“Jehova Em i Helpim Bilong Mi”

Taim Lapun i Stap “Gutpela Samting Tru”

MURIEL i gat 101 krismas, em i tok: “Yumi save stap gut na amamas.” Theodoros i gat 70 krismas, i stori long wok bilong Jehova em i mekim, na tok: “Em wanpela gutpela wok tru!” Na taim Maria i gat 73 krismas, em i tok: “Mi bilip tru olsem mi bin mekim gutpela wok tru long laip bilong mi.” Tripela wantaim i bin mekim wok bilong God Jehova long laip olgeta bilong ol.

Long olgeta hap, ol kain lapun olsem ol i stap gutpela piksa bilong planti ol man i lotuim Jehova. Maski ol i lapun, na ol i tingting planti long helt bilong ol na ol narapela hevi, ol i givim bel yet long mekim wok bilong Jehova. Long kongrigesen Kristen, ol lapun i stap gut long Jehova, ol arapela i save tingim ol olsem gutpela piksa long givim bel long God. Jehova i tingim tru wok ol lapun i mekim, maski hevi bilong lapun i mekim na ol i no inap mekim bikpela wok tumas.a​—2 Korin 8:12.

Buk Song i kamapim wanpela tok i stret long kain laip em ol lapun i stap gut long God inap kisim. Ol inap i stap olsem naispela bikpela diwai i wok yet long karim kaikai. Man bilong raitim song i tok long ol lapun i stap gut long God, olsem: “Taim ol i olpela pinis, ol i save karim kaikai yet. Ol i stap strong, na ol i no save drai. Lip bilong ol i stap grin oltaim.”​—Song 92:14.

Ating sampela i pret nogut ol narapela i lusim ol o i no tingim ol taim ol i kamap lapun na strong bilong ol i pinis. Devit i beten strong long God: “Nau mi lapun pinis na mi no gat strong moa, orait nogut yu lusim mi na givim baksait long mi.” (Song 71:9) Lapun i go slek o kamap strong, wanem samting i mekim na tupela pasin i narapela narapela? Em pasin bilong bihainim stretpela pasin bilong God. Man bilong raitim song i tok: “Ol stretpela manmeri bai i kamap gutpela tru olsem diwai i karim gutpela kaikai.”​—Song 92:12.

Ol man i mekim gut wok bilong Jehova long laip bilong ol, ol i wok yet long karim kaikai taim ol i kamap lapun. Planti samting ol i bin mekim long laip bilong ol o long helpim ol narapela, ol dispela samting i kamap gutpela, olsem pikinini kaikai i go kamap bikpela na i karim planti kaikai. (Galesia 6:​7-10; Kolosi 1:10) Tasol ol man husat i bin tromoi nating laip bilong ol long kisim ol samting bilong ol yet tasol na sakim lo bilong God, wok bilong ol i karim liklik kaikai tasol taim ol i go lapun.

Buk Sindaun long Baibel i tok tu long stretpela pasin i olsem bilas bilong ol lapun. Em i tok: “Waitpela gras bilong man i gutpela samting tru taim em i bihainim stretpela pasin.” (Sindaun 16:​31, NW ) Yes, stretpela pasin i kamapim klia man i gat gutpela bel. Man i wok long bihainim stretpela pasin long laip bilong em, ol narapela bai rispek long em. (Wok Pris 19:32) Lapun i gat waitpela gras, sapos em i gat savetingting na gutpela pasin, ol man i save givim biknem bilong em.​—Jop 12:12.

Man i mekim stretpela pasin long wok bilong Jehova, dispela i gutpela samting tru long Em. Baibel i tok: “Mi God bilong yupela, na bai mi lukautim yupela i go inap yupela i lapun pinis na i gat waitpela gras. Mi yet mi bin mekim yupela i kamap wanpela lain manmeri, na oltaim bai mi karim yupela na lukautim yupela na kisim bek yupela.” (Aisaia 46:4) Taim yumi save olsem gutpela Papa bilong yumi long heven i tok promis long lukautim na helpim ol lapun i stap gut long en, dispela i mekim gut bel bilong yu, laka?​—Song 48:14.

Jehova i tingim samting ol man i mekim long wok bilong em i gutpela samting tru, olsem na i stret ol narapela tu i mas tingim dispela, a? Taim yumi tingim tingting bilong God long ol lapun wanbilip, yumi save amamas tru long ol. (1 Timoti 5:​1, 2) Olsem na yumi mas painim rot bilong soim pasin laikim Kristen long lukautim ol lapun long samting ol i sot long en.

Wokabaut Long Stretpela Pasin Taim Ol i Kamap Lapun

Solomon i tok: “Man i bihainim stretpela pasin em bai i kisim laip na i stap gut.” (Sindaun 12:28) Lapun i no inap pasim man long kirap wokabaut long rot bilong stretpela pasin taim em i kamap lapun. Olsem: Long Moldova, taim wanpela lapun man i gat 99 krismas i yangpela yet, em i givim laip bilong em long litimapim lo Komiunis. Em i hambak long em yet i bin toktok wantaim ol lida bilong Komiunis, olsem V. I. Lenin. Taim gavman Komiunis i pundaun, dispela i mekim na em i pilim olsem i stap bilong em i no gat as moa bilong en. Tasol taim ol Witnes Bilong Jehova i soim em olsem Kingdom Bilong God tasol i rot tru bilong pinisim ol hevi bilong ol man, em i kirap lainim tok i tru bilong Baibel na kamap gutpela sumatin bilong Baibel. Tasol em i dai paslain long em i kisim baptais na kamap wokman bilong Jehova.

Taim wanpela lapun meri bilong Hangari i gat 81 krismas, em i kisim save long ol stretpela lo bilong God, em i save olsem em i mas maritim tru dispela man em i bin sindaun nating wantaim inap sampela yia. Dispela meri i strongim bel na stori long poroman bilong em na kamapim tingting bilong em em Baibel i as bilong en. Em i kirap nogut na amamas long man i tok orait long maritim em. Bihain long tupela i rejistaim marit long gavman, kwiktaim em i kamap strong long spirit. Insait long 8-pela mun taim em i kirap stadi long Baibel, em i kamap pablisa i no baptais, na i no longtaim em i kisim baptais. Tru tumas, stretpela pasin inap mekim lapun i kamap gutpela samting tru!

Em nau, ol lapun Kristen i stap gut long God i ken save olsem God i laikim ol. Jehova i no save lusim ol man i stap gut long em. Em i tok promis long helpim ol, na lukautim ol, long taim ol i lapun tu. Na ol i kamapim klia tok bilong man bilong raitim song: “Jehova em i helpim bilong mi.”​—Song 121:​2, NW.

[Futnot]

[Rait long pes 9]

“Waitpela gras bilong man i gutpela samting tru taim em i bihainim stretpela pasin.”​—SINDAUN 16:​31, NW

[Blok long pes 8]

JEHOVA I SAVE LUKAUTIM OL LAPUN WOKMAN BILONG EM

“Yupela i mas aninit long ol lapun na mekim gut long ol.”​—Wok Pris 19:32.

“Mi God bilong yupela, na bai mi lukautim yupela i go inap yupela i lapun pinis na i gat waitpela gras.”​—Aisaia 46:4.