Ol Yangpela i Laik Save . . .

Mi Ken Mekim Wanem na Mi No Tingting Long Ol Meri?

‘LONG olgeta de ol nius na televisen i pulim ol yangpela long tingim maritpasin; ol singsing bilong rok-musik i pairap long yau bilong ol na stori long dispela; planti buk i stori nating long man i laikim meri na i gutpela long tingting bilong ol yangpela, tasol i paulim tingting bilong ol.’ Wanpela meri bilong raitim buk (Lesley Jane Nonkin) em i tok olsem. Tru tumas, ol buk na nius na televisen i kirapim ol yangpela long tingting oltaim long maritpasin.

Sapos man i tingting long meri o meri i tingting long man, dispela i no nogut.a Tasol sapos long olgeta taim yu tingting nabaut na tingting nating long ol meri (o ol man) na yu no inap slip o beten o mekim homwok o kaunim Baibel o mekim ol wok long haus, em nogut. I no stret yu tingting nabaut olsem; dispela inap kirapim yu long mekim pasin i no stret.​—Jems 1:​14, 15.

Tasol yu no ken mekim olsem i no gat ol meri (o ol man). Tasol olsem Sindaun 23:12 i tok, yu mas ‘skulim gut tingting.’ Em hatwok; no gat samting bilong helpim yu long mekim wantu tasol. Tasol sapos yu wok strong, yu inap bosim gut tingting. Orait, nau yumi ken stori long sampela samting yu ken mekim bilong helpim yu.

Was Gut Long Ol Poroman

Tingim ol lain yu save poroman wantaim ol. Wanpela yangpela man i tok: “Olgeta narapela i save toktok long pamuk olsem em i pasin bilong i go kaikai long haus kaikai.” Tasol sapos long olgeta taim yu harim olkain tok olsem, dispela bai paulim tingting bilong yu, a? Tru tumas, em inap. Ol i givim askim long ol yangpela na planti tru (75 pesen) i tok, “ol i laik i stap wankain olsem ol narapela na dispela i bosim tingting bilong ol long pasin pamuk samting.”

Olsem wanem long ol poroman bilong yu? Olgeta taim ol i save toktok long ol meri tasol? Ol i toktok nabaut na mekim ol toktok i doti? Sapos olsem, na yu insait long dispela​—o yu harim tasol​—bai yu hatwok long putim tingting bilong yu i go long ol samting i klinpela. Baibel i tok: “Yupela i mas rausim olgeta kain pasin nogut, em pasin bilong kros na belhat na bel nogut, na pasin bilong . . . mekim toktok i doti.”​—Kolosi 3:8.

Yu bai hatwok long bihainim dispela tok sapos ol poroman bilong yu i no save laikim ol lo bilong Baibel; tingting bilong ol bai paulim tingting bilong yu. (Sindaun 13:20) Tingim samting i bin painim wanpela yangpela meri Kristen, em i tok: “Mi no laik tokim ol wanskul mi wanpela Witnes Bilong Jehova. Olsem na long olgeta taim ol i toktok wantaim mi long ol samting bilong maritpasin.” I no longtaim na em i kirap mekim pasin pamuk na kisim bel. Sindaun 9:6 i mekim gutpela tok olsem: “Lusim ol longlong man na kam kisim laip. Bihainim rot bilong gutpela tingting.” (Baibel Today’s English Version) Yes, poroman wantaim ol manmeri i gat wankain lo na pasin Kristen olsem yu. Ol dispela poroman inap strongim yu long spirit​—ol i no ken pundaunim yu.

Maski ol yangpela Kristen i save bihainim ol gutpela pasin, sampela taim ol inap popaia na “mekim sampela tok i no stret.” (Jems 3:2) Taim dispela samting i kamap na ol toktok i go nogut, yu ken mekim wanem? Baibel i stori long King Solomon i laikim yangpela meri i lukautim sipsip. Tasol meri i no gat laik long em. Sampela yangpela poroman i wok long kirapim bel bilong meri bai em i laikim king, tasol em i no larim ol i mekim ol dispela kain tok long em. Em i tokim ol: “Mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.” (Solomon 2:7) Olsem tasol sapos ol poroman i kirap mekim ol toktok i no stret, yu mas tokaut. I no olsem yu mas krosim ol. Tasol yu ken stiaim tok i go long narapela samting em i gutpela bilong toktok long en.

Skelim Gut Amamas

Narapela samting yu mas was gut long en em ol samting yu mekim bilong painim amamas. Ating yu laik lukim ol nupela piksa wokabaut na video o harim nupela kaset, tasol Baibel i tok: “Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” (1 Jon 2:16) Olsem mipela i tok long pastaim, i gat planti samting long ol buk na nius na televisen i wok long kirapim bel bilong ol yangpela. Planti piksa na singsing i kamapim klia na tokaut klia long olkain pasin sem.

Ol dispela samting bilong amamas inap mekim wanem long yu? Wanpela man bilong raitim buk (John Langone) i tok: “Planti ripot i tok . . . taim yumi lukim o harim samting i kirapim bel, bai yumi toktok moa long maritpasin. Na ating bai yumi kirap mekim traim samting yumi no bin tingting long traim bipo.” Tru tumas, sapos ‘tingting bilong yu i bihainim laik bilong olpela bel,’ dispela bai nogutim yu tasol. (Rom 8:5) Em bai paulim tingting bilong yu long laikim ol meri na long maritpasin, na ol tingting doti bai pulap long bel bilong yu. Baibel i tok wanem? Baibel i tok: “Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God.” (2 Korin 7:1) Olsem na yu mas klia long ol piksa na video na musik o singsing i save kirapim bel.

Wanpela man Kristen em i singel na em i kamapim gutpela tingting, em i tok: “No ken larim tingting bilong yu i pas long ol samting nogut paslain liklik long taim yu laik i go slip. Planti piksa long televisen long biknait ol i piksa nogut.” Planti buk tu i nogut. Wanpela yangpela meri Kristen, nem bilong em Sherry, em i tok: “Bipo mi save kaunim ol buk i stori nating long man i laikim meri. Mi save tingting nating long maritpasin na ol amamas bilong skin na slip nabaut wantaim ol man.” Ol dispela samting i pulap long tingting bilong em na em i kirap long kis na pilai nogut wantaim wanpela yangpela man. Sapos yu kaunim ol gutpela buk tasol, olsem nius Kirap! na Wastaua, kain hevi olsem i no inap kamap. Planti yangpela i kaunim ol gutpela buk olsem na dispela i helpim ‘tingting bilong ol long bihainim laik bilong spirit holi’; i no bihainim laik bilong olpela bel.​—Rom 8:5.

Rausim Ol Dispela Tingting Nating!

Sampela taim wantu yu kirap tingting long ol meri; dispela tingting i kamap nating. Wanpela yangpela man i gat 17 krismas, nem bilong em Scott, em i tok: “Sampela taim mi hatwok long daunim ol tingting long maritpasin.” O ating yangpela man i lukim wanpela meri i gat naispela skin (o meri i lukim man i gat naispela skin) na em i kirap tingting long em. Sapos yu lukim tasol meri i gat naispela skin, em i no nogut. Tasol Jisas i tok, nogut yu wok long lukluk long em na yu “mangal nogut long em.” (Matyu 5:28; skelim wantaim Sindaun 6:25.) Sapos yu yangpela tumas long marit na yu tingting nabaut long ol amamas bilong marit, dispela bai mekim yu i bel hevi, long wanem, yu mas wet longpela taim.​—Skelim wantaim Sindaun 13:12.

Olsem na Scott i tok: “Samting i helpim mi em olsem: mi kirap tingim narapela samting bambai mi no ken tingting moa long ol samting i kirapim bel bilong mi. Mi save tokim mi yet, mi inap daunim ol dispela tingting na i pinis long bel.” (Skelim wantaim Filipai 4:8.) Aposel Pol i tok: “Mi save paitim tru bodi bilong mi na mekim em i bihainim laik bilong mi.” (1 Korin 9:27) Taim bel bilong yu i strong long tingim ol meri, yu tu mas wok strong long bosim skin na tingting. Sapos yu hatwok, kirap mekim sampela eksasais. Sapos yumi eksasais, “dispela bai i helpim yumi liklik,” na sapos yu go wokabaut ausait o mekim liklik eksasais, ating dispela inap helpim yu long kirap gen long tingim ol gutpela samting.​—1 Timoti 4:8.

Planti yangpela i save, taim ol i “wok strong long mekim wok bilong Bikpela,” dispela i helpim ol. (1 Korin 15:58) Yangpela meri Debra i tok: “Mi kisim save olsem yu mas wok wok i go inap strong bilong yu i laik pinis.” Tru tumas, sapos yu givim bel tru long wok wantaim kongrigesen Kristen na insait long olgeta wok bilong en, dispela inap helpim yu long tingting stret.

Tasol maski yu wok strong, ating bai yu hatwok long daunim dispela kain tingting. Sapos olsem, askim sampela man i bikpela pinis long helpim yu, olsem toktok wantaim papa o mama. Yangpela man Carl i tok: “Mi bin toktok wantaim man i gat bikpela krismas na bikpela save winim mi, na dispela i helpim mi.” Na no ken lusim tingting long Man em inap helpim yu tru, em Papa bilong yu long heven. Wanpela man Kristen em i singel i tok: “Taim bel bilong mi i kirap, mi save beten strong.” Baibel i tok: “Yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.” (Hibru 4:16) God i no ken pinisim laik bilong yu long ol meri. Tasol em bai helpim yu na bai yu save, i gat planti narapela samting yu ken tingting long en.

[Ol Futnot]

[Piksa long pes 17]

Sapos ol i toktok long ol meri na ol i kirap mekim tok i no stret, strongim bel na stiaim tok i go long narapela samting