Askim
Yu ting i orait long Kristen i kisim wok mani we em i mas holim gan samting?
Olgeta Witnes Bilong Jehova i save tingim tru wok God i givim long ol long lukautim famili bilong ol long ol samting bilong skin. (1 Timoti 5:8) Tasol sampela kain wok mani i save kalapim ol stiatok bilong Baibel na yumi mas abrusim. Kain wok olsem em ol samting bilong pilai laki, mekim wok long blut, na smok samting. (Aisaia 65:11; Aposel 15:29; 2 Korin 7:1; Kolosi 3:5) I gat sampela narapela kain wok, na maski Baibel i no tokaut stret long en, ol inap mekim na bel bilong yumi o ol arapela i gat tok.
Wok mani we man i mas karim gan samting, em samting bilong wan wan yet. Tasol man inap i gat asua bilong blut sapos samting i kamap na em i mas yusim gan. Olsem na Kristen i mas tingting gut na beten long dispela samting, olsem sapos wantu samting i kamap na laip bilong em o narapela inap bagarap, orait em bai mekim wok long gan o nogat. Na tu, taim man i holim gan, em yet inap kisim bagarap o dai long rot bilong narapela i pait long em o bekim pait.
Yumi holim gan o nogat, dispela inap mekim sampela samting long ol arapela tu. Olsem: Nambawan bikpela wok bilong Kristen em bilong autim gutnius bilong Kingdom Bilong God. (Matyu 24:14) Sapos Kristen i kisim wok mani we em i mas holim gan, yu ting em inap long lainim ol arapela long “stap wanbel wantaim olgeta man”? (Rom 12:18) Olsem wanem long ol pikinini o ol arapela long famili? Sapos gan i stap long haus, ol inap kisim bagarap long dispela? Na sapos ol arapela i lukim yumi holim gan, dispela inap pundaunim ol o olsem wanem?—Rom 14:13.
Long dispela “taim bilong las de,” planti man i save “pait na bagarapim ol man nabaut” na “birua long olgeta gutpela pasin.” (2 Timoti 3:1, 3) Man i kisim wok mani we em i mas holim gan samting, em inap bungim kain man olsem. Man i save long dispela samting na em i kisim kain wok olsem, yu ting em inap i stap olsem man em ol arapela “i no inap lukim wanpela rong long em”? Nogat tru. Long dispela as, sapos Kristen i kisim pinis sampela gutpela tok kaunsel bilong Baibel, tasol em i holim yet gan samting, kongrigesen i no inap tingim em olsem man “i no gat rong long ai bilong ol manmeri.” (1 Timoti 3:2; Taitus 1:5, 6) Kain man o meri olsem i no inap mekim wok insait long kongrigesen.
Jisas i tokim ol disaipel olsem sapos ol i putim ol samting bilong Kingdom i go pas long ol arapela samting long laip bilong ol, orait ol i no ken tingting planti long ol narapela samting ol i mas i gat. (Matyu 6:25, 33) Tru tumas, sapos yumi bilip tru long Jehova, “bai em i strongim [yumi]. Bai em i no larim wanpela samting i bagarapim ol stretpela man.”—Song 55:22.