Husat i Bihainim Ol Tok Bilong Krais Long Nau?

PLANTI man i tingim Jisas Krais olsem wanpela man i nambawan tru na i winim olgeta narapela man i bin i stap long graun. Inap olsem 2,000 yia, ol tok bilong em i bin kirapim bel na tingting bilong planti man​—“ol man nating i bin tingim na helpim ol arapela, na ol maniman i bin mekim gut tru long ol man i sot.” Wanpela man bilong Inglan bilong raitim buk, Melvyn Bragg, i bin tok olsem.

Ol Man i Gat Wanem Tingting Long Lotu Kristen?

Olsem wanem long lotu Kristen? Wanpela buk i tok lotu Kristen “i bin mekim bikpela samting tru long tingting bilong ol man.” David Kelso bilong Glasgow Caledonian Yunivesiti, Skotlan, i tok: “Insait long dispela 2,000 yia lotu Kristen i bin i stap, ol lain bilong en i bin mekim planti bikpela wok tru long sait bilong droim piksa, wokim ol haus i gat stail, kisim save long as bilong kain kain samting, wokim musik, na helpim sindaun bilong ol man.”

Tasol planti man i gat narapela tingting. Ol i no gat tok long lotu em ol tok bilong Jisas Krais i as bilong en na dispela bilip olsem Jisas i pikinini bilong God, nogat. Samting ol i gat tok long en, em pasin bilong ol lain bilong lotu i tok ol i Kristen.

Wanpela saveman bilong Jemani i bin stap olsem 100 yia i go pinis, em Friedrich Nietzsche, em i tok olsem pasin bilong ol lain bilong lotu i tok ol i Kristen “em i wanpela samting nogut tru,” na ‘i as bilong planti pasin nogut, na i bin nogutim tru ol man na giamanim ol.’ Tru, Nietzsche i mekim strongpela tok, tasol i gat sampela narapela tu i gat wankain tingting olsem em. Bilong wanem? Long wanem, inap planti handet yia, ol man i tok ol i Kristen ol i no bin bihainim pasin bilong Jisas Krais long wokabaut bilong ol. Ol i bin mekim kain kain “pasin nogut, na pasin i bagarapim nem bilong God.”

Olsem Wanem? Krais i Stap Wantaim Ol Lain i Tok Ol i Kristen?

Olsem na yumi laik save, “Krais i stap yet wantaim ol lain i tok ol i Kristen o olsem wanem?” Sampela bai tok, “Yes, em i stap wantaim ol. Em i bin tok promis: ‘Mi save stap wantaim yupela olgeta de, i go inap long dispela taim i pinis.’ ” (Matyu 28:​20) Tru, Jisas i bin tok olsem. Tasol yu ting dispela tok i makim olsem em bai stap wantaim olgeta man i tok ol i disaipel bilong em, maski ol i bihainim wanem kain pasin?

Tingim: Sampela hetman bilong lotu long taim bilong Jisas i bin ting olsem God bai stap wantaim ol maski ol i mekim wanem. God i bin makim lain Israel bilong mekim wanpela bikpela wok, olsem na sampela hetman bilong lotu i bin ting olsem God i no ken lusim ol. (Maika 3:​11) Tasol bihain, ol i givim baksait olgeta long ol lo bilong God. Olsem na Jisas Krais i tokim ol: “Harim. Nau ples bilong yupela bai i bagarap na i stap nating.” (Matyu 23:38) God i no amamas moa long dispela lain bilong lotu. Em i sakim ol na larim ol ami bilong Rom i kam bagarapim biktaun bilong ol, Jerusalem, na tempel bilong en long 70 C.E.

Olsem wanem? Kain samting olsem inap painim ol lain i holim nem Kristen? Orait nau yumi ken stori long ol samting Jisas i tok ol lain bilong em i mas mekim bambai em i ken bihainim tok promis bilong em na stap wantaim ol i go inap long “dispela taim i pinis.”

[Ol Piksa long pes 2, 3]

Ol tok bilong Jisas Krais i bin helpim tru planti milion manmeri long olgeta hap