekim na i no gat rong long mekim, dispela i soim olsem yumi “holim dispela wanpela tingting” olsem Krais Jisas i bin holim.—Rom 15:1-5.
19 Tingting bilong yumi long ol samting em ol stiatok bilong Baibel i no bosim i narapela narapela, tasol long ol samting bilong lotu yumi stap wanbel olgeta. (1 Korin 1:10) Dispela pasin wanbel i stap ples klia long ol samting yumi mekim long ol man i birua long lotu i tru. Tok Bilong God i kolim ol dispela birua olsem “ol arapela man” o ol man yumi no save long ol, na i mekim tok lukaut “long maus bilong ol arapela man.” (Jon 10:5) Olsem wanem yumi inap luksave long ol kain man olsem? Yumi mas mekim wanem long ol? Bai yumi skelim ol dispela askim long stadi i kamap bihain long dispela.
[Futnot]
a Ol yangpela pikinini i bihainim laik bilong papamama bilong ol long wanem kain klos ol i pasim.
Bai Yu Bekim Olsem Wanem?
• Bilong wanem narapela narapela tingting long ol samting bilong yumi yet i no inap bagarapim pasin wanbel?
• Bilong wanem yumi ol Kristen i mas tingim tru ol arapela?
• Olsem wanem yumi long nau inap bihainim tok kaunsel Pol i bin givim long pasin bilong i stap wanbel? Wanem samting bai kirapim yumi long mekim olsem?
[Piksa long pes 9]
Tok kaunsel Pol i givim long pasin bilong i stap wanbel em i bikpela samting long kongrigesen
[Piksa long pes 10]
Ol Kristen i stap wanbel maski ol i bin go bikpela long narapela narapela hap
[Piksa long pes 12]
Dispela draiva i mas mekim wanem?