Yu Ting Satan i Stap Tru?

YU GAT wanem kain tingting long Satan? Yu ting em i wanpela man i stap tru tru na em i save traim ol man bilong kirapim ol long mekim ol pasin nogut? O yu ting em i makim pasin nogut? Yu ting Satan em i wanpela man yumi mas pret long en, o yumi mas ting em i wanpela bilip nating tasol bilong ol tumbuna? Yu ting dispela tok “Satan” i makim wanpela strong bilong bagarapim ol samting? O yu ting dispela tok i makim tasol ol pasin nogut i stap long bel bilong ol man, olsem planti tisa bilong lotu long nau i save tok?

Yumi no kirap nogut long save olsem, ol man i gat kain kain tingting long dispela askim olsem Satan em i husat tru. Long wanem, sapos wanpela man i gat save tru long trikim ol man na bai ol i no ken save em i husat tru, orait bai yumi hatwok tru long luksave long em, a? Na bai yumi hatwok moa yet sapos dispela man i strong long i stap olsem na i no laik kamap ples klia bambai ol man inap luksave long em. Baibel i tok dispela em i pasin bilong Satan. Baibel i stori long em olsem: “Satan yet i save senisim pasin bilong en na kamap olsem ensel bilong lait.” (2 Korin 11:14) Satan em i man nogut tru, tasol em i mekim olsem em i gat gutpela pasin na bai em i ken giamanim ol man. Na sapos em inap giamanim ol man long bilip olsem em i no stap tru, em i amamas, long wanem, em i laik bai ol i bilip olsem.

Orait Satan em i husat tru? Em i bin kamap long wanem taim? Na em i bin kamap olsem wanem? Olsem wanem em i save stiaim tingting bilong ol man long nau? Yumi inap mekim wanpela samting bilong sakim em na em i no ken paulim yumi? Baibel i kamapim stori tru bilong Satan kirap long taim em i bin kamap nupela yet na i kam inap nau, na Baibel i kamapim ol bekim stret bilong ol dispela askim.

[Piksa long pes 3]

Bai yumi hatwok tru long luksave long wanpela man sapos em i strong long mekim olsem em i narapela man