Sakim Ol Tingting Kranki!
TAIM ol bikpela hevi i painim Jop, tripela pren bilong em Elifas, Bildat, na Sofar i kam lukim em. Ol i kam bilong sori long em na bilong mekim gut bel bilong em. (Jop 2:11) Elifas i gat namba na ating krismas bilong em tu i winim tupela narapela. Em i namba wan man long toktok na em i mekim planti tok, winim tupela. Elifas i kamapim wanem kain tingting long tripela tok em i bin mekim?
Elifas i tingim wanpela narakain samting i bin painim em, na em i tok: “Wanpela liklik win i kam na winim pes bilong mi. Na mi pret moa yet na gras long bodi bilong mi i sanap. Mi lukim wanpela samting i sanap, na mi lukluk strong, tasol mi no inap save em i wanem samting. Na tu, mi no harim wanpela nois o pairap. Tasol bihain mi harim wanpela maus i tok.” (Jop 4:15, 16) Wanem kain win o spirit i bin stiaim tingting bilong Elifas? Tok em i mekim bihain long dispela i soim olsem dispela spirit i no wanpela bilong ol stretpela ensel bilong God. (Jop 4:17, 18) Em i wanpela spirit nogut. Yumi ken save long dispela, long wanem, Jehova i bin stretim Elifas na tupela pren bilong em long ol i bin tok giaman. (Jop 42:7) Yes, wanpela spirit nogut i stiaim Elifas. Tok bilong em i kamapim olsem em i no gat stretpela tingting.
Ol tok bilong Elifas i kamapim wanem ol tingting? Bilong wanem em i bikpela samting long yumi mas sakim ol tingting kranki? Na yumi ken mekim wanem bilong mekim olsem?
“God i Save Lukim Sampela Pasin Bilong Ol Ensel i No Stret”
Long olgeta tripela tok Elifas i mekim, em i kamapim tingting olsem God i laik bai olgeta samting i mas stret tasol, olsem na ol samting ol wokboi bilong em i mekim i no gutpela inap long em i ken amamas long en. Elifas i tokim Jop: “God i save lukim sampela pasin bilong ol ensel i no stret.” (Jop 4:18) Bihain Elifas i tok long God olsem: “Ol ensel i winim yumi man, tasol God i save lukim sampela pasin bilong ol i no stret. Na ol samting bilong heven tu i no klin long ai bilong en.” (Jop 15:15) Na em i askim olsem: “Yu ting stretpela pasin bilong yu bai i helpim God I Gat Olgeta Strong long mekim wok bilong en, a?” (Jop 22:3) Bildat i wanbel long dispela tok, em i tok: “Yumi save lukim lait bilong mun i bikpela, tasol long God, em i liklik tru, na ol sta tu i no klin long ai bilong en.”—Jop 25:5.
Yumi mas was gut, nogut kain tingting olsem i stiaim yumi. Em inap kirapim yumi long ting olsem ol samting God i laik bai yumi mas mekim i antap tumas. Dispela tingting inap bagarapim pasin bilong yumi long pas gut wantaim Jehova. Na tu, sapos yumi kisim dispela kain tingting, bai yumi mekim wanem taim wanpela i stretim yumi? Ating bai yumi no daunim yumi yet na harim tok bilong stretim yumi, nogat, ating bel bilong yumi bai ‘kros long God,’ na yumi bel nogut long em. (Sindaun 19:3) Dispela inap bagarapim yumi tru long sait bilong spirit!
“Ating Yumi Man Nating Inap Mekim Ol Samting Bilong Helpim God, A?”
Dispela tingting olsem God i laik bai olgeta samting i mas stret tasol i wankain tingting olsem God i ting ol man i no inap mekim wanpela gutpela wok. Namba tri tok bilong Elifas i gat dispela askim: “Ating yumi man nating inap mekim ol samting bilong helpim God, a? Nogat tru. Ol saveman tu i no inap. Ol inap helpim ol yet tasol.” (Jop 22:2) Elifas i laik tok olsem man i no inap mekim wanpela samting bilong helpim wok bilong God. Bildat tu i tok: “Olsem wanem na bai yumi man bilong graun inap long kamap stretpela na klin long ai bilong God?” (Jop 25:4) Sapos man i gat kain tingting olsem, olsem wanem Jop—wanpela man bilong graun tasol—inap ting em i stap stret long ai bilong God?
Sampela man long nau i tingting nogut long ol yet. Ol samting inap kirapim ol man long kisim dispela kain tingting i olsem: Pasin bilong famili ol i go bikpela long en, ol hevi bilong laip, o pasin birua ol man i bin mekim long ol, long wanem, ol i bilong narapela skin o lain. Tasol Satan na ol spirit nogut tu i amamas long daunim man. Sapos ol inap kirapim man long ting olsem ol samting em i mekim i no gutpela inap God i Gat Olgeta Strong i ken amamas long en, orait em bai isi moa long man i stap bel hevi. Isi isi kain man olsem inap i go longwe long God i gat laip.—Hibru 2:1; 3:12.
Taim yumi go lapun na kisim sik, dispela i mekim na yumi no inap mekim bikpela wok tumas. Ating wok yumi mekim bilong autim tok bilong Kingdom i liklik tasol taim yumi skelim wantaim wok yumi bin mekim taim yumi yangpela, na taim yumi gat gutpela helt na bikpela strong moa. Em i bikpela samting long save olsem Satan na ol spirit nogut i laik bai yumi ting olsem wok yumi mekim i no gutpela inap God i ken amamas long en! Yumi mas sakim kain tingting olsem.
Rot Bilong Sakim Ol Tingting Kranki
Maski Jop i kisim planti hevi long Satan, Jop i tok: “I go inap long taim mi dai mi no ken lusim stretpela pasin bilong mi!” (Jop 27:5, NW ) Jop i laikim tru God, olsem na em i strong long stap gut long God maski wanem samting i kamap, na em i no larim wanpela samting i senisim dispela. Em rot bilong sakim ol tingting kranki. Yumi mas kisim gutpela save long pasin laikim bilong God na kisim pasin bilong amamas tru long en. Na tu, yumi mas strongim pasin bilong yumi long laikim God. Yumi ken mekim olsem long rot bilong stadi oltaim long Baibel na beten na tingim tingim long bel ol samting yumi lainim.
Olsem: Jon 3:16 i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol.” Jehova i laikim tru ol manmeri, na ol samting em i bin mekim long ol manmeri i kamapim klia dispela pasin laikim. Pasin bilong tingim tingim long bel ol samting Jehova i bin mekim long bipo i strongim pasin bilong yumi long amamas long Jehova na laikim em, na dispela bai helpim yumi long sakim ol tingting kranki.
Tingim pasin Jehova i bin mekim long Abraham taim Sodom na Gomora i laik bagarap. Inap 8-pela taim Abraham i toktok long Jehova long bagarap Em i laik kamapim. I no gat wanpela taim Jehova i soim olsem em i les o kros long dispela tok. Nogat. Ol tok bilong em i mekim gut bel bilong Abraham. (Stat 18:22-33) Bihain taim God i helpim Lot na famili bilong em long ranawe long Sodom, Lot i tok em i laik ranawe i go long wanpela taun i stap klostu, em i no laik go long ol maunten. Jehova i tok: “Em i orait. Bai mi no bagarapim dispela taun.” (Stat 19:18-22) Olsem wanem? Ol dispela stori i kamapim olsem Jehova i wanpela King i gat hatpela pasin na i no gat pasin laikim? Nogat. Ol dispela stori i soim pasin tru bilong em—em i King i gat pasin laikim, pasin marimari, em i mekim gut long ol man, na i pilim tingting bilong ol.
Stori bilong Aron, Devit, na Manase bilong lain Israel bilong bipo i kamapim klia olsem God i no man bilong sutim tok long narapela na em i save amamas long ol man. Aron i bin mekim tripela bikpela rong. Em i wokim bulmakau gol, em na susa bilong em Miriam i sutim tok long Moses, na em i no givim biknem long God long Meriba. Tasol Jehova i lukim ol gutpela pasin bilong Aron na i larim em i stap olsem hetpris i go inap long taim em i dai.—Kisim Bek 32:3, 4; Namba 12:1, 2; 20:9-13.
King Devit i bin mekim ol bikpela rong taim em i stap king. Em i mekim pasin pamuk, em i wokim rot bilong ol man i ken kilim i dai man i no gat asua, na em i wokim sensas i no stret long em i mekim. Tasol Jehova i luksave long Devit i tanim bel, olsem na Jehova i stap gut long kontrak bilong Kingdom em i bin mekim na larim Devit i mekim wok king i go inap long em i dai.—2 Samuel 12:9; 1 Stori 21:1-7.
King Manase bilong Judia i sanapim ol alta bilong Bal, kukim ol pikinini man bilong em long paia olsem ofa, strongim ol man long mekim wok bilong ol spirit nogut, na sanapim ol alta bilong lotu giaman insait long banis bilong tempel. Tasol taim em i tanim bel tru, Jehova i lusim rong bilong em, na larim em i lusim kalabus, na Manase i kisim bek wok king bilong em. (2 Stori 33:1-13) Yu ting dispela em i pasin bilong God i ting i no gat wanpela man i gutpela inap long God i ken orait long em? Nogat tru!
Man i Sutim Tok i Gat Asua
Yumi no ken kirap nogut olsem ol dispela pasin Satan i tok Jehova i gat, em ol pasin tru bilong Satan yet. Satan i gat hatpela pasin na em i strong long ol man i mas bihainim stret tok bilong em. Dispela samting i kamap ples klia long pasin bilong lotu giaman long bipo long kukim ol pikinini long paia olsem ofa. Ol Israel i tromoi pinis lotu i tru ol i kukim pikinini man na pikinini meri bilong ol long paia—em samting Jehova i no bin tingting liklik long en.—Jeremaia 7:31.
Jehova i no man bilong sutim tok long ol narapela, nogat, Satan em i dispela kain man. Kamapim Tok Hait 12:10 i tok Satan em i “dispela man bilong kotim ol brata bilong yumi, em i bin kotim ol long ai bilong God bilong yumi long san na long nait.” Tasol man bilong raitim song i tok long Jehova olsem: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela.”—Song 130:3, 4.
Taim Ol Tingting Kranki i Pinis
Ol ensel i mas amamas tru taim Satan na ol spirit nogut i raus long heven! (KTH 12:7-9) Bihain long dispela, ol spirit nogut i no inap mekim wok moa insait long lain ensel bilong Jehova long heven.—Daniel 10:13.
Klostu nau ol manmeri bilong graun bai amamas. I no longtaim na wanpela ensel bai lusim heven na i kam daun wantaim ki bilong hul i no gat as na bikpela sen. Em bai kalabusim Satan na ol spirit nogut na tromoi ol i go long hul i no gat as na bai ol i no inap mekim wanpela samting. (KTH 20:1-3) Bai yumi amamas tru taim dispela samting i kamap!
Taim dispela samting i no kamap yet, yumi mas sakim pasin bilong tingting kranki. Taim ol tingting kranki o ol tingting i no stret i wok long kamap, yumi mas sakim ol long rot bilong tingting long pasin laikim bilong Jehova. Taim yumi mekim olsem ‘bel isi God i save givim yumi, em bai mekim na bel na tingting bilong yumi bai i stap gut tru.’—Filipai 4:6, 7.
[Piksa long pes 26]
Jop i sakim ol tingting kranki
[Piksa long pes 28]
Lot i kisim save olsem Jehova em i King i save pilim tingting bilong man