Askim

Long Israel bilong bipo, i gat wanpela lait i bin kamap olsem mirakel insait long Rum Tambu Tru bilong haus lotu sel na long tempel, na sampela taim ol i kolim olsem Sekina. Dispela lait i makim wanem samting?

Jehova, em gutpela Papa na Man Bilong Lukautim lain bilong em, em i kamapim klia long ol Israel olsem em i stap wantaim ol. Wanpela rot bilong em long mekim olsem, em long wanpela klaut i lait strong na i stap long ples bilong mekim lotu bilong em.

Dispela strongpela lait i makim olsem Jehova i stap, tasol ol i no inap lukim em. Lait i kamap insait long Rum Tambu Tru bilong haus lotu sel na long tempel Solomon i wokim. Dispela lait i kamap olsem mirakel, em i no makim olsem Jehova i stap long dispela hap long bodi spirit bilong em. I no gat wanpela haus ol man i wokim em God i ken i stap insait long en, nogat. (2 Stori 6:18; Aposel 17:24) Dispela strongpela lait God i bin kamapim insait long haus lotu sel inap strongim bilip bilong hetpris na long rot bilong hetpris em inap strongim olgeta Israel, olsem Jehova i stap na em i lukautim ol long olgeta samting ol i mas kisim.

Long tok ples Aram bihain long taim ol i raitim pinis Baibel, ol i kolim dispela lait olsem Sekina (shekhi·nahʹ), insait bilong en i olsem “samting i stap” o “haus.” Dispela nem i no stap long Baibel, tasol em i stap long Ol Skripsa Hibru em ol i bin tanim long tok ples Aram, ol i kolim tu olsem ol Targum.

Taim Jehova i tokim Moses long pasin bilong wokim haus lotu sel, em i tok: “Bai mi givim yu dispela tupela hap ston i gat lo i stap long en na yu mas putim tupela insait long bokis na pasim ai bilong bokis. Na mi bai bung wantaim yu long dispela ples bilong lusim sin. Na bai mi stap antap long en namel long tupela ensel na bungim yu na bai mi autim olgeta lo bilong mi long yu.” (Kisim Bek 25:​21, 22) Dispela Bokis i stap long Rum Tambu Tru na ol i karamapim long gol. Antap long ai bilong Bokis i gat tupela ensel ol i wokim long gol.

Jehova bai stap we na em i toktok? Em yet i bekim dispela askim taim em i tokim Moses: “Mi save stap insait long wanpela klaut na mi kamap ples klia antap long . . . Bokis Kontrak.” (Wok Pris 16:⁠2) Dispela klaut i drip antap long Bokis holi namel long tupela ensel gol. Klaut hia i go antap inap long wanem mak, o em i stap antap long tupela ensel inap long wanem mak, em Baibel i no tok.

Lait bilong dispela klaut i mekim na lait i go long olgeta hap bilong Rum Tambu Tru. I gat dispela lait tasol insait long dispela rum. Dispela lait bai helpim hetpris long lukim klia ol samting taim em i go insait long dispela rum tambu tru long Bikpela De Bilong God i Tekewe Sin Bilong Ol Manmeri. Klaut i makim Jehova i stap, na hetpris i sanap long ai bilong em.

Olsem wanem? Dispela lait i makim sampela samting long ol Kristen? Long samting olsem driman, aposel Jon i lukim wanpela taun na “nait bai i no kamap long dispela taun.” Taun hia em Nupela Jerusalem, em i olsem piksa na i makim ol Kristen God i bin makim na ol i kirap bek bilong mekim wok king wantaim Jisas. Dispela “taun” i no kisim lait bilong en long san o long mun. Glori bilong God Jehova i givim lait long dispela oganaisesen, wankain olsem klaut Sekina i bin givim lait long Rum Tambu Tru. Na tu, Pikinini Sipsip, Jisas Krais, em i “lam” bilong taun. Na dispela “taun” i sutim lait bilong spirit i kam daun long ol manmeri bilong olgeta lain em God i kisim bek ol, na dispela lait i soim rot long ol.​—⁠KTH 21:​22-25.

Ol manmeri i lotuim Jehova, ol i save kisim ol gutpela gutpela blesing long em, olsem na ol inap bilip tru olsem Jehova em i gutpela Wasman bilong lukautim ol na em i gutpela Papa i save laikim tru ol.