Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Wanem astingting bilong Disemba 25 olsem det bilong tingim taim Maria i karim Jisas?
Baibel i no stori long de stret Maria i karim Jisas. Buk Enciclopedia Hispánica i tok: “Dispela de Disemba 25 bilong mekim Krismas, ol i no kisim long rot bilong skelim stret taim bilong betde bilong Jisas, nogat. Ol i kisim dispela de long taim ol i senisim ol bikpela de bilong taim bilong kol . . . na mekim i kamap bikpela de bilong lotu Kristen.” Ol lain Rom bilong bipo i bin mekim ol amamas long taim san i kam antap long skai long taim bilong kol. Ol i save kaikai planti, na mekim ol pati na amamas, na narapela i givim presen long narapela.—12/15, pes 4-5.
• Yu ting Aposel 7:59 i tok Stiven i bin beten long Jisas?
Nogat. Baibel i soim olsem beten bilong yumi i mas i go long God Jehova tasol. Long samting olsem driman, Stiven i lukim Jisas olsem na ating em i pilim olsem em inap singaut stret long Jisas na tok: “Bikpela Jisas, yu kisim spirit bilong mi.” Stiven i save pinis olsem God i bin givim namba na strong long Jisas long kirapim bek ol man i dai pinis. (Jon 5:27-29) Olsem na Stiven i askim Jisas long lukautim spirit bilong em, o strong bilong laip bilong em, inap long taim bilong kirap bek.—1/1, pes 31.
• Olsem wanem yumi save God i no makim pinis olgeta samting bai painim yumi wan wan long bihain?
God i wokim yumi bilong i stap fri long makim wanem samting yumi laik mekim—God yet i no bin makim. Sapos Jehova i makim pinis rot yumi mas bihainim, na bihain yumi mas kot long ol samting yumi mekim, em i no mekim pasin sori na pasin i stret long yumi. (Lo 32:4; 1 Jon 4:8)—1/15, pes 4-5.
• Bilong wanem em i pasin antap long tok olsem ol mirakel i no inap kamap?
Sampela saientis i save pinis, ol i gat hap save tasol long ol bikpela samting bilong saiens i insait long ol samting God i bin wokim, olsem na ol i tok ol i no inap tok moa olsem wanpela samting i no inap tru long kamap. Ol i tok tasol olsem ol i ting em i no ken kamap.—2/15, pes 5-6.
• Bilong wanem Hetman Samson i tokim papamama bilong em olsem em i laik kisim wanpela meri Filistia olsem meri bilong em? (Hetman 14:2)
Lo bilong God i tambuim pasin bilong maritim wanpela meri i lotuim ol god giaman. (Kisim Bek 34:11-16) Tasol, dispela meri Filistia “i gutpela tru” long ai bilong Samson. Samson “i painim rot bilong pait long ol Filistia,” em i tingim dispela samting olsem na em i laik kisim dispela meri. Long rot bilong holi spirit, God i sambai long Samson. (Hetman 13:25; 14:3, 4, 6)—3/15, pes 25-6.
• I stret Kristen i ken givim liklik mani o sampela kain presen long wokman bilong gavman long ol wok em i mekim?
Em i no stret long grisim wanpela wokman bilong gavman, na givim em mani samting bambai em i ken mekim samting i no stret, paulim kot, o helpim yumi paslain long ol narapela man. Tasol em i no grispasin sapos yu givim liklik mani o presen long wanpela wokman bilong gavman taim em i mekim wok bilong em o em i mekim wanpela wok bilong yu i stret long lo o bilong em i no ken mekim pasin nogut long yu.—4/1, pes 29.