Em i Autim Ol Bilip Bilong Em Long Ol Wanklas

YU LAIK helpim ol wanklas long kliagut long ol bilip bilong yu em Baibel i as bilong en? Magdalena, em wanpela haiskul sumatin long Polan em i gat 18 krismas, i save toktok wantaim ol wanklas long ol bilip bilong em​—⁠em wanpela Witnes Bilong Jehova. Olsem na planti taim ol i save givim em ol askim olsem ‘Wanem samting i makim olsem man i Witnes Bilong Jehova?’ na ‘Yu bilip long Jisas Krais?’ Olsem wanem em inap helpim ol wanklas? Magdalena i beten long Jehova long soim rot long em na em i mekim samting i stret wantaim beten bilong em.​​—⁠Jems 1:⁠5.

Wanpela taim, Magdalena i askim wanpela tisa husat i rispektim bilip bilong em olsem em inap soim long klas, vidio Jehovah’s Witnesses​​—⁠The Organization Behind the Name.a Tisa i tok orait. Magdalena i tokim ol wanklas: “Mi stretim rot long wanpela pren i ken kamapim wanpela 90 minit program long klas. Insait long dispela program bai mipela i soim wanpela vidio na stori long ol Witnes Bilong Jehova. Yu laik i kam?” Olgeta i tok yes. Magdalena na Wojciech, em wanpela brata i autim tok fultaim planti yia, i kirap redim ol tok bilong program.

Ol i tingting long kirapim program long 20 minit tok ol i kisim long buklet Ol Witnes Bilong Jehova​​—⁠Ol i Husat? Ol i Bilip Long Wanem Samting?* na bihain long en, i gat hap bilong ol askim na bekim. Orait bihain long dispela ol bai soim vidio long skul laibreri. Olgeta sumatin long klas bai kisim wanpela presen​​—⁠wanpela bikpela envelop i gat sampela buklet, na buk Sampela Askim Bilong Ol Yangpela​​—⁠Ol Gutpela Bekim,* na sampela liklik nius na magasin.

Long de bilong dispela program, lain i bung em 14 wanklas, dispela tisa, na 4-pela arapela sumatin i stap pinis long laibreri. Pastaim Wojciech i kirap stori olsem sampela man bilong Polan, em ol man bilong raitim buk, ol i bin yusim nem bilong God, Jehova, long ol buk bilong ol. Na tu em i kolim nem bilong sampela olpela buk Katolik i gat nem bilong God long en. Long taim em i stori long wok ol Witnes Bilong Jehova long nau i mekim, em i soim ol buklet bilong narapela narapela brens ofis na ol foto bilong sampela Haus Kibung.

Bihain long en, hap bilong askim na bekim i kirap. Magdalena na Wojciech i mekim wok long Baibel long bekim ol askim. Dispela i amamasim odiens na i soim ol olsem ol Witnes Bilong Jehova i no save autim tok bilong ol yet. Ol sumatin i givim wanem ol askim, na tupela i bekim olsem wanem?

Askim: Baibel i gat planti tok i no klia, na ol tok bokis i gat kain kain mining bilong en. Olsem wanem man inap bihainim ol tok bilong Baibel?

Bekim: Sampela i tok Baibel i olsem wanpela gita em yu ken pilaim wanem kain musik yu laikim. Tasol tingim: Sapos yu laik save long as bilong wanem man bilong raitim buk i mekim kain tok olsem, ating em gutpela yu askim em, a? Planti man bilong raitim ol buk bilong graun ol i dai pinis, tasol Man bilong kamapim ol tok bilong Baibel, God Jehova, em i stap laip. (Rom 1:​20; 1 Korin 8:​5, 6) Ol tok i stap paslain na bihain long wanpela skripsa i ken kamapim mining tru bilong dispela skripsa. Na tu Baibel i save stori long wankain tok long ol narapela narapela hap bilong Baibel, olsem na taim yu skelim ol narapela skripsa wantaim dispela skripsa em bai helpim yu. Long dispela rot yumi larim God i stiaim tingting bilong yumi, i olsem em yet i kamapim gut dispela skripsa long yumi. Taim yumi mekim olsem, yumi inap kisim save long laik bilong em na bihainim olsem Baibel i kamapim.

Askim: Ol Kristen na ol Witnes Bilong Jehova i narapela kain olsem wanem?

Bekim: Mipela i Kristen! Tasol mipela i no tok tasol olsem mipela i Kristen, ol Witnes Bilong Jehova i wok strong long bihainim bilip bilong ol long i stap bilong ol na ol samting God i skulim ol bilong helpim ol long en. (Aisaia 48:​17, 18) Ol i save ol i gat tok i tru, long wanem, Baibel i as bilong olgeta tok bilong ol.​​—⁠Matyu 7:​13, 14, 21-​23.

Askim: Bilong wanem yupela i save bungim ol man yupela i no save long ol na strong long toktok long ol? Em olsem yupela i fosim ol narapela long bihainim bilip bilong yupela, a?

Bekim: Yu ting i no stret sapos wanpela man long rot i toktok gut long yu na askim yu long kamapim tingting bilong yu long wanpela samting? (Jeremaia 5:1; Sefanaia 2:​2, 3) (Wojciech na Magdalena i mekim liklik soim​—⁠ol i mekim olsem ol i askim wanpela man long rot long God i tingim ol man i bin kisim hevi long tait wara i bin kamap long Polan i no longtaim i go pinis o nogat.) Taim mipela i harim man i kamapim tingting bilong em, mipela i soim em ol tok bilong Baibel. Sapos man i no laik toktok, orait mipela mekim gutpela tok long em na lusim em. (Matyu 10:​11-​14) Taim mipela i mekim olsem, yu ting mipela i fosim man long toktok wantaim mipela? O yu ting ol man i no ken toktok moa wantaim ol narapela?

Askim: Bilong wanem yupela no save selebretim ol holide?

Bekim: I gat wanpela de tasol em Baibel i tok yumi mas tingim​​—⁠em Memorial bilong indai bilong Jisas Krais, na mipela i save tingim dispela de. (1 Korin 11:​23-​26) Orait olsem wanem long ol holide? Yu ken painimaut ol dispela holide i bin kamap olsem wanem sapos yu lukim ol buk ensaiklopidia samting. Sapos yu mekim olsem, bai yu save long as na mipela i no mekim ol holide olsem.​​—⁠2 Korin 6:​14-​18.

Tupela i bekim planti askim moa bilong ol. Tupela i lusim bikpela haptaim long stori gut long ol, olsem na ol i makim narapela taim long lukim vidio.

Dispela i mekim wanem long ol sumatin? Larim Magdalena i tokim yumi: “Mi kirap nogut olsem sampela sumatin em ol i save tok pilai long ol arapela, ol i givim sampela bikpela askim. Maski ol i tok ol i no bilip long God, long dispela taim, ol i kamapim olsem ol i bilip God i stap!” Ol lain i kam bung i amamas long kisim ol presen​​—⁠mipela i tilim 35 buk, 63 buklet, na 34 magasin.

Gutpela samting i bin kamap long dispela skul wok! Dispela samting i helpim ol wanklas bilong Magdalena long kliagut long ol Witnes Bilong Jehova, na tu, em i kirapim planti bilong ol dispela yangpela long tingting long as bilong laip. Ating yu ken wok strong long helpim ol wanskul bilong yu long save long ol samting yu bilip long en, a?

[Futnot]

[Piksa long pes 31]

Magdalena na Wojciech i redim tok