Yu Gat Sampela Tingting Kranki Long Yu Yet?
INAP planti yia, Lena i gat sampela tingting kranki long em yet. Em i tok: “Inap planti yia, kirap long taim mi liklik yet, narapela i bin mekim pasin sem long mi na dispela i mekim na mi no amamas long mi yet. Mi pilim olsem mi no inap mekim wanpela gutpela wok.” Simone tu i tingting bek long taim em i yangpela na i tok: “Mi pilim olsem mi sot long wanpela samting na mi samting nating tasol.” Planti man long nau i pilim wankain olsem, na dispela i mekim ol i bel hevi. I gat wanpela lain i stap em ol yangpela i ken ring long en bilong kisim helpim, na dispela lain i tok 50 pesen bilong ol yangpela i ring ol i save tok olsem “ol i pilim ol i samting nating tasol.”
Sampela saveman i tok, taim ol man i mekim narapela i pilim olsem em i samting nating, dispela inap kirapim em long pilim olsem em i no inap mekim wanpela gutpela wok. Kain tingting olsem inap kamap long man taim narapela i wok oltaim long daunim em, o tok nogut long em, o mekim long em olsem em i wanpela wokboi nating. Tasol maski wanem samting i mekim, taim man i pilim olsem em i samting nating, dispela inap pinisim strong bilong em, na inap nogutim em tu. Wanpela lain dokta i bin skelim dispela samting ol i kisim save olsem ol man i gat tingting kranki long ol yet, ol i no save trastim ol yet na ol arapela, na long dispela rot, maski ol i no bin tingting long mekim olsem, dispela i save bagarapim pasin pren i stap namel long ol na ol arapela. Lain dokta i tok: “Ol yet i mekim na samting ol i no laik tru long en em i painim ol.”
Kain man olsem i save “bel hevi na [ol i] gat planti tingting long ol samting.” (Song 94:19) Ol i save pilim olsem ol i no inap mekim gut wok bilong ol. Taim hevi i kamap, ol i save ting em asua bilong ol yet. Maski narapela i litimapim nem bilong ol long ol samting ol i mekim, ol i save ting ol i no gutpela tumas na bihain dispela samting bai kamap ples klia. Planti i ting olsem i no stret long ol i stap amamas, na ol i kirap bihainim sampela pasin i bagarapim ol yet em ol i ting ol i no inap lusim. Lena, em yumi stori pinis long em, em i no kaikai gut, long wanem, em i no amamas long em yet, na em i tok, “Mi pilim olsem mi no inap senisim wanpela samting.”
Olsem wanem? Ol man i “bel hevi na [ol i] gat planti tingting long ol samting,” ol i mas i gat dispela tingting i go inap long ol i dai? I gat rot bilong daunim kain tingting olsem? Baibel i kamapim sampela gutpela stiatok i bin helpim planti man em ol i gat tingting kranki long ol yet. Wanem sampela bilong ol dispela stiatok, na olsem wanem ol i bin helpim ol man long i stap amamas? Stori i kamap bihain long dispela bai bekim dispela askim.