“Yupela i Mas Mekim Kain Prea Olsem”

OLSEM WANEM? Yu save long ol tok bilong Beten Bilong Bikpela? Em wanpela beten Jisas Krais i bin lainim ol disaipel long en. Taim Jisas i mekim Bikpela Tok Long Maunten, em i tok: “Yupela i mas mekim kain prea olsem.” (Matyu 6:⁠9) Jisas yet i bin kamapim dispela beten, olsem na sampela i kolim olsem Beten Bilong Bikpela.​​—⁠Tok Latin, Paternoster.

Planti milion manmeri long olgeta hap i bin lainim dispela beten na ol i save kolim planti planti taim, ating long olgeta wan wan de. Long taim bilong yumi planti i bin kolim dispela beten long ples skul na ol bikpela bung. Bilong wanem ol man i save litimapim dispela beten?

Inap 300 yia samting bihain long Krais, wanpela tisa bilong lotu, em Cyprian, i tok: “Wanem prea i tingim gut ol samting bilong spirit i winim dispela prea Krais i bin givim long yumi . . . ? Wanem prea i go long Papa na i kamapim tok i tru i winim dispela prea Pikinini, as bilong Tok i Tru, i bin givim long yumi? I no gat wanpela, a?”​​—⁠Jon 14:⁠6.

Long katekismo, Katolik Sios i tingim olsem Beten Bilong Bikpela em i “nambawan bikpela beten bilong ol Kristen.” Buk The World Book Encyclopedia i tok dispela beten i bikpela samting long olgeta lotu bilong Kristendom na i wanpela “as tok bilong lotu Kristen.”

Tasol planti man i kolim dispela beten ol i no kliagut long mining bilong en. Niuspepa Ottawa Citizen bilong Kanada i tok: “Sapos yu bin lain long lotu Kristen, ating yu inap kolim Beten Bilong Bikpela hariap na yu no malolo liklik bilong pulim win, tasol ating bai yu hatwok long kolim isi isi na kliagut long en.”

Olsem wanem? I bikpela samting long yumi mas kliagut long ol beten yumi mekim long God? I gat wanem as na Jisas i givim yumi dispela beten? Em i gat wanem mining long yu yet? Orait nau yumi ken stori long ol dispela askim.