Wanem Samting Bai Painim Ol Man?
WANEM samting bai kamap long 10, 20, o 30 yia bihain? Nau long dispela taim bilong pasin teroris, ating yumi pret long tingting long taim bihain. Ol man i wokim ol nupela nupela masin na kompiuta samting. Pasin bilong planti kantri long wok bung wantaim i mekim na narapela i mas helpim narapela. Yu ting ol lida bilong dispela graun bai wanbel na wokim rot bilong kamapim gutpela taim long bihain? Sampela man i save tok yes, ol i ting long yia 2015, ol lida inap stopim hangre na pasin bilong stap rabis long i go bikpela, stopim sik AIDS, na daunim tru namba (50 pesen) bilong ol man i no gat gutpela wara bilong dring na gutpela toilet na rot bilong rausim ol pipia.—Lukim blok “Ol Gutpela Samting Bai Kamap o Nogat?”
Tasol planti taim tingting bilong ol man long ol samting bai kamap bihain em i wanpela driman nating tasol. Olsem: Inap 40 yia i go pinis, wanpela saveman i tok olsem long yia 1984 ol fama bai digim graun long as bilong solwara long ol trakta i wok insait long wara; narapela man i tok long 1995, ol kompiuta bai stiaim ol ka na ol ka i no inap bam; na narapela i tok long 2000, inap 50,000 manmeri bai i stap na wok long ples antap, long spes. Ating long nau ol dispela man i ting i gutpela sapos ol i no bin mekim kain tok olsem. Wanpela niusman i tok: “Taim ol yia i kam na i go, dispela i kamapim long ples klia olsem ol manmeri i gat bikpela save, ol i longlong tru.”
“Mep” Bilong Soim Rot Long Yumi
Ol man i save skelim skelim ol samting bai kamap bihain, tasol sampela taim ol i tingting long ol gutpela samting tasol na ol i no tingim ol hevi inap kamap. Orait yumi ken painim we ol tok i stori long taim bihain na yumi inap bilip tru long en?
Tingim dispela tok piksa. Piksaim long tingting olsem yu stap long bas na raun long narapela kantri. Yu no save long dispela hap yu raun long en, olsem na yu tingting planti. Yu tingting, ‘Mi stap we stret? Dispela bas i go long hap mi laik go long en? Dispela hap i longwe yet o em i klostu pinis?’ Taim yu skelim gutpela mep na yu lukluk i go ausait long windo na lukim ol sain long rot, dispela bai helpim yu long kisim bekim long ol askim bilong yu.
Dispela samting i painim planti man long nau husat i tingting planti long taim bihain. Ol i tingting, ‘Yumi go we? Yumi stap long rot i bringim yumi i go long bel isi? Sapos olsem, long wanem taim bai yumi kamap long dispela hap?’ Baibel i olsem mep inap helpim yumi long kisim bekim bilong ol dispela askim. Taim yumi ritim gut tok bilong en—na lukluk i go ausait long “windo” long ol samting i wok long kamap long dispela graun—yumi ken kisim save long hap yumi stap long en na yumi wok long i go we. Tasol pastaim yumi mas skelim olsem wanem ol hevi bilong yumi i bin kirap.
Kirap Bilong Ol Hevi
Baibel i tok taim God i wokim namba wan man na meri, ol i gutpela olgeta na em i putim ol i stap long wanpela paradais. God i wokim Adam tupela Iv bilong i stap oltaim oltaim—i no bilong stap 70 o 80 yia. God i tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” God i laik bai Adam, Iv, na ol pikinini bilong ol i skruim Paradais i go long olgeta hap bilong graun.—Stat 1:28; 2:8, 15, 22.
Adam na Iv i bikhet long God. Olsem na ol i no inap stap moa long Paradais. Na tu, isi isi skin na tingting bilong ol i wok long bagarap. Long olgeta wan wan de, Adam na Iv i wok long i go klostu moa long taim bilong ol long i dai. Bilong wanem? Long wanem, taim ol i givim baksait long Man Bilong Wokim ol, ol i mekim sin, na ‘pe sin i save givim em dai tasol.’—Rom 6:23.
Bihain Adam tupela Iv i dai, tasol paslain long dispela ol i kamapim ol pikinini man na meri. Yu ting ol dispela pikinini inap mekim ol samting em God i tingting pinis long en long pastaim? Nogat, long wanem, ol i kisim sin long papamama bilong ol. Olgeta tumbuna pikinini bilong Adam i bin kisim sin na dai long em. Yumi tu i bin kisim. Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”—Rom 3:23; 5:12.
Makim Hap Yumi Stap Long En Long Nau
Taim Adam tupela Iv i bikhet i olsem ol i kirapim olgeta man long bihainim wanpela longpela rot nogut na ol man i bihainim yet dispela rot. Wanpela man bilong raitim Baibel i tok, “olgeta samting i stap nogut na i save bagarap.” (Rom 8:20) Dispela i kamapim klia hatwok bilong ol man! Sampela tumbuna pikinini bilong Adam em ol kleva saientis man na saientis meri, ol saveman bilong marasin, na ol man i kamapim ol nupela nupela masin na kompiuta samting. Tasol i no gat wanpela bilong ol inap kamapim bel isi na gutpela helt em God i laik bai ol man i kisim.
Bikhet bilong Adam tupela Iv i mekim sampela samting long yumi olgeta wan wan. Olsem: Yumi olgeta i bin kisim hevi long pasin i no stret, yumi pret long ol raskol, karim hevi bilong bikpela sik, o bel i bagarap stret taim wanpela long famili i dai. Taim ol samting long sindaun bilong yumi i stap orait tasol, wantu wanpela bikpela hevi inap kamap. Maski yumi save kisim amamas long laip bilong yumi, i stap bilong yumi i olsem bilipman Jop bilong bipo i tok long en: “Mipela ol manmeri i save stap sotpela taim tasol long graun, na . . . ol kain kain trabel i save kamap long mipela.”—Jop 14:1.
Yumi bin kisim sin long tumbuna bilong yumi na yumi stap tarangu tru long nau, olsem na yumi inap ting i no gat wanpela gutpela samting bai kamap bihain. Tasol Baibel i tok God bai i no larim ol kain hevi olsem i stap i go inap oltaim. Em bai kamapim laik bilong em bilong pastaim tru long ol man. (Aisaia 55:10, 11) Bilong wanem yumi ken bilip tru olsem dispela samting bai kamap klostu nau?
Yumi stap long wanpela taim nogut em Baibel i kolim “taim bilong las de.” (2 Timoti 3:1) Dispela tok i no makim pinis bilong dispela graun tru tru na ol samting i gat laip. Nogat. Dispela tok i makim “pasin bilong dispela graun i laik pinis,” olsem ol samting i save givim bel hevi long yumi, ol bai pinis. (Matyu 24:3, NW ) Baibel i stori long ol pasin bilong ol man na ol samting bai kamap long taim bilong las de. Skelim sampela bilong ol long blok i stap long pes 8, na bihain lukluk i go ausait long “windo” long ol samting i wok long kamap long dispela graun. Mep bilong yumi, Baibel, i helpim yumi long makim hap yumi stap long en, olsem yumi stap klostu tru long pinis bilong pasin nogut bilong dispela graun. Tasol wanem samting bai kamap bihain long en?
Rot Yumi Bihainim
Bihain stret long taim Adam tupela Iv i bikhet, God i kirap kamapim long ples klia tingting bilong em long kamapim wanpela Kingdom em “bai i stap oltaim oltaim.” (Daniel 2:44) Dispela Kingdom, em planti man i bin lain long beten long en long wanpela beten ol i kolim Beten Bilong Bikpela, em bai kamapim planti gutpela samting long ol manmeri.—Matyu 6:9, 10.
Kingdom Bilong God i no wanpela samting i stap long bel bilong man. Nogat. Em i wanpela gavman tru tru i stap long heven na em bai mekim bikpela samting hia long graun. Tingim ol samting God i promis long mekim long ol manmeri long rot bilong Kingdom bilong em. Baibel i tok, pastaim God bai “bagarapim ol man i bin bagarapim graun.” (KTH 11:18) Em bai mekim wanem long ol man i bihainim tok bilong em? Baibel i tok em bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Husat man inap mekim ol dispela samting? God tasol inap kamapim dispela kain sindaun em pastaim em i bin tingting long givim long ol manmeri.
Olsem wanem yu ken kisim ol gutpela samting em Kingdom Bilong God bai kamapim? Jon 17:3 i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” Ol Witnes Bilong Jehova i save mekim wok bilong skulim ol manmeri long olgeta hap bilong graun na dispela i helpim ol long kisim save long God na Jisas. Ol i mekim wok bilong ol long 230 kantri, na ol i wokim ol buk na nius bilong ol long winim 400 tok ples. Sapos yu laik kisim sampela save moa, toktok wantaim ol Witnes Bilong Jehova long hap bilong yu o raitim pas long atres i stap long pes 5 i stret long yu.
[Rait long pes 6]
“Mi gat tok long yupela ol man i save tok olsem, ‘Ating nau o tumora mi bai go long wanpela taun na mi bai mekim wok bisnis inap long wanpela yia. Na long dispela pasin mi bai kisim planti mani.’ Yupela i save mekim dispela kain tok, tasol yupela i no save wanem samting bai i kamap long tumora.”—Jems 4:13, 14
[Rait long pes 6]
Baibel i stori long lain tumbuna bilong yumi i go inap long namba wan man na meri. Olsem na em i tokim yumi long rot yumi ron long en i kirap we na i kisim yumi go long wanem hap. Tasol bilong kliagut long ol tok bilong Baibel, yumi mas skelim gut tok bilong en, olsem yumi skelim mep
[Rait long pes 7]
“Sin” inap makim pasin kranki o laik nogut bilong skin. Sin i stap pinis long yumi taim mama i karim yumi, na dispela i stiaim ol samting yumi mekim. “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.”—Saveman 7:20
[Rait long pes 8]
Sapos yu laik kisim fotokopi long wanpela pepa i gat mak long en, dispela mak bai stap long olgeta kopi. Yumi ol pikinini bilong Adam—olsem ol fotokopi bilong em—olsem na mak bilong sin i stap long yumi. Em dispela wankain mak i stap long Adam, em namba wan man
[Rait long pes 8]
Baibel i tok: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Dispela i kamapim klia i gat wanem as na wok bilong ol man long kamapim bel isi i pundaun. God i no wokim ol man bilong ‘bosim wokabaut bilong ol yet’ na i no tingim God
[Rait long pes 9]
Man bilong raitim song i tok long God: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Olsem lam, Baibel i helpim yumi long wokabaut stret taim yumi mas wokim ol disisen. Baibel i olsem ‘lait bilong soim rot long yumi,’ na em i givim lait long rot yumi bihainim bambai yumi ken save long ol samting bai painim yumi ol man long bihain
[Blok long pes 7]
OL GUTPELA SAMTING BAI KAMAP O NOGAT?
Long Septemba 2000, ol memba bilong Yunaitet Nesen i wanbel long putim sampela mak ol i laik winim long 2015. Sampela bilong ol dispela mak i olsem:
◼ Daunim tru namba (50 pesen) bilong ol man i stap hangre na ol man em mani ol i holim bilong lukautim ol yet long wan wan de i no winim wan dola (U.S.).
◼ Stretim rot na olgeta pikinini i pinisim praimeri skul.
◼ Ol pikinini man na pikinini meri i mas kisim wankain ediukesen.
◼ Daunim tru namba (66 pesen) bilong ol pikinini i save dai taim ol i no winim yet 5-pela krismas.
◼ Daunim tru namba (75 pesen) bilong ol meri i save dai taim ol i karim pikinini.
◼ Stopim sik HIV/AIDS long go bikpela na ol narapela bikpela sik tu, olsem malaria.
◼ Daunim tru namba (50 pesen) bilong ol man i no gat gutpela wara bilong dring.
Yu ting ol man inap winim ol dispela mak? Taim ol lain bilong helt long olgeta hap bilong graun i skelim gen ol samting long 2004, ol i ting maski yumi laik bai ol gutpela samting i mas kamap, tasol tru tru i no wok long kamap. Tok i go pas long buk State of the World 2005, em i tok: “Ol man i stap rabis na dispela i mekim na long planti hap ol samting i no inap kamap gutpela. Ol sik olsem HIV/AIDS i wok long go bikpela, em dispela samting bai bagarapim tru bikpela lain man long planti kantri. Insait long 5-pela yia i go pinis, inap 20 milion pikinini i bin dai long ol sik ol i kisim long wara, em ol sik i gat rot long pasim. Na sindaun bilong planti handet milion manmeri i nogut tru, long wanem, ol i no gat gutpela wara bilong dring na gutpela toilet samting.”
[Blok/Ol Piksa long pes 8, 9]
SAMPELA SAMTING I MAKIM “TAIM BILONG LAS DE”
Planti pait na woa.—Matyu 24:7; KTH 6:4.
Bikpela hangre.—Matyu 24:7; KTH 6:5, 6, 8.
Ol bikpela sik.—Luk 21:11; KTH 6:8.
Pasin nogut i go bikpela.—Matyu 24:12.
Bagarapim graun.—KTH 11:18.
Ol bikpela guria.—Luk 21:11.
Planti hevi nogut tru.—2 Timoti 3:1.
Laikim tumas long kisim mani.—2 Timoti 3:2.
Sakim tok bilong papamama.—2 Timoti 3:2.
I no laikim ol arapela.—2 Timoti 3:3.
Laikim tumas ol amamas bilong graun, na God, nogat.—2 Timoti 3:4.
I no bosim laik bilong bodi.—2 Timoti 3:3.
I no laikim gutpela pasin.—2 Timoti 3:3.
I no tingim bikpela bagarap i laik kamap.—Matyu 24:39.
Tok bilas na i no bilip yumi stap long taim bilong las de.—2 Pita 3:3, 4.
Autim tok bilong Kingdom Bilong God long olgeta hap.—Matyu 24:14.
[Ol Kredit Lain]
© G.M.B. Akash/Panos Pictures
© Paul Lowe/Panos Pictures
[Piksa long pes 9]
Ol Witnes Bilong Jehova i gat nem olsem lain bilong autim gutnius bilong Kingdom Bilong God