Askim

Olsem wanem? Dispela tok “ating” long Sefanaia 2:3 long sampela Baibel i makim olsem ol wokman bilong God i no inap save tru olsem ol bai kisim laip i stap oltaim o nogat?

Dispela skripsa i tok: “Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, [“ating,” NW ] yupela bai i no inap bagarap.” Bilong wanem dispela ves i tok “ating”?

Bilong save long ol samting Jehova bai mekim long ol manmeri i stap gut long em long Armagedon, i gutpela yumi ken tingim gen ol tok bilong Baibel long ol samting God bai mekim bilong helpim ol manmeri i dai paslain long dispela taim bilong kot. Sampela bai kirap bek olsem spirit na i go long heven na ol i no inap i dai moa, na sampela bai kirap bek long graun, na ol i gat rot long i stap oltaim long Paradais. (Jon 5:​28, 29; 1 Korin 15:​53, 54) Em nau, sapos Jehova i tingim na givim gutpela pe long ol man i stap gut long em na ol i dai paslain long Armagedon, orait yumi ken save, em bai mekim wankain pasin long ol wokman bilong em ol i stap yet long de bilong belhat bilong em.

Tok bilong aposel Pita em holi spirit i kirapim em long mekim, dispela tu i strongim bel bilong yumi. Em i tok: “Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut. God i bin tok long Sodom wantaim Gomora tu i mas bagarap. Na God i kukim dispela tupela bikpela taun long paia . . . God i kisim bek Lot, na em i no bagarap. . . . Yumi save, sapos traim i kamap long ol man i bihainim God, orait Bikpela i save long rot bilong kisim bek ol long dispela traim . . . na em i save long rot bilong bekim pe nogut long ol [man nogut], i go inap long De bilong bikpela kot bilong God.” (2 Pita 2:​5-9) Tru, bipo Jehova i bin bagarapim ol man nogut, tasol em i lukautim Noa wantaim Lot, em ol i bin stap gut long mekim wok bilong em. Na Jehova bai lukautim tu ol manmeri i givim bel long em taim em i bagarapim ol man nogut long Armagedon. Wanpela bikpela lain, em ol stretpela manmeri, ol bai abrusim dispela bagarap na i stap gut.​—KTH 7:​9, 14.

Olsem na yumi ken ting, dispela tok “ating” long Sefanaia 2:3 long sampela Baibel i no makim olsem yumi no save tru tru olsem God inap lukautim ol manmeri em i orait long ol. Taim man i kirap long bihainim stretpela pasin na pasin daun, yumi ken tok, ating Jehova bai haitim em long de bilong belhat bilong em. Tasol dispela man i mas wok yet long bihainim pasin daun na stretpela pasin na bai Jehova i ken lukautim em na em i no ken bagarap.​—Sefanaia 2:3.

[Piksa long pes 31]

“Sapos traim i kamap long ol man i bihainim God, orait Bikpela i save long rot bilong kisim bek ol long dispela traim”