Ol Yangpela i Laik Save

Maritpasin Bai Strongim Pasin Pren Bilong Yumi o Nogat?

Heather i bin prenim Mike inap tupela mun tasol, tasol em i pilim olsem em i save long Mike inap longpela taim pinis. Oltaim ol i save salim teks mesis i go i kam, na ol i save toktok inap planti aua long fon, na ol i no save painim toktok! Tasol nau taim ol i sindaun insait long ka long wanpela nait, Mike i laik bai tupela i no toktok tasol, em i laik bai tupela i mekim sampela samting moa.

Insait long tupela mun nau, Mike na Heather i save holim han tasol na sampela taim ol i kis liklik. Heather i ting dispela em inap. Tasol em i no laik bai Mike i lusim em. Mike tasol i save mekim em i pilim olsem em i luk nais na em i spesel tru. Heather i tokim em yet olsem, ‘Mi laikim tru Mike na em i laikim mi tru . . . mi ting olsem.’

ATING yu save wanem samting bai kamap bihain. Tasol samting yu no luksave long en em olsem maritpasin bai kamapim bikpela senis tru long Mike na Heather​—⁠na i no gutpela senis. Tingim:

Sapos yu sakim lo bilong graviti, yu bai kisim bagarap. Na i wankain tu taim yu sakim lo bilong stretpela pasin, olsem: “Yupela i mas abrusim olgeta kain pasin pamuk.”a (1 Tesalonaika 4:⁠3) Wanem ol samting bai kamap sapos yu no bihainim dispela lo? Baibel i tok: “Man i mekim pasin pamuk, em i mekim nogut long bodi bilong em yet.” (1 Korin 6:18) Olsem wanem dispela tok em i tru? Orait long spes daunbilo, raitim tripela samting nogut inap painim ol singel man na meri husat i mekim maritpasin.

1. ․․․․․

2. ․․․․․

3. ․․․․․

Nau skelim ol tok yu raitim. Olsem wanem? Yu raitim ol kain tok olsem ol sik bilong pamuk, kisim bel nating, o God i no orait moa long man? Dispela em ol samting nogut tru inap painim man husat i sakim lo bilong God long pasin pamuk.

Maski i olsem, laik bilong mekim maritpasin inap kamap long yu. Yu inap ting olsem, ‘No gat wanpela samting bai painim mi.’ Olgeta lain i save mekim maritpasin. Ol wanlain bilong yu long skul i hambak na stori long ol i bin slip wantaim sampela, na i luk olsem ol i no kisim hevi long dispela. Olsem Heather long kirap bilong dispela stori, ating yu pilim olsem maritpasin bai mekim na yu na pren bilong yu bai pas gut moa wantaim. Na ating i no gat wanpela i laik bai ol narapela i tok bilas long em olsem em i no bin slip wantaim wanpela. Olsem na ating mobeta long mekim maritpasin, a?

Stop pastaim na tingting! I no olgeta i save mekim maritpasin. Tru, ating yu ritim ol ripot i kamapim olsem planti yangpela i save mekim maritpasin. Olsem, wanpela wok painimaut long Amerika i soim olsem long olgeta 3-pela 3-pela yangpela i pinisim haiskul, 2-pela i save mekim maritpasin. Tasol dispela i makim olsem 1-pela bilong olgeta 3-pela 3-pela yangpela i no mekim dispela pasin, dispela tu em i bikpela namba. Orait, wanem samting i painim ol dispela lain husat i save mekim maritpasin? Ol saveman i kisim save olsem, planti bilong ol dispela yangpela i kirap nogut long samting nogut i painim ol.

Samting Nogut Bilong En #1: BEL HEVI. Planti yangpela husat i bin mekim maritpasin taim ol i singel, ol i tok ol i bel hevi long ol i bin mekim olsem.

Samting Nogut Bilong En #2: NO GAT TRAST. Taim ol i slip wantaim pinis, tupela wantaim bai tingting, ‘Em i bin slip wantaim husat narapela?’

Samting Nogut Bilong En #3: I NO STAP GUT LONG NARAPELA. Taim ol i slip wantaim pinis, planti taim boipren bai lusim gelpren bilong em na i go painim narapela meri.

Samting Nogut Bilong En #4: TINGTING I BAGARAP. Samting meri i laikim tru, em man husat bai lukautim em, na i no man husat bai yusim tasol em.

Na i gat ol narapela samting tu, olsem: Planti mangi i bin tok olsem ol i no inap maritim gel ol i bin slip wantaim em. Bilong wanem i olsem? Long wanem, ol i laik maritim meri husat i save bihainim klinpela pasin!

Olsem wanem? Yu kirap nogut long dispela​—⁠o yu belhat? Sapos olsem, maski yu wanpela gel o boi, tingim dispela: Ol muvi na TV i soim olsem maritpasin namel long ol singel em samting bilong amamas tasol, tasol tru tru em i no olsem. Na ol i soim olsem maritpasin namel long ol tineja i gutpela samting na i olsem narapela i laikim tru narapela. Tasol no ken larim dispela i giamanim yu! Ol lain husat i laik kirapim yu long mekim maritpasin taim yu singel, ol i tingim laik bilong ol yet tasol. (1 Korin 13:​4, 5) Tingim, sapos wanpela i laikim yu tru, yu ting em bai mekim samting i bagarapim bodi na bel na tingting bilong yu? (Sindaun 5:​3, 4) Na yu ting wanpela husat i tingim yu tru bai pulim yu long mekim samting i bagarapim pasin bilong yu long pas gut wantaim God?​—⁠Hibru 13:⁠4.

Samting tru em olsem, taim yu mekim maritpasin paslain long yu marit, yu semim yu yet, long wanem, yu bagarapim gutpela samting yu holim. (Rom 1:24) Olsem na planti i pilim olsem ol i no gutpela moa, i olsem ol i larim wanpela i stilim gutpela samting ol i bin holim! No ken larim dispela i kamap long yu. Sapos wanpela i laik grisim yu long slip wantaim em na i tok, “Sapos yu laikim mi bai yu slip wantaim mi,” tokaut strong long em olsem, “Sapos yu laikim mi, yu no inap askim mi long mekim olsem!”

Bodi bilong yu em i samting i dia tumas, olsem na no ken givim nating long narapela. Soim olsem yu strong long bihainim lo bilong God long sakim pasin pamuk. Na bihain taim yu marit, orait yu ken slip wantaim poroman marit bilong yu. Na yu bai amamas long dispela pasin, na yu no inap wari, o bel hevi, o kisim tingting olsem poroman bai lusim yu, em ol samting i save painim ol singel i save slip wantaim narapela.​—⁠Sindaun 7:​22, 23; 1 Korin 7:⁠3.

Bilong lukim sampela stori moa long hap “Ol Yangpela i Laik Save” long tok Inglis, lukim Web-sait www.watchtower.org/ype

[Futnot]

SAMTING BILONG TINGIM

● Maski yu gat laik long mekim maritpasin taim yu singel yet, bilong wanem i no stret long yu mekim?

● Bai yu mekim wanem sapos wanpela i askim yu long slip wantaim em?

[Blok/​ Ol Piksa long pes 11]

TOK BILONG OL WANLAIN

“Sapos yu tok nogat, dispela tasol i no inap pasim man o meri long kam bek gen na askim yu. Em hau yu tok nogat, dispela bai stopim em. Sapos isi tasol yu tok nogat na i olsem yu gat tupela tingting, man bai luksave long dispela. Yu mas tokaut strong!”

“Sapos yu tok nogat tasol, sampela taim dispela i no wok, na maski yu eksplenim ol bilip bilong yu, sampela taim dispela tu i no wok. Mi save long sampela husat i bin hambak na tok ol i bin pulim Kristen long mekim pasin pamuk. Sampela taim yu mas lusim dispela hap na i go, i hatwok long mekim olsem, tasol dispela pasin bai wok gut.”

“Yu wanpela Kristen na yu gat ol gutpela pasin we inap kirapim ol narapela long laikim yu. Olsem na yu mas was gut na sakim tru pasin pamuk taim narapela i laik kirapim yu long mekim olsem. Rispek long ol gutpela pasin bilong yu. No ken tru lusim ol!”

[Ol Piksa]

Diana

James

Joshua

[Blok long pes 12]

STAP OLSEM TRUPELA MAN!

Sapos yu prenim wanpela meri, yu save tingim em tru? Orait soim em olsem yu gat . . .

● strong long bihainim ol lo bilong God

● savetingting na yu inap abrusim ol samting inap traim yutupela

● pasin laikim i kirapim yu long tingim em tru

Sapos yu mekim olsem, gelpren bilong yu bai pilim wankain olsem yangpela meri Sulam, em i tok: “Dispela pren em i man bilong mi na mi meri bilong em.” (Solomon 2:16) Em nau, em bai ting yu trupela man!

Lukim Sindaun 22:3; 1 Korin 6:18; 13:​4-8.

[Blok long pes 12]

SAMTING YU KEN MEKIM

Sapos yu man na yu stap wantaim wanpela meri, o yu meri na yu stap wantaim wanpela man, orait gutpela lo long bihainim em olsem: No ken mekim pasin em yu no inap mekim long ai bilong papamama.

[Piksa long pes 12]

Ol singel husat i mekim maritpasin, ol i mekim nogut long presen God i givim. I olsem ol i kisim wanpela naispela piksa na i mekim i kamap olsem samting bilong klinim lek