Em i Wanpela God o Wanpela Man?

“MI YET mi lait bilong graun. Man i bihainim mi, em bai i no inap wokabaut long tudak. Nogat. Em bai i gat lait bilong laip.” (Jon 8:12) Jisas Krais i bin mekim dispela tok. Wanpela saveman long taim bilong Jisas i bin raitim tok long em olsem: “Olgeta kain save na tingting hait i pulap long Krais.” (Kolosi 2:⁠3) Na Baibel i tok tu olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:⁠3) Stretpela save long Jisas i bikpela samting bilong inapim yumi long ol samting bilong spirit.

Planti man long olgeta hap ol i bin harim sampela stori long Jisas Krais. Ol samting em i bin mekim i bin stiaim ol man i kam inap long nau. Kalenda em planti lain i save yusim i save kaunim ol yia kirap long yia ol i ting mama i bin karim Jisas. Buk The World Book Encyclopedia i tok: “Bilong makim ol yia paslain long yia mama i karim Jisas, planti lain i save kolim B.C., o paslain long Krais. Na bilong makim ol yia bihain long yia mama i bin karim Jisas, ol i kolim A.D., o anno Domini (long yia bilong Bikpela bilong yumi).”

Tasol ol man i gat kain kain tingting long Jisas em i husat. Sampela i ting em i wanpela man tasol i gat nem tru long ol samting em i bin mekim. Tasol sampela i save lotuim em olsem God i Gat Olgeta Strong. Sampela bilong lotu Hindu i ting Jisas Krais i olsem god Krishna, em wanpela god bilong ol Hindu, na planti man i ting em i wanpela god i gat bodi olsem man. Orait yu ting Jisas em i wanpela man tasol, o em i wanpela man yumi mas lotu long en? Em i husat tru? Em i bilong we? Em i wanem kain man? Nau em i stap we? Olsem yumi bai lukim long stori i kamap bihain long dispela, wanpela buk i gat planti stori bilong Jisas i kamapim stretpela bekim long ol dispela askim.