Yu Ting Gutpela Taim Bai Kamap Bihain?

Ol man i gat bikpela laik long save long taim bihain. Yumi olgeta i laik save long ol samting yumi bai mekim long neks mun, neks yia, o 10-pela yia bihain. Na tingim sindaun bilong yumi olgeta, bai yumi stap olsem wanem long 10, 20, o 30 yia bihain?

OLSEM WANEM? Yu ting ol gutpela samting bai kamap bihain? Planti milion man i ting olsem, na ating yumi ken brukim ol i go long tupela lain: I gat ol man i tok olsem tingting bilong ol long ol samting bai kamap gutpela i gat as tru bilong en, na i gat ol man i ting gutpela samting bai kamap, long wanem, ol i no laik tingim ol samting nogut inap painim ol.

Sampela man i ting i no gat wanpela gutpela samting bai kamap bihain. Sampela bilong ol em ol man i save tok bagarap tasol bai painim yumi na i luk olsem ol i amamas long tokaut long samting nogut tru bai bagarapim dispela graun. Ol i ting i no gat wanpela man inap abrusim bagarap.

Yu gat wanem tingting long taim bihain? Yu ting bikpela bagarap na dai tasol bai painim ol man o bel isi na gutpela sindaun bai kamap? Sapos yu ting bel isi na gutpela sindaun bai kamap, i gat wanem as na yu ting olsem​—⁠yu gat laik tasol long tingting olsem o tingting bilong yu i gat as tru bilong en?

I gat ol man i tok bagarap tasol bai kamap, tasol lain i kamapim nius Kirap! i no ting ol lain manmeri bai bagarap na pinis olgeta. Nogat. Baibel i soim olsem i gat as tru na yumi ken bilip olsem ol gutpela samting tru bai kamap bihain.

[Piksa Kredit Lain long pes 5]

U.S. Department of Energy photograph