Ol Samting i Kamapim Pasin Laikim, Bilip, na Pasin Bilong Bihainim Tok

LONG moningtaim long Me 16, 2005, san i lait na i gat gutpela kol win long Watchtower Farms long Wallkill, New York. Ren i bin pundaun paslain long tulait i bruk olsem na taim san i holim ol plaua na gras, ol i lait gut tru. Mama pato wantaim 8-pela pikinini bilong em i swim long arere bilong liklik raunwara. Ol visita i amamas long lukim ol dispela samting. Ol i toktok isi isi, i olsem ol i no laik bagarapim dispela gutpela moning.

Ol dispela visita em ol Witnes Bilong Jehova, ol i kam long 48 kantri. Tasol ol i no kam bilong lukim dispela naispela ples, nogat. Ol i kam bilong lukim samting i kamap insait long wanpela traipela haus ol i wokim long retpela brik long Wallkill. Em wanpela nupela haus long Betel long Amerika. Insait long dispela traipela haus, ol visita i amamas, tasol bikpela amamas bilong ol em long lukim ol wok i kamap insait long en.

Ol visita i sanap long veranda long namba tu plua bilong dispela haus na ol i lukluk i go daun na lukim planti masin i stap. I gat 5-pela bikpela masin bilong prinim ol buk na magasin i stap long simen plua em ol i bin polisim gut. Longpela na braitpela bilong dispela plua i olsem sais bilong 9-pela ragbi fil em ol i bungim wantaim. Long dispela hap ol i prinim ol Baibel, buk, na magasin. Ol traipela rol pepa, em hevi bilong wan wan em 1,700 kilogram, i tanim tanim spit tru, olsem wil bilong wanpela ka i givim siksti tru. Longpela bilong pepa long wan wan rol em 23 kilomita, na insait long 25 minit tasol pepa olgeta i go insait long masin na i kam ausait. Insait long dispela 25 minit, masin i putim ing long pepa, draim na mekim pepa i kol na bai i isi long foldim. Wanpela samting i ron spit tru long antap i kisim ol magasin i go long hap bilong putim long ol bokis bilong salim long ol kongrigesen. Ol narapela masin i wok long prinim ol wan wan bikpela hap pepa em masin bai foldim foldim na mekim i kamap wanpela buk, na ol i putim ol long kabot long hap bilong putim ol buk samting. Longpela bilong ol kabot i kirap long plua i go inap long rup. Bihain, masin bai salim ol dispela bikpela pepa ol i bin foldim pinis, long ples bilong wokim ol buk. Kompiuta i stiaim olgeta wok masin i mekim.

Ol visita i lusim hap bilong prinim ol buk na magasin samting, na ol i go long hap bilong wokim ol buk. Long dispela hap, ol masin i wokim olsem 50,000 strongpela karamap bilong ol buk na ol naispela (deluxe) Baibel long olgeta wan wan de. Bilong wokim wanpela buk, masin i bungim gut olgeta wan wan traipela pepa em masin i bin prinim na foldim foldim pinis, na nau masin i katim ol arere bilong pepa na i putim karamap bilong buk long en. Masin i putim ol dispela buk em i wokim pinis i go long ol katon. Na i pasim katon, putim nem long en, na putim ol katon long palet. Na tu, long wan wan de narapela masin i bungim winim 100,000 buk i no gat strongpela karamap na putim long bokis. Dispela masin tu i gat planti moto, samting bilong karim ol buk na nius i go, ol gia, wil, na belt​—⁠ol i spit tru long wokim ol buk na nius bilong Baibel.

Ol dispela masin i wok olsem wanpela gutpela hanwas, em i nambawan gutpela masin ol man i bin wokim long taim bilong yumi. Olsem yumi bai skelim, em i wanpela samting i soim klia pasin laikim, bilip na pasin bilong bihainim tok em lain bilong God i kamapim. Tasol bilong wanem ol i surikim wok bilong prinim na wokim ol buk samting long Brooklyn, New York i go long Wallkill?

Wanpela bikpela as, em ol i laik bai wok bilong prinim na salim ol buk na magasin i ken kamap long wanpela hap tasol na bai i isi moa long ol brata. Inap planti yia ol i wokim ol buk long Brooklyn na salim, na ol i prinim ol magasin long Wallkill na salim. Ol i bungim dispela tupela wok long wanpela hap bambai ol i no ken i gat planti wokman na ol i ken yusim gut ol kontribiusen ol bratasista i givim bilong helpim wok bilong God. Na tu, masin bilong prinim ol buk na nius long Brooklyn i go olpela, olsem na ol i baim tupela nupela masin (MAN Roland Lithoman) long Jemani. Dispela tupela traipela masin i no inap fit insait long haus bilong prinim ol buk long Brooklyn.

Jehova i Helpim Wok

Wok bilong prinim ol buk na magasin em i stap olsem rot bilong helpim wok bilong autim gutnius bilong Kingdom Bilong God i go bikpela. Kirap long taim wok bilong prinim ol buk i stat, ol samting i soim olsem Jehova i bin blesim dispela wok. Kirap long 1879 i go 1922, ol brata i baim ol kampani bilong ausait long prinim ol buk bilong yumi. Long 1922, ol brata i rentim wanpela haus i gat sikspela plua long 18 Concord Street, Brooklyn na ol i baim ol masin bilong prinim ol buk. Long dispela taim sampela i gat tupela tingting long ol brata inap mekim gut dispela wok o nogat.

Wanpela man olsem em bikpela bos bilong kampani em bipo i save prinim ol buk bilong yumi. Taim em i go lukim wok long Concord Street, em i tok: “Yupela i gat nambawan masin tru bilong prinim buk, tasol i no gat wanpela i stap hia i gat save long yusim. Insait long 6-pela mun dispela masin bai bagarap, na bai yupela i save olsem lain stret bilong dispela wok, em dispela lain i save prinim ol buk bilong yupela. Wok bilong prinim ol buk em wok stret bilong ol.”

Robert J. Martin, em wasman bilong prinim ol buk long dispela taim i bin tok: “Tok bilong bosman ya i stret, tasol wanpela samting em i lusim tingting long en, em Bikpela, Bikpela i save stap wantaim mipela long olgeta taim. . . . I no longtaim mipela i kirap long wokim ol buk.” Insait long 80 yia samting, ol Witnes Bilong Jehova i prinim planti bilion nius long masin bilong ol yet.

Long Oktoba 5, 2002, long miting bilong Sosaiti Was Taua Bilong Pennsylvania i save kamap long olgeta yia, ol i toksave olsem Gavening Bodi i tok orait long ol bai surikim wok bilong prinim ol buk na nius long brens long Brooklyn i go long Wallkill. Ol i putim oda long tupela nupela masin, na bai ol i kisim ol dispela masin long Februeri 2004. Ol brata i mas wokim gut plen bilong wokim wanpela traipela haus i gat bikpela spes bilong putim tupela nupela masin na ol i mas pinisim dispela haus insait long 15 mun. Na bihain long en, insait long 9-pela mun, ol i mas stretim wok bilong prinim na salim ol buk na nius. Ating sampela i gat tupela tingting taim ol i harim olsem dispela bikpela wok i mas pinis insait long sotpela haptaim tasol. Tasol ol brata i save olsem Jehova bai blesim dispela wok, na mekim i kamap gut.

“Amamas Long Wok Bung Wantaim”

Ol i save olsem lain bilong Jehova bai amamas long givim helpim, olsem na ol i kirapim dispela wok. (Song 110:⁠3) Wok i bikpela tru olsem na ol i mas kisim planti moa wokman bilong helpim ol brata bilong wokim haus Betel. Winim 1,000 brata na sista long Yunaitet Stets na Kanada em ol i gat sampela save long wok konstraksen, ol i volantia long mekim wok wanpela wik i go 3-pela mun. Ol i singautim ol narapela intenesenel sevan na volantia long insait long dispela wok. Komiti Bilong Wokim Ol Haus Kingdom i givim bikpela helpim tu.

Planti bilong ol dispela bratasista i volantia, ol i mas lusim wok mani bilong ol na tromoi bikpela mani long i kam helpim wok. Tasol ol i amamas long mekim olsem. Rot i op long famili Betel i insait long dispela wok na givim helpim, ol i lukautim ol dispela volantia long ples slip na kaikai. Maski ol bratasista long Betel i save wok Mande i go Fraide long Betel, winim 535 long Brooklyn, Patterson, na Wallkill i bin volantia long helpim wok long ol Sarere tu. Lain bilong Jehova i givim bikpela helpim, long wanem, Jehova i sambai long dispela wok.

Ol narapela i givim mani bilong helpim dispela wok. Olsem: Ol brata i kisim wanpela pas long Abby, liklik gel i gat 9-pela krismas. Em i tok: “Mi amamas long wok yupela i mekim bilong wokim planti gutpela buk. Klostu nau, ating bai mi kam visitim yupela. Dedi bilong mi i tok mipela bai kam neks yia! Bai mi pasim wanpela liklik kat samting na bai yupela i ken luksave long mi. Mi givim 20 dola long helpim wok bilong nupela masin! Em liklik toea bilong mi, tasol mi laik givim long yupela ol brata.”

Wanpela sista i tok: “Plis kisim ol hat mi bin wokim, em liklik presen tasol. Mi laik yupela i givim long ol wokman i mekim wok long Wallkill. Lain bilong wokim ol kalenda samting i tok em bai taim bilong bikpela kol. Ol i tok tru o nogat, em mi no save. Tasol mi save olsem ol bratasista bilong mi long Wallkill bai mekim bikpela wok ausait, olsem na mi laik ol i putim hat na karamapim het bilong ol long kol. Mi no gat save long wokim haus, tasol mi save long wokim ol samting long wul, olsem na mi mekim wok long dispela save bilong helpim dispela wok.” Em i salim 106 hat wantaim pas bilong em!

Ol i pinisim wok bilong sanapim haus bilong putim ol masin long taim stret em ol i bin makim. John Larson, wasman bilong dipatmen bilong prinim ol buk na nius i tok: “I gat pasin bilong amamas long wok bung wantaim. Jehova i bin blesim dispela wok. Ol wok i pinis hariap. Mi tingim dispela de long Me 2003, mi sanap long graun malumalum na lukim ol brata i wokim as bilong dispela haus. Sampela mun bihain, mi bin sanap long wankain hap long lukim ol masin bilong prinim buk na nius i wok i stap.”

Program Bilong Dedikesen

Long Mande, Me 16, 2005, long Wallkill, ol i dediketim nupela haus bilong prinim ol buk na nius, wantaim 3-pela bikpela haus slip. Ol haus Betel long Patterson, Brooklyn, na Kanada, i lukim bung bilong dedikesen long rot bilong vidio. Inap 6,049 i go long dispela bung. Theodore Jaracz, wanpela bilong Gavening Bodi Bilong Ol Witnes Bilong Jehova, i stap olsem siaman na em i stori liklik long wok bilong prinim ol buk na nius i bin kirap olsem wanem. Long rot bilong ol inteviu na vidio, tupela brata long Brens Komiti, John Larson na John Kikot i stori gen long wok bilong sanapim dispela haus na wok bilong prinim ol buk i bin kirap olsem wanem long Yunaitet Stets. John Barr, brata long Gavening Bodi i givim laspela tok bilong dediketim dispela nupela haus na 3-pela bikpela haus slip long God Jehova.

Long wik bihain, rot i op long ol bratasista long Betel long Patterson na Brooklyn long visitim ol dispela nupela haus. Inap 5,920 i visitim ol dispela haus.

Yumi Gat Wanem Tingting Long Masin Bilong Prinim Ol Buk?

Long tok bilong dedikesen, Brata Barr i kirapim lain i harim tok bilong em long tingim olsem, maski dispela masin i nambawan gutpela masin, dispela em i no bikpela samting. Bikpela samting em ol manmeri. Ol buk na nius yumi prinim i save mekim bikpela samting long laip bilong ol man.

Wan wan masin i ken prinim wan milion liklik nius insait long wanpela aua samting! Tasol wanpela liklik nius inap mekim bikpela wok long laip bilong man. Olsem: Long 1921, sampela man long Afrika i wok long stretim rot bilong tren. Wanpela bilong ol, em Christiaan, i lukim wanpela hap pepa i pas aninit long ain bilong rot bilong tren. Em wanpela liklik nius bilong yumi. Christiaan i gat laik tru long save na em i ritim gut dispela nius. Em i amamas tru na ron i go long man bilong pikinini meri bilong em na tok: “Nau tasol, mi painim tok i tru!” I no longtaim bihain, tupela i raitim pas bilong kisim sampela save moa. Brens long Saut Afrika i salim sampela Baibel nius moa. Tupela i bin stadi, kisim baptais, na ol i bin helpim ol narapela long save long tok i tru bilong Baibel. Long dispela rot, planti i kisim tok i tru. Olsem na long 1992 samting, winim wan handet long famili bilong tupela ol i kamap Witnes Bilong Jehova. Dispela samting i kamap, long wanem, wanpela man i bin painim wanpela liklik nius i stap long rot bilong tren!

Brata Barr i tok, ol buk na nius yumi prinim i save helpim ol man i kam insait long tok i tru, stap insait long tok i tru, na i kirapim ol long wok strong, na dispela i mekim na ol i stap olsem brata brata. Na bikpela samting moa, ol nius yumi tilim i litimapim nem bilong God bilong yumi Jehova!

Tingting Bilong Jehova Long Dispela Masin

Na tu, Brata Barr i tokim ol odiens long skelim, Jehova i gat wanem tingting long dispela masin. I no olsem Jehova i mas mekim wok long rot bilong dispela masin tasol, nogat. Em inap mekim ol ston i autim gutnius! (Luk 19:40) Na tu, sais bilong masin, spit bilong en, na ol kain kain wok bilong masin i no bikpela samting long em. Tingim! Jehova i bin wokim heven na graun! (Song 147:​10, 11) Jehova i save long kain kain gutpela rot tru bilong wokim ol buk na nius​—⁠em ol rot ol man i no inap save long en. Olsem na wanem samting i mekim Jehova i amamas? Insait long dispela haus bilong prinim ol buk samting, em i lukim ol gutpela pasin bilong lain bilong em​—⁠pasin laikim, bilip, na pasin bilong ol long bihainim tok.

Brata Barr i mekim wanpela tok piksa bilong soim olsem wanem pasin laikim i insait long dispela wok. Olsem: Wanpela liklik meri i wokim kek bilong papamama bilong em. Papamama bai amamas. Maski kek i kamap gutpela o nogat, samting i mekim papamama i amamas, em pasin laikim pikinini i soim long tupela taim em i wokim dispela kek. Na i wankain tu, Jehova i no lukim tasol ol dispela masin na haus. Namba wan samting em i lukim, em pasin bilong lain bilong em long givim bel bilong ol long em.​—⁠Hibru 6:⁠10.

Na tu, sip bilong Noa i kamapim bilip bilong em, olsem tasol taim Jehova i lukim dispela masin, dispela i kamapim bilip bilong yumi. Bilip bilong yumi long wanem samting? Noa i bin bilip olsem, samting Jehova i bin tok profet long en, bai kamap tru. Yumi tu i bilip olsem yumi stap long taim bilong las de, olsem na tok bilong gutnius em bikpela tok yumi mas autim long olgeta hap bilong graun, na em i bikpela samting ol man i mas harim. Yumi save tok bilong Baibel bai helpim ol man long kisim laip.​—⁠Rom 10:​13, 14.

Taim Jehova i lukim dispela masin, dispela i kamapim pasin bilong yumi long bihainim tok bilong em. Yumi save pinis, em i laik bilong God olsem gutnius i mas i go long olgeta hap bilong graun paslain long pinis i kamap. (Matyu 24:14) Dispela masin wantaim ol masin bilong prinim buk i stap long ol narapela hap bilong graun, bai mekim bikpela wok long inapim tru dispela wok bilong autim gutnius.

Tru tumas, ol kontribiusen, wok konstraksen, na wok bilong prinim ol buk na nius samting i soim klia, pasin laikim, bilip, na pasin bilong bihainim tok​—⁠na tu, ol dispela pasin i kamap ples klia taim lain bilong Jehova long olgeta hap i givim bel long autim yet tok i tru long ol man husat i laik harim tok.

[Blok/Ol Piksa long pes 11]

WOK BILONG PRINIM OL BUK I GO BIKPELA

1920: Ol magasin ol i prinim long namba wan masin, long 35 Myrtle Avenue, Brooklyn.

1922: Kisim wok bilong prinim nius i go long wanpela haus i gat 6-pela plua long 18 Concord Street. Kirap prinim ol buk.

1927: Kisim wok bilong prinim nius i go long nupela haus ol i sanapim long 117 Adams Street.

1949: Skruim haus i go bikpela. Sanapim wanpela haus i gat 9-pela plua.

1956: Wok i go bikpela long Adams Street. Sanapim nupela haus long 77 Sands Street.

1967: Sanapim haus i gat 10-pela plua i gat masin bilong toktok, em i bikpela moa long namba wan haus.

1973: Ol i sanapim narapela haus long Wallkill. Namba wan wok bilong en em bilong prinim ol magasin.

2004: Ol i bungim olgeta wok, wok bilong prinim, putim karamap long ol buk, na salim ol buk, long Wallkill.