Yu Ting i Gutpela Yumi Stap Gut Long Narapela?

KARL, mausman bilong wanpela insurens kampani, i tok: “Yu tromoi planti mani tumas long helt insurens.a Sapos yu baim insurens long kampani bilong mi, orait long olgeta mun bai yu inap holim bek 15 yuro​—⁠em i bikpela mani.”

Jens i tok: “Em tru, tasol mi bin baim helt insurens long dispela kampani inap planti yia pinis. Ol i bin helpim gut mi, na mi laik stap gut long ol.”

Karl i bekim tok: “Pasin bilong stap gut long narapela em i wanpela gutpela pasin. Tasol dispela pasin i mekim na yu lusim bikpela mani tumas!”

Tok bilong Karl i stret. Pasin bilong stap gut long narapela inap pulim mani bilong yumi. Na em inap pulim taim na strong bilong yumi tu. Sapos yumi mas lus long ol dispela samting, yu ting pasin bilong stap gut long narapela inap helpim tru yumi?

Planti Man i Litimapim Dispela Pasin, Tasol Ol i No Bihainim

Long ripot bilong wanpela lain (Allensbach Opinion Research Institute) i save skelim tingting bilong ol man, inap olsem 96 pesen bilong ol man long Jemani em ol i bin toktok wantaim ol, ol i ting olsem pasin bilong stap gut long narapela em i wanpela gutpela pasin. Na taim ol i skelim tingting bilong ol yangpela i gat 18 i go inap 24 krismas, ol i kisim save olsem tupela long olgeta 3-pela i litimapim dispela pasin.

Tasol maski planti man i litimapim pasin bilong stap gut long narapela, planti i no save bihainim. Long sampela kantri long Yurop, pasin bilong stap gut long narapela i no save stap namel long ol poroman marit na ol wan wan insait long famili. Na planti taim dispela pasin i no stap namel long ol pren. Bipo, dispela pasin i stap strong namel long ol bos na wokman, na ol kampani na kastama, tasol nau i no olsem. Bilong wanem?

Ating sampela man i bisi tumas na ol i no gat haptaim o strong bilong mekim wok bilong i stap gut long narapela. Na ating sampela i surik long stap gut long narapela, long wanem, sampela em ol i bin bilip tru long ol, ol i no stap gut moa long ol. Na ating sampela i gat laik long bihainim wanpela kain wokabaut we ol i ken kisim ol pren bilong sotpela taim tasol, na bai ol i no gat wok long stap gut long ol.

Tasol maski i gat wanem as, planti man i no save bihainim dispela pasin ol i litimapim. Olsem na i gat sampela askim: Pasin bilong stap gut long narapela inap helpim yumi? Sapos olsem, orait yumi gat wok long stap gut long husat na long wanem rot? Pasin bilong stap gut long narapela bai helpim yumi olsem wanem?

[Futnot]

[Rait long pes 3]

Planti man i litimapim pasin bilong stap gut long narapela, tasol ol i no bihainim