“Jehova Em i Helpim Bilong Mi”
Ol Yangpela i Litimapim Nem Bilong Jehova—Laip Bilong Ol i Kamap Gutpela Moa
“MI LAIK kisim ol gutpela samting long laip bilong mi!” Em tok wanpela yangpela mangi i kamapim long ol laik bilong em. Tasol olsem wanem wanpela yangpela man inap kisim ol gutpela samting long laip bilong em? Baibel i bekim stret dispela askim: “Long taim yupela i yangpela yet, yupela i mas tingim em [God].”—Saveman 12:1.
Pasin bilong litimapim nem bilong Jehova na lotuim em, i no bilong ol bikpela manmeri tasol, nogat. Samuel, pikinini man bilong Elkana na Hana, i liklik mangi yet taim em i mekim wok bilong Jehova long haus lotu sel. (1 Samuel 1:19, 20, 24; 2:11) Yangpela meri Israel i bilip tru long Jehova taim em i tok i gutpela sapos kepten bilong ami bilong Siria i go long profet Elisa bilong oraitim sik lepra bilong em. (2 King 5:2, 3) Long Song 148:7, 12, i tok ol yangpela man na ol yangpela meri i mas litimapim nem bilong Jehova.a Taim Jisas i gat 12-pela krismas tasol, em i givim bel tru long lotuim Papa bilong em. (Luk 2:41-49) Ol skul ol i kisim long Baibel i mekim na sampela yangpela mangi i lukim Jisas long tempel i singaut long em olsem: “Amamas long Pikinini Bilong Devit.”—Matyu 21:15, 16.
Litimapim Nem Bilong Jehova Long Nau
Long nau, planti yangpela namel long ol Witnes Bilong Jehova ol i no sem long bilip bilong ol na ol i no pret long toktok wantaim ol narapela long skul na long ol narapela hap long bilip bilong ol. Tingim tupela stori.
Stephanie bilong Briten i gat 18 krismas—klas bilong em i bin toktok long pasin bilong rausim bel na ol arapela pasin ol man i save skelim, olsem ol i stret o nogat. Tisa i tok olsem long nau pasin bilong rausim bel em i orait long olgeta hap olsem na i no gat as na wanpela yangpela meri bai tok nogat long dispela pasin bilong rausim bel. Taim olgeta long klas i wanbel wantaim dispela tingting, Stephanie i pilim olsem em i mas kamapim bilip bilong em, em tok bilong Baibel i as bilong en. Rot i op bilong mekim olsem taim tisa i askim Stephanie long tingting bilong em. Maski em i bin pret pastaim, Stephanie i kamapim tok Baibel i as bilong en. Em i kamapim tok bilong Kisim Bek 21:22-24 na em i stori olsem, sapos i rong long bagarapim pikinini i stap long bel, orait pasin bilong rausim bel bai no stret wantaim laik bilong God.
Tisa i wanpela pris, na em i no bin ritim ol dispela ves bipo. Pasin bilong Stephanie long tokaut long bilip bilong em i mekim na em inap toktok wantaim ol wanklas bilong em long ol narapela samting. Nau wanpela wanklas bilong Stephanie i save kisim Wastaua na Kirap! long olgeta taim, na narapela tupela i bin kam long wanpela kibung distrik bilong ol Witnes Bilong Jehova bilong lukim Stephanie i kisim baptais bilong makim olsem em i dediketim laip bilong em long God.
Vareta i gat 6-pela krismas, em i stap long Surinam, Saut Amerika, em i litimapim nem bilong God taim em i luksave olsem tisa bilong em i mas kisim sampela tok bilong Baibel bilong mekim isi bel bilong em. Inap 3-pela de tisa i no stap long skul, taim em i kam bek em i askim ol sumatin olsem ol i save long as na em i no bin i stap o nogat. Ol i bekim tok olsem, “Yu bin sik, laka?” Tisa i bekim tok olsem: “Nogat. Bikpela susa bilong mi i bin dai, na mi bin bel hevi tru long dispela samting. Olsem na yupela i mas stap isi.”
Long apinun taim mama bilong em i slip liklik, Vareta i wok long painim ol olpela magasin na ritim ol het tok bilong ol. Em i painim Wastaua bilong Julai 15, 2001, i gat het tok “I Gat Laip Bihain Long Taim Yumi Dai?” Em i amamas tru, olsem na em i kirapim mama bilong em na tok olsem, “Mama, Mama, lukim! Mi painim wanpela magasin i stori long indai bilong helpim tisa bilong mi!” Vareta i salim dispela magasin long tisa bilong em wantaim wanpela pas. Em i raitim pas olsem: “Dispela magasin i bilong yu stret. Long Paradais bai yu lukim gen susa bilong yu, long wanem, Jehova i no inap giaman. Em i bin tok promis long em bai kamapim wanpela paradais, i no long heven, nogat, em hia long graun.” Tisa i tok tenkyu tru long ol gutpela tok, em Baibel i as bilong en, em i ritim long dispela magasin.
Redim Ol Samting Long Bihain
Jehova em i God bilong “amamas” na em i laik bai ol yangpela i ken amamas. (1 Timoti 1:11) Long Baibel em i tok: “Yupela yangpela manmeri, yupela i mas amamas long taim yupela i yangpela yet.” (Saveman 11:9) Tasol Jehova i no save tingim ol samting bilong nau tasol, em inap save tu long ol samting em gutpela pasin na pasin nogut bai kamapim long bihain. Dispela em as na em i tokim yupela ol yangpela: “God i bin wokim yumi olgeta. olsem na taim yupela i yangpela yet yupela i mas tingim em. Nogut yupela i lusim tingting long em na taim yupela i kamap lapun na taim nogut i painim yupela, bai yupela wan wan i tok olsem, ‘Mi no amamas long laip bilong mi.’ ”—Saveman 12:1.
Tru, Jehova i laik bai ol yangpela i ken amamas long ol gutpela samting bilong laip. Long rot bilong tingim na litimapim nem bilong God, ol yangpela inap long kisim ol gutpela gutpela blesing tru. Maski ol hevi i painim ol, ol inap tru long tok olsem: “Jehova em i helpim bilong mi.”—Song 121:2, NW.
[Futnot]
a Lukim 2005 Calendar of Jehovah’s Witnesses, Mas/Epril.
[Rait long pes 9]
“Ol yangpela man na ol yangpela meri, . . . yupela olgeta litimapim nem bilong Bikpela!”—SONG 148:7, 12
[Blok long pes 8]
JEHOVA I SAVE HELPIM OL YANGPELA
“Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau.” —Song 71:5.
“Bikpela i save givim ol gutpela samting long mi na inapim mi. Em i mekim olsem na mi kamap yangpela gen na mi stap strong olsem tarangau.”—Song 103:5.