Narapela Kain Tingting Long Wok
“Go long wok—go long wok! Em i samting bilong bikpela amamas tru long save olsem yumi gat wok i stap yet bilong mekim.”—Katherine Mansfield, meri bilong raitim buk (1888-1923).
OLSEM WANEM? Yu gat kain tingting olsem long pasin bilong mekim wok? Yu yet i gat wanem tingting long wok? Yu tingim wok olsem wanpela longpela rot i tudak em yu mas wokabaut long en paslain long yu malolo long ol wiken? O ating yu laikim tumas wok na yu laik wok long olgeta taim?
Planti man i save lusim bikpela haptaim bilong de long mekim wok. Wok bilong yumi inap makim wanem hap yumi sindaun long en na wanem kain sindaun yumi gat. Planti man i lukim olsem kirap long taim ol i stap yangpela i go inap long taim ol i ritaia long wok, wok i stap olsem nambawan samting i bosim laip bilong ol. Sampela bilong yumi i save belgut tru long wok yumi mekim. Sampela man i ting pe man i kisim long wanpela wok o biknem bilong wok bai makim olsem dispela wok i gutpela o nogat. Sampela narapela i tingim wok olsem samting bilong inapim taim o samting bilong pulim nating taim.
Sampela man i wok na bai ol i gat kaikai samting, na sampela i tingim wok olsem samting man i mas mekim taim em i stap laip, na sampela i kisim bagarap na ol i dai long wok. Olsem: Wanpela ripot bilong Yunaitet Nesen i kamapim olsem namba bilong ol man i kisim hevi o i dai long wok i winim namba bilong ol man i kisim hevi o i dai long rot bilong “ol pait o pasin bilong mekim nabaut long drak na bia samting.” Nius The Guardian bilong London i stori long dispela samting na i tok: “Long olgeta yia, winim 2 milion manmeri ol i dai long rot bilong ol sik o eksiden i kamap long ples wok . . . Das, ol marasin, nois na rediesen [i] kamapim kensa, sik bilong klok na sik strok.” Ol pikinini i mekim wok leba na pasin bilong fosim ol man long mekim wok leba, em tupela hap tasol bilong ol samting nogut long pasin bilong wok long nau.
Na tu, i gat dispela samting em saveman Steven Berglas i kolim olsem “supernova burnout,” olsem pinisim nating strong. Em i tok long man i givim bel long mekim wok na em i kisim namba wan biknem long wok, tasol em i “pret oltaim, wari, na dispela tingting olsem em i kalabus long wanpela wok em i no inap belgut long en i mekim em i stap bel hevi.”
Pasin Bilong Wok Strong na Wok Olgeta Taim
Long nau ol man i save wok inap planti aua, olsem na i gutpela long luksave long pasin bilong wok strong em i wanem samting na pasin bilong wok olgeta taim em i wanem samting. Ol man bilong wok olgeta taim ol i tingim ples wok olsem wanpela ples bilong hait long ol kain kain hevi i save kamap long dispela graun; ol man bilong wok strong ol i tingim wok olsem samting ol i mas mekim na sampela taim wok i mekim ol i belgut. Ol man bilong wok olgeta taim ol i save tingting tasol long wok na ol i no gat taim bilong mekim ol narapela samting long i stap bilong ol; ol man bilong wok strong ol i save long wanem taim ol i mas pinis wok, na putim tingting i go long narapela samting. Olsem: Ol i save stap long taim bilong tingim de ol i bin marit long en. Ol man bilong wok olgeta taim ol i save belgut taim ol i mekim planti wok tumas na dispela i save kamapim bikpela marasin adrenalin long skin bilong ol; tasol i no olsem long ol man bilong wok strong.
Long nau ol man i no kliagut olsem pasin bilong wok olgeta taim em i narapela long pasin bilong wok strong, na ol i mekim na i olsem pasin bilong mekim planti wok tumas em i gutpela samting. Ol kain masin olsem mobail fon inap mekim na i hatwok long save sapos man i stap long ples wok o long haus. Sapos olgeta ples man i stap long en inap kamap olsem ples wok na olgeta taim inap kamap olsem taim bilong wok, dispela inap nogutim ol man.
Sampela man i save mekim wanem taim kain pasin olsem i kamap? Ol saveman i skelim olsem ol man husat i mekim planti wok tumas na skin i les olgeta, ol i wok long lusim haptaim long mekim ol samting bilong lotu. Nius San Francisco Examiner i tok “pasin bilong bungim wok wantaim ol samting bilong lotu em i wanpela narapela kain samting ol man i mekim.”
Wanpela ripot long Silicon Valley, em wanpela nambawan ples bilong kamapim ol nupela masin olsem kompiuta samting long Amerika, i tok: “Ol i wok long sotim namba bilong ol wokman na ol bos i lukim olsem dispela i kamapim planti moa spes bilong putim ol ka, tasol ol spes bilong putim ol ka i sot long ol ples ol i mekim ol Baibel stadi long en.” Maski dispela i makim wanem samting, planti man long olgeta hap ol i luksave olsem Baibel i helpim ol long kisim stretpela tingting long wok, olsem na ol inap bihainim stretpela tingting long wok na long ol samting ol i mekim long i stap bilong ol.
Olsem wanem Baibel inap helpim yumi long kisim stretpela tingting long wok? I gat ol stiatok bilong Baibel em inap helpim yumi long karim ol hevi i save kamap nau long ol ples wok? Stori i kamap bihain long dispela bai skelim ol dispela askim.