Hevi Bilong Indai

“PIKININI I GAT 6-PELA KRISMAS I KILIM EM YET I DAI.” Dispela het tok long nius i stori long indai bilong wanpela liklik pikinini meri, nem bilong em Jackie. I no longtaim i go pinis, mama bilong em i bin kisim bikpela sik na em i dai. Paslain long Jackie i kalap long rot we tren i spit i kam long en, em i bin tokim sampela wanblut olsem em i laik ‘kamap wanpela ensel na stap wantaim mama bilong em.’

Ian i gat 18 krismas taim em i askim pris long stori long as na papa bilong em i bin dai long sik kensa. Pris i tok papa bilong Ian i wanpela gutpela man, olsem na God i laik bai em i stap long heven. Taim Ian i harim dispela, em i wokim tingting olsem em i no laik save long kain God olsem. Long tingting bilong Ian, i stap bilong ol man i no gat as tru bilong en, olsem na em i kirap insait long ol kain kain amamas bilong dispela graun. Em i dring planti tumas, kisim drak, na pamuk. Em i no inap pasim em yet long mekim.

‘Ol Man i Gat Laip Ol i Save Bai Ol i Dai’

Dispela tupela stori i kamapim klia olsem indai inap bagarapim i stap bilong yumi ol man, na moa yet sapos em i bin kamap long wanpela taim yumi no bin tingim. Tru, yumi olgeta i save long dispela samting Baibel i toktok long en: ‘Ol man i gat laip ol i save bai ol i dai.’ (Saveman 9:⁠5) Tasol planti man i no laik tingim dispela samting. Olsem wanem long yu yet? Ol samting long sindaun bilong yumi i save pulim bikpela haptaim na strong bilong yumi, olsem na ating yumi no laik tingting long dai bilong yumi, em yumi ting i stap longwe yet.

Buk The World Book Encyclopedia i tok: “Klostu olgeta man i pret long indai na ol i no laik tingim dispela samting.” Tasol bikpela eksiden o bikpela sik inap mekim na nau yumi mas tingim olsem dai i laik painim yumi. O ating fiuneral bilong wanpela pren o wanblut i kirapim yumi long tingim dai i wetim olgeta manmeri.

Long fiuneral bilong man i dai pinis ol man i save tok, “Bai yumi bihainim em i go.” Na tru tumas, ol yia bilong yumi i pinis kwiktaim na i no longtaim na ol hevi bilong lapun i painim yumi. I olsem dai i no stap longwe moa. I gat planti tumas fiuneral yumi mas go long en; planti tumas gutpela pren ol i dai. Long planti lapun, bikpela askim bilong ol i olsem: “Wanem taim bai mi dai?”

Bikpela Askim

I no gat wanpela man inap tok olsem dai i no inap painim em, tasol bikpela askim i olsem: Taim man i dai pinis, wanem samting i save kamap? I gat kain kain bekim, na sampela man i ting olsem i no gat rot bilong save. Sampela man i ting olsem sapos yumi bilong i stap nau tasol, orait yumi mas traim bes long amamas long ol gutpela gutpela samting bilong laip.

Tasol sampela i gat narapela tingting. Ol i no laik ting olsem dai em i pinis bilong laip bilong ol. Tasol ol i no kliagut long wanem samting i kamap bihain long indai. Sampela i ting olsem ol bai go long wanpela gutpela ples na stap amamas oltaim oltaim, na sampela i ting olsem bihain ol bai kamap laip gen, ating long bodi bilong narapela man.

Ol man i krai sori long ol wanblut i dai pinis ol i save askim ol yet, “Ol man i dai pinis ol i stap we?” Sampela yia i go pinis, sampela memba bilong wanpela futbal klap ol i raun long wanpela liklik bas i go long wanpela pilai, na wantu wanpela trak i bamim bas na bas i lusim rot. Faipela memba bilong tim ol i dai. Kirap long de stret bilong eksiden, mama bilong wanpela husat i bin dai long eksiden, em i no inap moa mekim ol samting em i save mekim. Em i laik save pikinini man bilong em i stap we. Em i save go long matmat bilong em na toktok long em inap planti aua. Em i tok, “Mi hatwok tru long bilip olsem i no gat laip bihain long indai, tasol mi no save tru tru.”

I klia tru olsem, tingting bilong yumi long indai inap mekim bikpela samting long laip bilong yumi long nau. Ol man i gat narapela narapela tingting long indai, olsem na i gat sampela askim. Tingim olsem wanem bai yu bekim ol dispela askim. Olsem wanem? Yumi mas tingting tasol long stap laip na no ken tingting long dai? Yumi save dai inap painim yumi, tasol yumi mas larim dispela tingting i bagarapim i stap bilong yumi? Man i krai sori em i no gat rot long save wanblut bilong em i dai pinis i stap we? Dai i mas i stap olsem wanpela tok hait yumi no inap kliagut long en?