“Jehova Em i Helpim Bilong Mi”

Jehova i Save Blesim Ol Man i Daunim Laik Bilong Ol Yet

SKELIM 3-pela stori em wanpela samting long ol i wankain: Wanpela man i ron long baiskol long bikbus bilong Kamarun. Inap planti aua em i raun long ol rot em wara na graun malumalum i pulap long en, tasol em i go yet bambai em i ken strongim ol narapela. Long Simbabwe, tupela brata i wokabaut inap 15 kilomita bilong i go skulim ol manmeri long wanpela ples i stap longwe. Ol i mas brukim ol wara i tait, olsem na ol i karim ol klos na su long het bilong ol na bai i no ken wet. Long narapela hap, wanpela meri i kirap long bikmoning long 4 klok bilong i go mekim stadi wantaim wanpela nes husat inap lusim wanpela aua tasol bilong mekim stadi.

Orait, wanem samting long dispela 3-pela stori i wankain? Olgeta dispela lain ol i Witnes Bilong Jehova na ol i insait long wok fultaim bilong skulim ol man long tok i tru bilong Baibel. Ol lain i insait long dispela wok em ol painia oltaim, painia salim, ol misineri, ol wasman raun na meri bilong ol, na planti tausen bratasista i mekim wok volantia long ol haus Betel long olgeta hap bilong graun. Samting i stap olsem mak bilong dispela lain, em pasin bilong daunim laik bilong ol yet.a

Stretpela Tingting

Ol Witnes Bilong Jehova i bihainim tok aposel Pol i mekim long Timoti: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” (2 Timoti 2:15) Tasol wanem samting i kirapim planti handet tausen Witnes Bilong Jehova long mekim wok bilong God fultaim?

Taim ol narapela i askim ol long wanem samting i kirapim ol long wok strong long mekim wok bilong Jehova, ol i save tok pasin bilong laikim tru God na laikim tru ol narapela olsem wanpela bilong ol samting i kirapim ol. (Matyu 22:​37-39) I stret long ol i bekim olsem, long wanem, sapos pasin laikim i no stap olsem samting i kirapim ol, orait olgeta wok ol i mekim bai i no inap helpim ol liklik.​—⁠1 Korin 13:​1-3.

Ol i Daunim Laik Bilong Ol Yet

Olgeta Kristen em ol i dediket pinis, ol i bin orait long singaut bilong Jisas olsem: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” (Matyu 16:24) Pasin bilong daunim yumi yet i makim olsem yumi orait long God Jehova na Jisas Krais i stiaim yumi. Dispela i bin kirapim planti man long daunim laik bilong ol yet na mekim wok bilong God fultaim.

Planti Witnes i save wok strong tru bilong mekim bikpela wok moa bilong Jehova. Tingim Júlia, em wanpela sista i gat 56 krismas, na em i mekim wok painia oltaim long São Paulo, Brasil. Em i tok: “Wanpela brata bilong Saina i ringim mi na askim sapos mi laik lainim tok ples Saina. Krismas bilong mi i mekim na mi no bin tingting long lainim wanpela nupela tok ples. Mi larim sampela de i lus, na bihain mi orait long lainim dispela tok ples. Long nau, mi inap autim tok long tok ples Saina.”

Ripot i kam long brens ofis bilong ol Witnes Bilong Jehova long Peru, i tok: “Long nau, planti handet painia oltaim i go long ol teritori i stap longwe, na long dispela rot ol i kamapim olsem ol i gat strongpela bel na ol i daunim laik bilong ol yet. Ol i go sindaun long ol taun we i no gat ol samting bilong helpim sindaun bilong ol man, na i no gat planti wok mani. Ol dispela bratasista i redi long mekim wanem wanem samting ol inap mekim na bai ol i ken mekim yet wok bilong ol. Tasol bikpela samting moa yet em olsem, wok bilong ol long autim tok i wok long karim planti kaikai. Ol wasman raun i toksave olsem ol dispela painia i helpim wok bilong kamapim ol nupela grup.”

Sampela Kristen i bin redi long lusim laip bilong ol yet bambai ol inap helpim ol wanbilip. (Rom 16:​3, 4) Wanpela wasman sekit long wanpela hap bilong Afrika we pait i kamap long en, em i tok: “Paslain long mitupela meri bilong mi i kamap long laspela rotblok namel long hap ol ami i bosim na hap em gavman i bosim, 4-pela komanda bilong ami na ol bodi gad bilong ol i kam banisim mipela, na askim long mipela i husat. Taim ol i sekim ol ID kat bilong mipela, ol i lukim olsem mipela i kam long hap em gavman i bosim, olsem na ol i saspek long mipela. Ol i sutim tok olsem mi man bilong lukstil. Olsem na ol i laik tromoi mi go daun long wanpela hul long graun. Tasol mi stori gut long ol long mipela i husat, na bihain ol i larim mipela i go.” Ol bratasista i pilim tru pasin bilong dispela tupela marit long daunim laik bilong ol yet na i go lukim ol!

Maski ol i save bungim ol hevi, namba bilong ol bratasista i mekim wok bilong God fultaim i wok long i go bikpela long olgeta hap bilong graun. (Aisaia 6:⁠8) Ol dispela bratasista i tingim tru gutpela samting ol i holim long ol inap mekim wok bilong Jehova. Long nau, planti milion manmeri i bihainim wankain pasin bilong daunim laik bilong ol yet, na ol i givim biknem long Jehova. Taim ol i mekim olsem, Jehova i save givim planti blesing long ol. (Sindaun 10:22) Ol dispela bratasista i bilip tru olsem Jehova bai wok yet long blesim na helpim ol, na ol i kamapim wankain tingting olsem man bilong raitim song, em i tok: “Jehova em i helpim bilong mi.”​—⁠Song 121:​2, NW.

[Futnot]

[Rait long pes 9]

“Taim yu laik pait long ol birua ol manmeri bilong yu bai i go wantaim yu na helpim yu.”​—⁠SONG 110:3

[Blok long pes 8]

JEHOVA I TINGIM TRU OL WOKMAN BILONG EM

“Yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.”​—⁠1 Korin 15:⁠58.

“God em i no man nogut, na bai em i lusim tingting long ol gutpela wok yupela i bin mekim.”​—⁠Hibru 6:⁠10.