Wanpela Yangpela Meri i Wetim Gutpela Samting Bai Kamap
LAIN bilong wokim nius Kirap! i kisim wanpela pas long wanpela meri i gat 12-pela krismas, nem bilong em Stephanie. Em i tok: “Mi laik tokim yupela olsem ol buk na nius i helpim mi tru long skul. I no longtaim i go pinis, na tisa i givim mipela ol sumatin wanpela skul wok, het-tok bilong en, ‘Ol Man Bilong Kain Kain Lain.’ Mi na famili bilong mi i skelim ol buk na nius samting, na katim na kisim ol tok na piksa i stret long dispela het-tok. Mi putim glu long ol piksa na tok mipela i katim na pasim long wanpela bikpela strongpela pepa.” Tisa bilong Stephanie i tokim klas long makim 5-pela skul wok ol i ting i gutpela tru. Stephanie i tok: “Long de bihain, mi kisim save olsem wok bilong mi i wanpela bilong ol dispela 5-pela skul wok i gutpela tru.”
Stephanie i kisim sampela piksa na tok long Awake! bilong Oktoba 22, 1998, het-tok bilong karamap bilong nius em “Will All People Ever Love One Another?” Stephanie em wanpela Witnes Bilong Jehova, na em i bilip tru olsem ol man bilong kain kain lain ol inap long sindaun gut wantaim. Tru tumas, em i insait long wanpela bikpela lain brata i stap long olgeta hap bilong graun em bipo narapela i birua long narapela—olsem ol Tutsi na Hutu, ol Jeman na Rasia, ol Amenia na Turki, ol Japan na Amerika. Tasol tok i tru bilong Baibel i mekim na ol i stap wanbel wantaim. Olgeta wantaim i strong long bihainim pasin bilong Man bilong wokim ol. Ol i bihainim wanem pasin bilong em? Wanpela skripsa bilong Baibel em Stephanie i yusim long skul wok bilong em i kamapim bekim: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Ol Witnes Bilong Jehova i wok strong long mekim wankain pasin long olgeta man taim ol i stap na wok wantaim ol.
Stephanie i wetim taim truim bilong tok promis bilong Baibel bai kamap, olsem klostu nau Kingdom bilong God bai kamapim stretpela pasin long graun. (KTH 21:3, 4) Planti yangpela i pret na ol i no save wanem samting bai painim ol long bihain, tasol Stephanie em wanpela yangpela i wetim gutpela samting bai kamap bihain.