“Wok Long Kamap Wanbel Wantaim Ol Arapela Man, na Bihainim Dispela Pasin”
1. (a) Yumi stap namel long pasin bilong pait na bagarapim man, tasol yumi mas mekim wanem na bai yumi ken “wok long kamap wanbel wantaim ol arapela man, na bihainim dispela pasin”? (b) Sapos man nogut i laik mekim nogut long yumi, bilong wanem, yumi mas beten na singaut long Jehova?
YUMI stap namel long pasin bilong pait na bagarapim man, olsem na dispela tok bilong aposel Pita olsem yumi lukim antap, bai yumi bihainim olsem wanem? Pita yet i bekim dispela askim. Em i tok, tok yumi “mas givim baksait long pasin nogut, na mekim gutpela pasin.” Olsem na yumi mas wok strong long kamap wanbel wantaim Jehova long rot bilong bilip long ofa bilong Krais Jisas. Taim yumi mekim pinis, orait nau yumi bihainim stret ol lo God i bin putim long Baibel. “Long wanem ai bilong Bikpela i save lukim ol stretpela man, na em i helpim ol. Na oltaim em i putim ai long beten bilong ol. Tasol Bikpela i save kros long ol man i mekim pasin nogut, na em i bekim pe nogut long ol.” (1 Pita 3:11, 12) Taim ol man nogut i laik paitim yumi o bagarapim yumi, yumi ken beten strong long Jehova.Yumi ken singaut strong long em long maus na kolim nem bilong em na askim em long helpim yumi. Sapos wanpela man nogut i laik holim wanpela meri na mekim pasin nogut long em, orait meri i ken singaut olsem long Jehova.—Skelim Diuteronomi 22:25-27.
2. Sapos man nogut i laik bagarapim yumi, yumi ken holim wanem kain tingting olsem Devit i bin kolim?
2 Sampela taim ol man nogut i laik bagarapim wanpela Witnes, tasol em i bilip na wetim Jehova i helpim em, na nau em i no bagarap. Planti taim dispela samting i bin painim Ol Witnes Bilong Jehova, tasol Jehova i helpim ol, long wanem ol i mekim olsem Devit i bin tok long wanpela beten bilong em long Sam 18:46, 48, em i tok: “Bikpela i stap yet! Em i save strongim mi oltaim. Olsem na mi litimapim nem bilong em. God i helpim bilong mi. Olsem na mi litimapim biknem bilong em. Bikpela, yu yet i save helpim mi na ol birua i no bagarapim mi. Tru tumas, Bikpela, yu tasol yu helpim mi long pait na mi daunim ol birua. Yu helpim mi na ol man bilong pait i no kilim mi i dai.” Planti milion Witnes Bilong Jehova i bilip strong long Jehova bai truim tok promis bilong em long “ol stretpela man bai kisim graun God i givim ol, na bai ol i stap oltaim long en.” Na ol i save tu, “Bikpela yet i save kisim bek ol stretpela man. Long taim hevi i kamap long ol, ol i save ran i go long em na em i lukautim ol.”—Sam 37:29, 39.
3. (a) Diuteronomi 32:10 na Danyel 3:19-27 i givim wanem save long yumi? (b) Yumi tingim ol samting i bin painim Rehap na wanpela painia bilong nau na ol i abrusim bagarap, na yumi save long wanem samting?
3 Maski wanem wanem samting i painim lain bilong Jehova insait long dispela taim nogut bilong bagarapim man, tasol Jehova em inap ‘lukautim gut lain bilong em olsem em i save lukautim ai bilong em na bai ol man i no ken bagarapim.’ (Diuteronomi 32:10; Danyel 3:19-27) Na sapos ol i tromoi bom nogut olsem bom nuklia samting, Jehova em inap lukautim lain bilong em sapos em i laik na bai ol i no ken kisim bagarap. Wanpela samting olsem i bin kamap long Ogas 6, 1945 na yumi save, Jehova inap tru long lukautim yumi long taim nogut olsem. Long dispela taim wanpela gutpela wokman bilong Jehova, nem bilong em Katsuo Miura, em stap kalabus long haus kalabus bilong Hirosima long Japan, na ol i mekim nogut long em. Long dispela de bilong Ogas 6 na i no mekim ol samting olsem em i bin mekim long ol narapela moningtaim. Em i o mekim narapela samting. Orait ol i tromoi wanpela bikpela bom atom na i sindaun long ples Hirosima na haus kalabus i bagarap, tasol dispela wokman bilong Jehova i no kisim bagarap. Nogat. Em i stap gutpela na i abrusim bagarap, olsem Rehap i bin abrusim bagarap na em i stap laip taim ples Jeriko i bagarap. (Josua 6:23, 24) Katsuo i tenkyu tru long Jehova, long wanem, bom atom i bagarapim haus kalabus na em i no kalabus moa, na em i kirap mekim wok painia i go inap long taim em i dai. (Skelim Sam 116:15.) Bikpela King bilong yumi em inap mekim olgeta samting, em i “God tru, em i bikpela Man, em i strongpela Man, nem bilong em Jehova bilong bikpela lain.”—Jeremaia 32:17-19, NW.
Stap Klostu long Oganaisesen Bilong Jehova
4. Aisaia sapta 60 i stori olsem wanem long oganaisesen bilong Jehova long nau?
4 Oganaisesen bilong Jehova i kain olsem wanpela mama, na em inap helpim yumi long sanap strong nau long dispela taim nogut. Kirap long 1938 God i bin stretim gut ol lo na wok insait long lain bilong em. Jehova i tok pinis long em bai mekim olsem. Em i tok: “Bai mi makim pasin sekan i stap olsem ol wasman bilong yu, na stretpela pasin bai stap olsem ol bos bilong yu. Bai ol i no ken harim moa singaut bilong pait na bagarapim man insait long graun bilong yu, na ol i no ken bagarapim wanpela samting insait long mak bilong ples bilong yu.” Long olgeta hap bilong graun ol manmeri insait long oganaisesen bilong Jehova ol i stap wanbel na ol i no laikim tumas stretpela pasin, olsem na lain bilong ol i wok long i go bikpela bikpela. Pastaim, olsem long 64 yia i go pinis, i no planti man i save autim tok bilong Kingdom em inap olsem sampela tausen tasol, olsem “man i liklik.” Tasol nau ol i kamap olsem wanpela “bikpela strongpela lain,” i gat 2,477,000 ol i stap long 205 kantri, na ol i wok long i go bikpela yet. Sapos yumi lukim ol ripot bilong wok bilong ol yumi ken save, nau Jehova i ‘hariapim dispela wok long taim stret bilong en,’ long wanem, “las de” i klostu pinis.—Aisaia 60:17, 18, 22, NW; Matyu 24:14.
5. Olsem Sam i tok, wanem samting i strongim lain bilong Jehova nau long dispela taim nogut bilong pait na bagarapim man?
5 Lain Witnes i go bikpela tu insait long ol ples ol man i bin mekim nogut long ol na i laik bagarapim ol, olsem Hitler i bin mekim long Ol Witnes Bilong Jehova, em i bin kalabusim ol long ol banis kalabus nogut tru, na long Amerika tu long taim bilong pait ol man i bung na i kam pait long ol. Nau pasin bilong pait na bagarapim man i kamap bikpela long olgeta hap bilong graun. Long hap bilong Lebanon bikpela pasin birua i bin i stap inap sampela yia, na pait na bagarapim man tu i go bikpela, ating i winim planti ol narapela ples. Tasol ol brata bilong yumi long Lebanon ol i sanap strong. Olsem wanem ol inap sanap strong? Long wanem, ol i tingting strong long Jehova na ol i bilip tru long em inap lukautim ol, na ol i strong long bung wantaim long ol miting bilong ol na mekim ol narapela wok Kristen.—Sam 73:28; 149:1.
6. Yumi mas ting olsem wanem long pasin bilong i go oltaim long miting? Bilong wanem yumi mas ting olsem?
6 Dispela i mas givim tingting long yumi na yumi mas save, long taim nogut bilong pait na bagarapim man, yumi no ken lusim pasin bilong i go long miting na bung wantaim. (Hibru 10:24, 25) Miting em i bikpela samting bilong helpim yumi long sanap strong namel long ol man bilong pait na bagarapim man, em Seten i bosim ol. Na miting i save strongim yumi na yumi inap sakim ol pasin hait. Seten i laik mekim long yumi bilong pundaunim yumi. Sapos yumi go oltaim long miting, dispela bai helpim yumi long kisim laip i stap oltaim. Olsem na ol miting i bikpela samting tru!
7. (a) Seten i wok olsem wanem long daunim lain bilong God? (b) Wanem sampela rot bilong Seten long kirapim ol man long kisim pasin bilong pait na pamuk? (c) Yumi ken mekim wanem bilong i stap wanbel wantaim Jehova? Yumi tingting long kisim wanem samting na yumi mekim olsem?
7 Long dispela taim nogut bilong nau, Seten i laik daunim lain bilong God na paulim ol. Bilong mekim olsem em i wok long grisim ol na bai ol i “laikim ol yet tasol, na ol i laikim tumas mani [na ol samting ol inap baim long mani] . . . Bai ol i laikim tumas kain kain amamas bilong bodi, na ol i no laikim God.” Ol dispela kain samting ol inap pulim yumi na bai yumi lusim pasin bilong i go oltaim long miting na bung wantaim lain bilong God. (2 Timoti 3:1, 2, 4) Sampela taim i gat ol piksa bilong pait na bagarapim man na pasin sem na pamuk i kamap long TV na video, em spirit bilong Seten i kamapim. Tasol nogut yumi wok long kisim spirit bilong Seten i kam long dispela rot. Yumi mas wok long stadi, na tingim ol samting bilong spirit, na go long ol miting, na kisim stretpela save na bihainim, bambai yumi ken painim “laip i stap gut oltaim.”—Jon 17:3; Filipai 1:9-11; Kolosi 1:9-11.
Yumi Ken Mekim Wanem Bilong Lukautim Skin Bilong Yumi?
8. (a) Planti man bilong dispela graun ol i mekim wanem na bai ol i no ken kisim bagarap nau long dispela taim nogut? (b) Tasol olsem wanem yumi ken save, dispela samting ol i mekim i no gutpela?
8 Pasin bilong pait na bagarapim man em i mekim pretim ol manmeri i save sindaun long ol bikpela taun long olgeta hap. Long Amerika planti man i save pret long wokabaut long nait. Planti ol i save karim gan. Tasol yu ting Ol Witnes Bilong Jehova i mas mekim olsem bilong lukautim skin bilong ol na sakim ol man nogut i laik bagarapim ol? Long nau planti man i save kisim bagarap long ol dispela gan i stap long haus bilong ol yet, olsem ol i holim gan na ol i popaia na sutim skin bilong ol yet; na sampela pikinini i painim gan long haus bilong ol na ol i pilai long en na gan i kilim i dai narapela pikinini. Olsem na yumi mas tingting gut na skelim gut dispela pasin bilong putim gan samting long haus bilong lukautim yumi. Na yumi mas tingim narapela samting tu: Planti man nogut bilong bagarapim man ol i lain pinis long sut long gan. Orait sapos wanpela i holim gan na em i lukim narapela man i holim gan, em bai sutim dispela man, na em i no ken popaia—em bai makim stret bilong kilim man i dai.
9. Wanem samting bai helpim na lukautim Kristen?
9 Gan i no inap helpim o lukautim Kristen, tasol pasin bilong i stap “wanbel wantaim ol arapela man,” em dispela tasol inap helpim na lukautim Kristen long taim nogut. (1 Pita 3:11) Yu mas bilip strong long Jehova na tingim em. Sapos wanpela man nogut i bungim yu na em i pasim yu, tokim em yu wanpela Witnes Bilong Jehova. Sapos em i laik kisim ol mani samting bilong yu, yu no ken sakim tok bilong em o tok pait wantaim em; givim dispela samting long em. Laip bilong yu em i bikpela samting, tasol dispela samting stilman i laik kisim long yu, em i no bikpela samting olsem laip bilong yu. Sapos man i laik bagarapim yu, singaut long Jehova “Nem bilong Jehova i olsem wanpela strongpela haus. Ol stretpela man i ken ran i go long en na stap gut.”—Provep 18:10, NW.
10. (a) Sapos yumi laik save, i gutpela long karim gan bilong lukautim yumi o nogat, yumi ken lukim wanem tok long Esra sapta 8 na 2 Korin sapta 11? (b) Wanem samting i kamap long Afrika na Noten Ailan na yumi save, sapos yumi karim gan dispela i no ken helpim yumi?
10 Tasol sapos wanpela Witnes Bilong Jehova i mas i go long wanpela hap i gat ol man nogut bilong pait na bagarapim man ol i raun insait long dispela hap, ating em i mas karim gan bilong lukautim skin bilong em, a? Nogat tru! (Skelim Esra 8:21-23, 31; 2 Korin 11:23-27.) Yumi ken tingim sampela wasman sekit na wasman distrik bilong yumi long Afrika. Taim ol i raun bilong lukim ol kongrigesen, planti taim ol i mas wokabaut long hap i gat pait i stap long en. Sampela taim ol lain i pait wantaim gavman (guerrillas) i pasim ol, o ol ami i pasim ol. Sapos ol dispela lain i lukim ol Witnes hia i holim gan ol bai kilim ol i dai. Tasol ol i tokaut long ol i Witnes Bilong Jehova, na ol dispela lain i larim ol i go. Na i wankain tu long hap bilong Noten Ailan, em pait na bagarapim man i go pulap tru long en. Tasol ol i save Ol Witnes Bilong Jehova i no insait liklik long dispela pait bilong ples; ol i man bilong i stap wanbel wantaim ol narapela man, olsem na ol inap wokabaut i go i kam long hap bilong ol Katolik na hap bilong lotu Tatatala wantaim.
11. (a) Olsem wanem yumi ken save, Kristen i no ken karim gan o narapela samting olsem? (b)Yumi mas bilip na tingim husat em inap lukautim yumi, olsem Baibel i tok?
11 “Yumi tingim ol tok bilong Baibel na ol samting i painim ol Witnes olsem yumi stori pinis long en na nau yumi save, i no gutpela long Kristen i karim gan o putim wanpela gan long haus bilong em o putim narapela samting olsem naip o spia samting bilong lukautim skin bilong ol. (Aisaia 2:4; 1 Pita 3:11) Sapos yumi redim ol samting bilong sakim ol man nogut, dispela bai kirapim em long mekim nogut long yumi. Kristen i mas tingim God bilong em Jehova na bilip long em.—Sam 18:48; 140:1, 4; Provep 3:5-7.
12. (a) Bilong wanem i stret long Kristen i ken singaut long polis i helpim em taim birua i painim em? (b) Sapos wanpela man nogut i laik bagarapim Kristen, em bai holim gan samting na sutim man? Long taim olsem, i stret Kristen i mekim wanpela samting em wok bilong polis yet long mekim?
12 Olsem Rom 13:1, 4 i tok, “gavman“i save putim ol polis samting bilong pasim ol man nogut, na ating sampela i save holim gan o narapela samting bilong lukautim ol man bilong ples na ol haus samting. God i larim ol dispela gavman i stap na mekim dispela wok, na Baibel i tok ol i olsem “wokman bilong God, bilong bekim pe nogut long man i mekim pasin nogut.” Olsem na i stret Kristen i ken singautim polis i helpim em na bai ol man nogut i no ken bagarapim em. Tasol sapos man nogut i laik bagarapim Kristen o famili bilong em na em i mas painim kwik wanpela samting bilong sakim dispela man nogut, Kristen i no ken kisim gan. Na em i no ken mekim wanpela samting em wok bilong polis yet long mekim. Long planti ples i tambu long man i kisim gan bilong lukautim skin bilong em.—Matyu 22:21; skelim Eksodas 22:2.
13. Bilong wanem Kristen i no ken mekim kung fu o kain samting olsem bilong lukautim skin bilong em?
13 Tasol olsem wanem? I stret sapos Kristen i lain long Kung fu samting bilong lukautim skin bilong em taim man nogut i laik bagarapim em? Dispela Kung fu na sampela samting moa i wankain long en i bin kirap pastaim long hap bilong Saina, na em i strongpela samting long bagarapim man. Ol pris (monk) bilong lotu Sen Budis ol i bin kamapim Kung fu inap 1,400 yia bipo long wanpela haus bilong ol, ol i kolim Saolin Monastri long sait bilong maunten Songsan em wanpela maunten bilong Saina ol i ting em i holi. Na dispela lotu em i as tu bilong wanpela samting ol Japan i save mekim bilong pait long ol birua, ol i kolim Busido, insait bilong en i olsem “Pasin Bilong Strongpela Man Bilong Mekim Pait.” Planti man bilong mekim judo na kendo na karate ol i save sindaun na tingting long ol samting bilong lotu. Wok bilong karate em bilong bagarapim skin bilong man, na em inap kilim man i dai tu. Olsem na ol man i bilip long Jehova ol i no laik lain long mekim ol dispela samting bilong lukautim skin bilong ol.—Provep 3:31.
14, 15. (a) Bilong wanem i orait long Kristen i kilim animal bilong kaikai? (b) Tasol wanem samting i ken pasim Kristen na em i no inap holim wanpela wok insait long kongrigesen?
14 Sapos Kristen i gat gan bilong painim abus, dispela i stret o nogat? Taim bilong Tait Wara i pinis God i larim ol man i kilim ol animal bilong kaikai, olsem abus bilong ol, tasol ol i mas kapsaitim blut bilong en long graun na ol i no ken kaikai dispela blut. (Jenesis 9:3, 4; Diuteronomi 12:23-25) Long sampela hap, gavman i save larim ol man i kisim gan, na sampela Witnes i gat gan bilong lukautim skin bilong ol, nogut sampela animal nogut bilong bus i kam bagarapim ol, o ol i gat gan bilong painim abus bilong ol. (Matyu 22:21) Ating abus i olsem bikpela kaikai bilong ol. Tasol yumi no ken ting Jehova i orait long yumi ken kilim nating ol animal, olsem bilong spot o pilai, o bilong kisim amamas long kilim ol samting. Bipo Nimrot i bin mekim olsem, na long nau sampela man i bihainim pasin bilong Nimrot. Baibel i tok, laip bilong ol samting i stap long blut bilong en, na i bikpela samting tru long ai bilong Jehova.—Levitikas 17:11, 14.
15 Sapos wanpela witnes i save kilim nating ol animal bilong pilai tasol na i no bilong kaikai, na planti Witnes long kongrigesen ol i tingting planti long dispela samting, orait ating em i no inap holim wanpela wok insait long kongrigesen, long wanem, pasin bilong em i no stret long ai bilong sampela brata.—1 Timoti 3:2.
16. O1 elda i ken mekim wanem bilong helpim dispela man? Tasol olsem wanem sapos wanpela Witnes i no laik bihainim ol tok bilong Baibel i stap long paragraf 9 i go inap 15?
16 Na i wankain tu sapos wanpela Witnes i kisim gan na putim i stap long haus bilong lukautim em long taim man nogut i laik bagarapim em, o em i lain bilong kung fu samting. Kwiktaim ol elda bilong kongrigesen ol i mas givim sampela tok long em bilong helpim em long stretim dispela samting. (Maika 4:3) Sapos wanpela Witnes i no laik lusim dispela pasin na em i karim yet ol samting bilong pait o em i redim na putim i stap bilong lukautim skin bilong em, orait em i kamap olsem man bilong “pait nabaut,” na em i no inap holim wanpela wok insait long kongrigesen.—1 Timoti 3:2, 3.
Pasin Bilong Karim Gan Samting long Ples Wok
17. Bilong wanem planti Witnes i save abrusim ol kain wok mani i gat wok bilong mekim kung fu samting o karim gan?
17 Sapos long ples wok wanpela Kristen gat wok long karim gan o wanpela samting bilong pait long man, o ol i tok long em i mas lain long judo o kung fu o karate samting, em i mas mekim wanem? Taim em i tingim ol samting em i mas mekim, em i mas save, man i bihainim lek bilong Jisas em i mas bihainim pasin bilong i stap bel isi namel long ol man na i no ken pait. Rom 12:17, 18) Planti Witnes Bilong Jehova i tingim tok bilong Aisaia 2:4 na ol i save abrusim ol kain wok mani olsem sapos o1 i mas holim o1 samting bilong pait. Tru ating sampela wok olsem em i bilong lukautim ol man o ol haus samting bilong ol, na dispela i no pait wantaim tok bilong Rom 13:4. Tasol sapos wanpela samting i kamap Witnes na Witnes i sut long gan o paitim man long wanpela samting, em inap bagarapim laip bilong dispela man na nau em i gat rong, na bel bilong em bai i gat tok long em; na sapos sampela man i laik bekim nogut long em, em inap kisim bagarap. (Sam 51:14; skelim Nambas 35:11, 12, 22-25.) Olsem na i gutpela sapos yumi ken painim wanpela wok i no gat ol kain samting nogut olsem i ken kamap long en.
18.(a) Olsem wanem tingting bilong strongpela Kristen i narapela kain long tingting bilong ol man bilong dispela graun? (b) Kristen i ken mekim wanem bambai bel bilong em i no gat tok?
18 Nau long dispela “las taim” pasin nogut i go bikpela na planti bos bilong wok i laik bai ol wokman bilong ol i mas karim gan. Ating ol sekyuriti bilong was long ol haus beng na ol narapela bisnis samting, na ol polis, ol i karim gan. Tasol olsem wanem long Kristen? Em tu i mas mekim wok mani bilong “lukautim ol wanlain bilong em yet” (1 Timoti 5:8) Em i bin lain long tok bilong Baibel, em na tingting bilong em i no wankain olsem ol man bilong dispela graun, em ol i gat tok long karim gan, na sapos man nogut i painim ol, ol i ken mekim wok long gan bilong ol. (Efesas 5:15-17) Kristen i save, sapos em i kilim man i dai em i gat bikpela asua, na Kristen i save tu long tingting bilong Jehova long blut, olsem blut em i holi na i bikpela samting long ai bilong Jehova. (Jenesis 9:6; Sam 55:23) Strongpela Kristen i mas painim wanpela wok i no gat dispela pasin bilong karim gan samting. Sampela Witnes i save toktok wantaim bos long dispela samting na bos i senisim wok bilong ol na ol i kisim wanpela wok i no gat gan samting em i mas mekim wok long en.
19. Sapos wanpela brata i no laik stretim dispela samting, ating em i no inap holim wanem wok? (2 Korin 13:11 )
19 Nau dispela pasin bilong pait na bagarapim man em i go bikpela moa yet, olsem na sapos wanpela brata i holim yet wanpela wok bilong skin na em i mas karim wanpela gan samting, yumi mas ting olsem pasin bilong em i no gutpela bilong ol narapela brata i ken bihainim. Kongrigesen i ken givim 6-pela mun long em bilong senisim dispela wok bilong em. Sapos em i no mekim, orait em i no inap holim wanpela wok insait long kongrigesen.—1 Timoti 3:2; Taitas 1:5, 6.
Yumi Olgeta i Mas Bihainim Pasin Bilong i Stap Bel Isi
20. (a) Sapos yumi bihainim pasin bilong i stap bel isi wantaim ol man, olsem wanem dispela i gutpela rot bilong bihainim? (b) Tasol sapos Kristen i stap strong na bikpela hevi i painim em o ol i bagarapim em na em i dai, wanem gutpela samting bai painim em? (c) Yu yet yu tingim husat i ken helpim yu?
20 Ol Witnes Bilong Jehova i wok long i stap bel isi wantaim ol man, na planti taim dispela samting i bin lukautim ol na ol i no kisim bagarap—skin bilong ol i no bagarap, na gutpela pasin bilong ol i no bagarap, na ol i no bagarap long ol samting bilong spirit! Ol i bihainim tok bilong Baibel, olsem na Yumi save, tok bilong Baibel em i gutpela samting tru Yumi ken bihainim. Tru, i gat wan wan i bin kisim bagarap, tasol ol dispela gutpela Kristen i bin i stap strong inap long ol i dai, olsem na bai ol i kirap bek paslain long sampela ol narapela lain. (Hibru 11:36-40; Revelesen 2:l0) Sampela taim Jehova i save larim Seten i putim, bikpela hevi long lain bilong Em, olsem Seten i bin mekim long Jop. Tasol Jop i stap strong na bihain em i kisim, gutpela pe. (Jop 1:18, 19; 42:12-15) Maski wanem wanem samting i painim yumi nau long dispela taim nogut bilong pait na bagarapim man, Yumi no ken pret na lusim bilip. Yumi mas tingim Jehova na wet long em “Long wanem, ai bilong Jehova i save lukluk nabaut long olgeta hap bilong graun bambai em i ken kamapim strong bilong em na helpim ol man ol i givim bel olgeta long em.”—2 Kronikel 16:9, NW.
Yu inap bekim ol dispela askim?
□ Sapos sampela man i laik bagarapim Kristen, em i mas tingim husat inap helpim em?
□ Sapos yumi stap klostu long oganaisesen bilong Jehova na bihainim tok bilong en, dispela bai helpim yumi olsem wanem?
□ Bilong wanem i no gutpela sapos yumi karim gan o yumi lain long kung fu samting bilong lukautim skin bilong yumi?
□ I gutpela sapos Kristen i mekim wanem long wanpela wok mani i gat wok bilong karim gan samting? Bilong wanem i gutpela sapos em i mekim olsem?
[Rait long pes 16]
Pasin Bilong Pait na Bagarapim Man i Go Bikpela Tru—Em Bai Pinis Olsem Wanem?
‘Sapos Amerika na Rasia i kirapim pait na tromoi ol bom nuklia, dispela inap kilim i dai . . . olsem 80 pesen bilong olgeta manmeri bilong graun.’—The Express, Mas 29, 1982, em tok bilong wanpela man bilong politik long Kalifonia. ‘Nogut gavman bilong Rasia na Amerika . . . i kisim tingting olsem ol inap mekim wanpela pait nuklia. Yumi save, sapos wanpela pait nuklia i kamap na Rasia wantaim Amerika i mekim wok long olgeta bom nuklia na ol narapela samting ol i redim pinis, olgeta kantri long hap bilong Not bai bagarap olgeta.’ —Em tok bilong Dokta Frank Barnaby, em man bilong skelim rot bilong kamapim pasin sekan long graun, Desemba 26, 1982.
“Sapos ol i mas redim planti samting bilong pait bambai ol lain bilong graun i ken i stap bel isi wantaim, orait bel isi i mas kamap tru. Long wanem, ol i bungim pinis wan milion bom kain olsem ol i bin tromoi long Hirosima, na olgeta wan wan bilong 4,200,000,000 manmeri bilong graun i olsem ol i save tromoi K150 long olgeta yia long ol samting bilong pait.”—Em tok bilong Andre Fontaine long nius Le Monde, na ol i raitim gen long nius The Guardian, Janueri 9, 1983.
“Nambawan Bilong Yunaitet Nesen i Tok, i Gat Planti Tok Moa long Pait Nuklia i Ken Kamap—em i tok, ‘Ol i mas skelim wanem samting ol i laik bai em i stap—ol nupela nupela kain bom samting bilong pait o ol lain man bilong kamap bihain.”’—The New York Times, Februeri 16, 1983, i kamapim tok bilong Sekreteri—Janeral Javier Perez de Cuellar.
“Narapela lain ol i pinis, na narapela lain i kamap; tasol graun i stap inap long taim bihain bihain.” “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet bai ol i stap gut long graun. Bai ol i sindaun gutpela tumas na amamas i stap.”—Eklisiastis 1:4, NW; Sam 37:10, 11.
[Rait long pes 17]
Ol Witnes Bilong Jehova long Hap Bilong Tripoli long Lebanon Ol i Sanap Strong long Taim Nogut Bilong Pait
Wanpela man i bin i go long dispela hap na em i stori long ol samting i painim sampela Witnes. Em i tok:
“Taim nogut tru i painim ol, tasol ol i no lusim wanpela miting. Ol i tokim mipela wanpela taim ol i mekim kibung distrik bilong ol long haus bilong wanpela brata na 117 ol i bung. Tasol taim laspela sista i kam insait, wanpela roket i pairap ausait, long ai bilong dua stret. Ol i miting i stap na ol roket na bom i pundaun nabaut ausait olsem ren i kam pundaun. Ol i soim mipela long ol pos bilong lait i sanap ausait na ol bom i bin tekewe ol hap skin bilong pos, na ol hap bilong bom i sutim nabaut ol haus i stap klostu, na mak bilong bom i stap long banis bilong ol haus—tasol i no gat wanpela hap bom i bin sutim haus ol brata i bung long en!
“Wanpela taim tupela famili i lukim ol bom i pundaun nabaut na ol i gat tupela tingting long i go long miting—bai ol i go o bai ol i stap. Ol i tingting na ol i tok, ol i mas i go long miting maski taim nogut i stap. Na gutpela tru ol i go, long wanem, taim ol i stap long miting wanpela bom i pundaun long haus bilong dispela famili em ol i bin tingting long i stap long haus, na haus i bagarap olgeta. Na narapela famili tu, bom i pundaun antap long haus bilong ol na planti hap bilong bom i sut i go insait long haus, na sapos ol i bin i stap insait long haus bai i no gat wanpela i abrusim bagarap—olgeta bai dai. Olsem na gutpela tingting bilong ol long i go long miting, dispela i helpim ol na ol i stap laip.
“Wanpela famili Witnes ol i sindaun long hap bilong ol lain olsem komyunis, na narapela lain politik i kam pait na kisim ples. Olsem na ol i holim ol dispela Witnes na ol i kisim ol i go bilong kilim ol i dai. Tasol wanpela wanblut em i no insait long tok i tru em i insait long dispela lain ol i laik kilim i dai dispela famili. Em i harim tok bilong dispela samting na kwiktaim em i kam long ol taim ol man bilong sutim ol i no kamap yet. Em i kisim dispela famili i go long hetkwota bilong dispela lain politik, na famili i tokaut olsem ol Witnes i no save insait long ol wok politik bilong dispela graun. Ol i autim sampela tok moa bilong Baibel long dispela lain na nau ol i larim famili i go. Planti taim mipela harim stori bilong ol kain samting olsem i bin kamap na ol Witnes i no kisim bagarap.”
[Piksa long pes 20]
Bai yumi redim ol samting bilong sakim man nogut i laik bagarapim yumi o yumi wetim Jehova i helpim yumi?