Brooklyn Betel—100 Yia Bilong En
YIA 1909 em wanpela bikpela yia long New York City. Ol i kirap mekim wok long Queensboro Bridge, em bris i bungim 2-pela hap bilong taun, Queens na Manhattan, na ol i kirap mekim wok long Manhattan Bridge, em bris i bungim Manhatten na Brooklyn.
Na tu, em wanpela bikpela yia long ol Witnes Bilong Jehova. Paslain long dispela, Charles Taze Russell, presiden bilong Watch Tower Bible and Tract Society, em koporesen ol Witnes Bilong Jehova i bin yusim bilong mekim wok, em i lukim olsem i gat rot bilong mekim wok bilong autim gutnius bilong Kingdom Bilong God i go bikpela. (Matyu 24:14) Em i ting, sapos ol i kisim hetkota bilong Sosaiti i stap long Pittsburgh, Pennsylvania, na bringim i kam long Brooklyn, New York, dispela bai helpim tru dispela wok. Long 1908 ol i kirap redim ol samting bilong muv, na ol i muv long kirap bilong yia bihain.
Bilong Wanem Ol i Muv i Kam Long Brooklyn?
Ol man i go pas long wok bilong autim tok long dispela taim ol i save olsem sapos ol i prinim ol tok bilong Baibel long ol niuspepa, dispela bai helpim tru wok bilong autim tok i tru bilong Baibel. Long yia 1908, ol tok bilong Baibel em Russell i kamapim long olgeta wik ol i stap long 11-pela niuspepa. Ol i save prinim 402,000 kopi bilong ol dispela niuspepa.
Tasol Russell i tok: “Ol brata husat i gat save long wok bilong niuspepa . . . ol i tokim mipela olsem sapos ol tok bilong Baibel mipela i save raitim long olgeta wik i kam long wanpela [bikpela taun] ating dispela bai mekim na ol dispela tok bai kamap long olgeta hap bilong Amerika; insait long wanpela yia planti handet niuspepa inap kamapim ol tok long olgeta taim.” Olsem na ol i wok long painim gutpela ples tru bilong mekim wok bilong autim tok i go bikpela.
Bilong wanem ol i makim Brooklyn? Russell i tok: “Bihain long mipela i beten askim God long stiaim mipela, mipela olgeta i ting olsem Brooklyn, New York, we i gat planti manmeri i sindaun long en . . . na i gat nem olsem ‘Taun Bilong Ol Haus Lotu,’ dispela taun i gutpela ples tru bilong stap olsem ples bilong autim tok.” Ol samting i kamap i soim olsem ol i wokim gutpela disisen. Insait long liklik haptaim bihain, inap 2,000 niuspepa i prinim ol tok bilong Baibel em Russell i bin raitim.
I gat narapela as tu na i gutpela ol i makim New York. I kam inap long 1909, ol i wokim pinis ol brens ofis long Inglan, Jemani, na Australia, na bihain ol i wokim sampela moa. Olsem na i gutpela long ol i putim hetkota long wanpela taun i stap long nambis, na tu, i gat planti rot bilong ka na tren i go long dispela taun.
Bilong Wanem Ol i Kolim Betel?
Namba wan hetkota bilong Watch Tower Bible and Tract Society i kamap long 1880 samting, long Allegheny (nau em hap bilong Pittsburgh), long Pennsylvania. Long dispela taim ol i kolim hetkota olsem Haus Baibel. Long 1896, inap 12-pela manmeri i wok long dispela haus.
Tasol taim ol i muv i go long Brooklyn long 1909, ol i kolim nupela haus slip olsem Betel.a Bilong wanem ol i kolim Betel? Haus na hap graun em lain Watch Tower Society i baim long 13-17 Hicks Street em bilong wanpela pasto em planti man i save long em, em Henry Ward Beecher, na ol i kolim dispela haus olsem Betel Beecher. Ol i baim tu haus bilong Beecher i stap long 124 Columbia Heights. The Watch Tower bilong Mas 1, 1909, i tok: “Em i narakain samting long mipela i baim olpela haus Betel Beecher na bihain mipela i baim tu haus slip bilong em. . . . Mipela bai kolim nupela haus olsem ‘Betel,’ na nupela ofis na ples bung olsem ‘Haus Lotu Sel Bilong Brooklyn’; ol dispela nem bai senisim nem ‘Haus Baibel.’ ”
Long nau, ol haus slip, haus bilong prinim ol buk samting, na ol ofis bilong Sosaiti long Brooklyn na long tupela narapela ples long New York State, em Wallkill na Patterson, ol i kolim olsem Betel. Na i gat ol haus Betel long 113 kantri long olgeta hap. Winim 19,000 manmeri i wok long ol dispela haus bilong helpim wok bilong tilim ol buk na nius bilong Baibel.
Amamas Long Ol Visita
Ol i dediketim Betel long Janueri 31, 1909. Ol i makim Mande, Septemba 6, 1909, bilong ol man i ken kam lukim Betel. Inap planti handet Sumatin Bilong Baibel, em nem bilong ol Witnes Bilong Jehova long bipo, ol i kam lukim Betel. Planti bilong ol i kam long wanpela kibung Kristen i bin kamap long Saratoga Springs, inap 320 kilomita longwe long New York City. Charles Taze Russell yet i bin tok amamas long ol visita i kam.b
Ol Witnes i amamas yet long ol visita i kam lukim Betel. Long olgeta yia, winim 40,000 manmeri i kam lukim ol haus bilong Brooklyn Betel. Brooklyn Betel i save mekim yet bikpela wok long mekim wok bilong Kingdom Bilong Jehova i go bikpela, na planti milion manmeri i save kisim ol gutpela samting long en.
[Ol Futnot]
a Mining bilong dispela tok Hibru “Betel” em “Haus Bilong God.” Long Baibel, Betel em wanpela taun Israel i gat nem. Taun Jerusalem tasol ol i kolim planti taim moa long Baibel.
b Bilong save long sampela stori moa, lukim buk Jehovah’s Witnesses—Proclaimers of God’s Kingdom, pes 718-723, ol Witnes Bilong Jehova i wokim.
[Blok/Ol Piksa long pes 25]
Yu Gat Wanem Save Long Watch Tower Bible and Tract Society?
Long 1884, ol i kirapim koporesen nau ol i kolim Watch Tower Bible and Tract Society of Pennsylvania, em bipo i gat nem Zion’s Watch Tower Tract Society. Wok bilong en em bilong autim tok i tru bilong Baibel long olgeta hap bilong graun, na moa yet long rot bilong ol buk na nius. Long nau, Watch Tower Bible and Tract Society i stap yet olsem wanpela koporesen ol Witnes Bilong Jehova i save mekim wok long en long olgeta hap.c—Filipai 1:7.
Watch Tower Bible and Tract Society i bin wokim ol Baibel na ol buk na nius bilong Baibel long 473 tok ples. Ol i wokim 150 milion Baibel New World Translation of the Holy Scriptures olgeta o hap bilong en long 72 tok ples. Ol i wokim New World Translation, na tu, dispela Sosaiti i prinim long ol masin bilong ol yet o ol i baim ol man long prinim ol narapela Baibel, olsem: Baibel American Standard Version, The Bible in Living English, The Emphatic Diaglott, Linear Parallel Edition bilong Holman, King James Version (wantaim Edisen Bilong Ol Sumatin Bilong Baibel), na The New Testament Newly Translated and Critically Emphasized, Namba 2 Edisen.
Ol Witnes Bilong Jehova i bin prinim ol Baibel, na long 10-pela yia i go pinis, ol i wokim tu 20 bilion narapela samting bilong Baibel, olsem ol buk, nius, liklik nius, CD, DVD, na ol kain samting olsem.d Planti bilong ol dispela samting ol i bin prinim, putim long ol bokis, na salim long sip long ol haus Betel i stap long ol kantri olsem: Ajentina, Amerika, Australia, Brasil, Briten, Filipins, Finlan, India, Itali, Japan, Jemani, Kanada, Kolambia, Korea, Meksiko, Mianma, Naijiria, Saut Afrika, Spen.
[Ol Futnot]
c Long 2008, i gat 7,124,443 Witnes Bilong Jehova long 236 kantri. Ol i stap long 103,267 kongrigesen.
d Ol dispela samting i no gat pe bilong en. Ol man i save givim mani long laik bilong ol yet bilong helpim wok bilong ol Witnes Bilong Jehova long skulim ol man long Baibel.
[Chart]
SAMTING OL I WOKIM LONG 1998-2008
[Piksa long pes 25]
Buk 458,230,708
Nius 11,292,413,199
Liklik nius 7,996,906,376
Buklet 862,050,233
CD/MP3 34,621,130
DVD 13,500,125
Ol narapela samting 129,083,031
Olgeta wantaim 20,786,804,802
[Piksa long pes 22]
Haus Betel 122-124 Columbia Heights
[Piksa long pes 22]
13-17 Hicks Street (1909-1918)
[Piksa long pes 22]
Ol Baibel tok bilong Russell long niuspepa
[Ol Piksa long pes 22, 23]
35 Myrtle Avenue (1920-1922)
[Piksa long pes 23]
18 Concord Street (1922-1927)
[Piksa long pes 23]
117 Adams Street (1927 i kam inap nau)
[Piksa long pes 24]
25-30 Columbia Heights
[Ol Piksa long pes 24]
Haus bilong prinim ol buk long Wallkill
[Piksa long pes 24]
Ediukesen Senta long Patterson