Wanpela Hevi Nogut Tru i Kamap

OWEN, wanpela mangi i gat 2 na hap krismas, em i pilai long rum waswas. Em i painim rot na opim wanpela liklik kabot em papamama i ting em i stap antap tumas. Dispela kabot i gat ol marasin insait long en. Wanpela botol i pulim ai bilong Owen. Em i opim na dringim. Wantu hevi i kamap.

I gat marasin asit insait long botol, na sori tru, liklik Owen i dai. Papamama bilong em i bel hevi stret. Papa bilong em, Percy, i go lukim pasto. Em i askim em: “Bilong wanem dispela samting i kamap?” Pasto i tok: “God i laikim wanpela liklik ensel moa long heven.” Dispela papa, em bel bilong em i bagarap tru, em i ting dispela samting i no stret liklik. Olsem wanem? Tru tru em laik bilong God long kain hevi olsem i kamap? Percy i no amamas long misin bilong em na em i lusim.

Percy i tingting bek long ol samting i bin kamap na em i laik save: ‘Liklik pikinini bilong mi i pilim yet pen? Bai mi lukim em gen?’

Ating yu tu i laik save, wanem samting i painim man i dai pinis na i gat rot long bung gen wantaim ol famili na ol gutpela pren i dai pinis o nogat. Tok Bilong God, em Baibel, i bekim ol dispela askim. Ol dispela bekim i klia na inap mekim gut bel bilong ol man em wankain hevi olsem i bin painim ol. Na tu, Baibel i stori long wanpela gutpela samting tru God i bin tok promis long en​—ol man i dai pinis bai kirap bek.

Plis ritim stori i kamap bihain long dispela na bai yu inap kisim sampela save moa long dispela gutpela samting.