Ol Yangpela i Laik Save . . .

Hau Bai Mi Sakim Pasin Pamuk Long Skul?

“Olgeta de, ol skul mangi i stori long pasin sem. Ol yangpela meri i go tokim ol mangi na ol i pamuk long skul yet.”​​—⁠Eileen, 16.

“Long skul bilong mi, ol gei i mekim pasin sem long ples klia na ol i ting em orait tasol long mekim.”​​—⁠Michael, 15.a

OLSEM WANEM? Ol wanklas bilong yu i stori planti long pasin sem? Na ating sampela ol i no stori tasol long ol dispela samting, nogat, ol i insait long en tu. Sapos olsem, ating yu gat wankain tingting olsem yangpela meri husat i tok skul i wankain olsem ples “we ol i ektim wanpela muvi nogut bilong pasin sem.” Tru tumas, long skul rot i op long planti yangpela long stori long pasin sem na insait tu long dispela pasin.

Long sampela kantri ol skul lain i stori long hooking up​—⁠dispela tok i makim olsem man i slip nating wantaim wanpela em i no tingting long prenim. Sampela taim ol yangpela i hook up wantaim ol narapela em ol i no save tumas long ol. Sampela taim ol i mekim pasin sem wantaim ol narapela ol i bungim long Intenet na ol i no save liklik long ol. Maski ol i save long narapela o nogat, ol i no laik bai pasin laikim i mas i stap namel long tupela. Danielle i gat 19 krismas, em i tok: “[Hooking up] i makim tasol olsem tupela i laik inapim tasol laik bilong skin.”

Olsem na hooking up em i bikpela stori long planti skul. Wanpela meri i gat 17 krismas i kamapim sampela tok long niuspepa bilong skul na em i tok: “Bihain long olgeta wiken, bikpela tok i kamap long skul em long husat i bin hook up wantaim husat, na ol bes pren bai stori long olgeta liklik liklik samting i bin kamap.”

Sapos yu wok strong long bihainim ol lo bilong Baibel, yu inap pilim olsem yu stap wanpis taim yu stap namel long ol lain em ol i toktok tasol long ol samting bilong pasin sem. Na sapos yu no insait long toktok ol i kamapim, ol inap tok bilas long yu. Yu no ken kirap nogut long dispela bikos Baibel yet i tok taim ol arapela i no kliagut long samting yu mekim, ol inap ‘tok nogut long yu.’ (1 Pita 4:​3, 4) Tasol i no gat wanpela man bai i amamas long ol narapela i tok bilas long em. Olsem na hau bai yu sakim pasin pamuk long skul na pilim gutpela long yu mekim olsem? Pastaim em i bikpela samting long kliagut long as na laik bilong slip wantaim narapela em i strong tru.

Save Gut Long Yu Yet

Planti senis i save kamap long ol yangpela, em ol senis long bodi na tingting bilong bel wantaim. Taim ol dispela senis i kamap long yu, laik bilong mekim maritpasin i save kamap strong tru sampela taim. Dispela em nomol. Olsem na sapos yu pilim olsem yu gat strongpela laik long wanpela long skul, no ken ting dispela i makim olsem yu no gutpela o yu no fit long bihainim stretpela pasin. Nogat. Yu inap stap klin sapos yu wokim disisen long stap olsem!

Tingting i stap long bel i givim hatwok long yangpela, tasol i gat narapela samting tu yu mas tingim. Yumi no gutpela olgeta, olsem na laik bilong mekim pasin nogut i stap long olgeta man. Aposel Pol i tok: “Mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” Pol i tok pasin kranki bilong em i “bagarapim tru” tingting bilong em. (Rom 7:​23, 24) Tasol Pol i winim dispela pait, na yu tu inap winim!

Kliagut Long Ol Wanklas

Olsem yumi kamapim pinis, ating ol wanklas i stori planti long pamuk o pasin sem ol yet i save mekim. Yu mas save olsem dispela inap givim hevi long yu. (1 Korin 15:33) Tasol yu no ken ting ol wanklas ol i birua bilong yu. Bilong wanem?

Ol wanklas i gat ol wankain laik olsem yu gat. Na laik bilong mekim pasin nogut i pulim ol tu, wankain olsem yu. Tasol yupela i no wankain olgeta, long wanem, ating sampela bilong ol i ‘laikim tumas ol kain kain pasin bilong amamas bilong dispela graun, na ol i no laikim God.’ O ating famili bilong ol “i no save long pasin bilong i stap pren bilong ol arapela.” (2 Timoti 3:​1-4) Ating sampela klasmeit ol i no kisim gutpela trening na save long stretpela pasin em ol gutpela papamama i save givim.​—⁠Efesus 6:⁠4.

Yu gat rot long kisim savetingting long Baibel, tasol ol klasmeit bilong yu nogat. Olsem na ating ol i no save long ol hevi em inap kamap long rot bilong bihainim nating ol laik i kamap long bel. (Rom 1:​26, 27) I kain olsem papamama i givim ka long ol na tokim ol long draiv i go long bikrot​—⁠tasol ol i no skulim ol long draiv. Ating raun bilong ol long ka i kamapim bikpela amamas pastaim, tasol bikpela hevi bai kamap bihain. Orait, yu ken mekim wanem taim ol klasmeit i kirap toktok long pasin pamuk o ol i laik kirapim yu long insait long pasin nogut bilong ol?

Sakim Ol Tok Nogut

Sapos ol wanklas i kirap toktok long ol samting bilong pasin pamuk, ating bai yu laik putim yau na insait long toktok, long wanem, yu no laik bai ol i ting yu narapela kain. Tasol tingim wanem tingting ol bai kisim long yu. Sapos yu insait long toktok bilong ol, dispela bai i stret long pasin tru bilong yu o pasin yu gat laik long kamapim?

Orait, yu mas mekim wanem taim yu stap wantaim sampela lain na ol i kirap toktok long ol pasin sem? I stret yu lusim ol tasol? Yes! Em stret. (Efesus 5:​3, 4) Baibel i tok: “Man i gat gutpela tingting, em i save olsem, hevi i laik kamap long em na em i abrusim.” (Sindaun 22:⁠3) Taim yu lusim ol, dispela i no pasin nogut​—⁠yu bihainim gutpela tingting.

Tasol no ken pilim nogut taim yu lusim ol lain i toktok long ol samting nogut. Ating ol wanskul inap stori long ol narapela samting yu les long harim na yu no sem long lusim ol, moa yet sapos ol i stori long samting yu no gat interes long en o samting yu no laik insait long en. Olsem: Sapos sampela klasmeit i kirap stori long ol bai yusim gan na hansapim man, yu ting yu bai stap na putim yau long tok bilong ol? Sapos olsem, ol arapela inap ting yu insait long samting ol i mekim. Olsem na em i savetingting long lusim ol tasol. Mekim wankain samting taim ol i kirap stori long sampela pasin i gat sem. Planti taim i gat rot we yu ken lusim ol na bai ol i no tok bilas long yu o pilim olsem yu gutpela moa long ol.

Tru, sampela taim i no gat rot long lusim sampela lain. Olsem: Ol yangpela em tisa i makim ol long sindaun klostu long yu, ating ol i kirap toktok wantaim yu long pasin sem. Sapos olsem, long gutpela pasin yu ken tokaut klia olsem ol i no ken distebim yu. Sapos dispela i no wok, orait mekim wankain samting Brenda i bin mekim. Em i tok: “Mi askim tisa long makim narapela hap mi ken sindaun long en.”

Skelim Gut Ol Samting

Ating i no longtaim na sampela wanklas bai askim yu long as na yu no insait long ol tok doti ol i kamapim. Sapos ol i askim yu long pasin yu bihainim, skelim gut olsem wanem yu bai bekim tok bilong ol. Ating sampela i mekim askim bikos ol i laik tok bilas long yu, na i no olsem ol i laik kliagut long tingting bilong yu. Tasol sapos yu luksave olsem yangpela i mekim askim em i gat gutpela bel, orait no ken sem long kamapim klia bilip bilong yu. Planti yangpela i bin yusim buk Sampela Askim Bilong Ol Yangpela​—⁠Ol Gutpela Bekim long helpim ol wanskul long kliagut long ol gutpela samting i kamap long rot bilong bihainim ol lo bilong Baibel.b

Strong Long Sakim

Bai yu mekim wanem sapos wanpela stiuden i traim long holim skin bilong yu o kis long yu? Sapos yu larim tasol wanpela long mekim olsem, ating yu strongim dispela man o meri long mekim moa yet dispela pasin. Baibel i stori long wanpela yangpela man husat i bin larim wanpela meri nogut i holim em na kis long em. Em i putim yau long tok gris bilong meri. Wanem samting i bin kamap? Baibel i tok: “Dispela man i harim tok bilong meri na wantu em i bihainim meri i go long haus, olsem bulmakau ol i bringim i go long ples bilong kilim i dai.”​—⁠Sindaun 7:​13-23.

Tasol tingim samting Josep i mekim taim wankain samting i bin painim em. Meri bilong bosman bilong em i wok oltaim long grisim em long slip wantaim em, tasol Josep i strong long sakim dispela meri. Taim em i traim long holimpasim Josep, wantu Josep i ranawe.​—⁠Stat 39:​7-12.

Olsem Josep, ating yu mas sakim strong wanpela klasmeit o sampela narapela husat i traim long holim skin bilong yu. Eileen i tok: “Sapos wanpela man i traim long holim skin bilong mi, mi save tokim em long stopim dispela samting. Sapos em i no mekim, orait mi bikmaus na tokim em olsem em i no ken holim mi.” Eileen i stori long pasin bilong ol mangi long skul bilong em na tok: “Bai ol i no rispek nating long yu, yu yet i mas mekim ol pasin i kirapim ol long rispek long yu.”

Ol wanklas tu bai rispek long yu sapos yu no putim yau long ol tok doti bilong ol. Long taim i stret long mekim, bihainim gutpela pasin na stori gut long ol stretpela lo yu save bihainim, na strong long sakim man i laik pulim yu long mekim rong. Bai yu amamas long samting yu mekim, tasol bikpela samting moa, Jehova bai amamas long yu!​—⁠Sindaun 27:⁠11.

SAMTING BILONG TINGIM

◼ Bai yu tok wanem long lusim ol lain i stori long ol samting bilong pasin sem?

◼ Bai yu tok wanem long klasmeit i laik grisim yu long mekim pasin i no stret?

[Ol Futnot]

[Piksa long pes 11]

Sapos ol i kirap stori long pasin sem, lusim ol

[Piksa long pes 12]

Strong long sakim man o meri i laik grisim yu long mekim pasin i no stret