Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Bilong wanem namba wan sin—pasin bikhet bilong Adam—i wankain olsem sik em pikinini i kisim long papamama?
Em i olsem sik, long wanem, Adam i givim sin long ol pikinini bilong em. Olsem na yumi kisim sin, wankain olsem sampela pikinini i save kisim sik long papamama bilong ol.—8/15, pes 5.
• Wanem ol samting i mekim na pasin nogut i go bikpela tru long nau?
Satan i laik pulim ol man long lusim Jehova long rot bilong putim ol tingting nogut long bel bilong ol, em tingting bilong pait na bagarapim man. Em i mekim olsem long rot bilong piksa, musik, na ol kompiuta gem, em ol samting i save kirapim man long bagarapim nogut tru ol arapela man na kilim ol i dai. Pasin bilong pait na bagarapim man i kamap long TV em i wanpela as bilong pasin nogut i go bikpela.—9/1, pes 29.
• Pontius Pailat em i husat?
Em i wanpela man bilong Rom husat i gat nem na i bin insait long lain ami. Empera Taiberius bilong Rom i bin makim Pailat long kamap gavena bilong provins Judia long 26 C.E. Long taim ol i wokim kot bilong Jisas, Pailat i harim ol tok ol hetman bilong Juda i sutim long Jisas. Bilong amamasim ol manmeri i bung, em i tok orait long ol i kilim Jisas i dai.—9/15, pes 10-12.
• Wanem dispela “mak” em Matyu 24:3 (NW ) i toktok long en?
I gat ol narapela narapela samting bilong dispela mak, em olgeta wantaim i kamapim wanpela bikpela mak yumi inap luksave long en. Ol samting insait long dispela mak em woa, hangre, sik, na graun i guria, ol dispela samting bai helpim ol disaipel bilong Jisas long luksave olsem em i “kam i stap” na “pasin bilong dispela graun i laik pinis.”—10/1, pes 4-5.
• Ol Juda i bin stap nabaut long wanem ol narapela hap?
Long taim bilong ol aposel, ol kantri we ol Juda i sindaun long en, em Siria, Esia Maina, Babilon, na Isip, na i gat sampela lain bilong ol Juda long ol hap bilong Yurop em Gavman Rom i bosim.—10/15, pes 12
• Olsem wanem? I orait long Kristen i kisim wok mani we em i mas holim gan samting?
Wok mani we man i mas karim gan samting, em samting bilong wan wan yet i mas skelim. Tasol em inap i gat asua bilong blut sapos samting i kamap na em i mas yusim gan o em yet inap kisim bagarap o dai long rot bilong narapela i pait long em o bekim pait. Wanpela Kristen i mekim kain wok olsem i no inap holim wok insait long kongrigesen. (1 Timoti 3:3, 10)—11/1, pes 31.
• Dispela tok “Armagedon” ol i kisim long wanpela tok Hibru, em “Maunten Bilong Megido,” olsem na yu ting pait bilong Armagedon bai kamap long wanpela maunten long hap bilong Midel Is?
Nogat. I no gat wanpela maunten olsem i stap long nau—long ples we Megido bilong bipo i stap long en, em i ples daun tasol na i gat sampela hip graun. Dispela hap bilong Megido em i no bikpela inap long olgeta “king bilong graun, wantaim ol ami bilong ol.” Pait bilong God bai kamap long olgeta hap, na em bai pinisim olgeta pait. (KTH 16:14, 16; 19:19; Song 46:8, 9)—12/1, pes 4-7.