Askim

Wanem mining bilong tok bilong aposel Pol taim em i tok ol meri i mas “pasim maus” taim kongrigesen i bung bilong lotu?

Pol i raitim tok long kongrigesen Kristen long Korin olsem: “Taim sios i bung bilong lotu, ol meri i no ken mekim toktok. Nogat. Ol i mas pasim maus tasol. Olgeta sios bilong yumi manmeri bilong God i save mekim olsem tasol.” (1 Korin 14:​33, 34) Bilong kisim stretpela save long dispela tok bilong Pol, i gutpela yumi skelim ol ves i stap klostu.

Long 1 Korin sapta 14, Pol i toktok long ol miting bilong kongrigesen Kristen. Em i stori long ol tok i mas kamap long ol miting na long pasin bilong wokim ol miting. (1 Korin 14:​1-6, 26-​34) Em i stori tu long as na ol i mekim ol miting Kristen​​—bilong “ol manmeri bilong sios i ken kisim strong.”​​—1 Korin 14:​4, 5, 12, 26.

Inap 3-pela taim long 1 Korin sapta 14, Pol i mekim dispela tok “pasim maus” o “no ken toktok.” Dispela tok i go long 3-pela narapela narapela lain insait long kongrigesen, tasol i bilong mekim wanpela wok tasol​​—olgeta samting “i mas bihainim stret ol gutpela pasin bilong lotu.”​​—1 Korin 14:40.

Long namba wan taim, Pol i tok: “Sapos sampela i laik mekim tok long narapela tok ples, tupela o tripela tasol i ken mekim. Em inap. Na ol i no ken mekim tok wantaim. Nogat. Wanpela i mas tok pastaim na narapela bihain long em. Na wanpela man i mas tanim tok bilong ol. Na sapos i no gat man bilong tanim tok, orait man bilong mekim tok long narapela tok ples, em i mas i stap isi na i no ken toktok. Em i ken mekim toktok long em yet na long God tasol.” (1 Korin 14:​27, 28) Dispela i no makim olsem i no gat wanpela taim long miting na dispela man i no ken toktok, nogat. Em i ken toktok, tasol i gat sampela taim na i stret em i mas pasim maus. As bilong mekim ol miting​—bilong ol manmeri i ken kisim strong—​dispela i no inap kamap sapos em i mekim tok long wanpela tok ples ol narapela i no save long en.

Long namba tu taim, Pol i tok: “Tupela o tripela man bilong autim tok bilong God olsem profet, ol tasol i ken autim tok. Na ol arapela i ken skelim tok bilong ol. Na sapos wanpela i sindaun i stap, na God i soim wanpela tok long em, orait man i wok long toktok, em i mas pasim maus.” Dispela i no makim dispela man i wok long toktok em i no ken toktok moa long ol miting, nogat; tasol sampela taim em i mas pasim maus. Long dispela rot, man i sindaun i stap na God i soim tok long em, em i ken autim tok long kongrigesen, na wok bilong mekim miting​​—bilong “olgeta i ken kisim strong”​​—i ken kamap gut.​​—1 Korin 14:​26, 29-​31.

Long namba 3 taim, Pol i toktok long ol meri Kristen tasol. Em i tok: “Taim sios i bung bilong lotu, ol meri i no ken mekim toktok. Nogat. Ol i mas pasim maus tasol. Olgeta sios bilong yumi manmeri bilong God i save mekim olsem tasol. Ol meri i no ken i stap namba wan. Ol i mas i stap aninit.” (1 Korin 14:34) I gat wanem as na Pol i givim dispela tok long ol sista? Em i mekim dispela tok bambai ol samting i ken wok stret insait long kongrigesen. Em i tok: “Sapos ol i laik save as bilong wanpela tok, orait ol i ken askim man bilong ol yet long haus bilong ol. Sapos meri i mekim tok long taim sios i bung, em i mekim pasin i no stret.”​​—1 Korin 14:35.

Ating sampela sista i no wanbel long sampela tok ol brata i autim long kongrigesen, na taim kongrigesen i bung ol i tokaut long dispela. Tok bilong Pol i helpim ol sista long sakim kain pasin olsem, na daun long lo bilong Jehova long wok bos na aninit long man bilong ol. (1 Korin 11:3) Na tu, taim ol sista i pasim maus, dispela i soim olsem ol i no tingting long kamap tisa insait long kongrigesen. Taim Pol i raitim pas long Timoti, em i kamapim olsem sapos meri i mekim wok tisa, dispela i no stret. Em i tok: “Mi no save larim ol meri i bosim ol man na i skulim ol long tok bilong God. Nogat. Ol meri i mas pasim maus na harim tok tasol.”​​—1 Timoti 2:​12.

Olsem wanem? Dispela i makim olsem i no gat wanpela taim na meri Kristen i ken toktok long taim bilong miting bilong kongrigesen? Nogat, i no olsem. Long taim bilong Pol, i gat sampela taim na ol meri Kristen, em ating holi spirit i kirapim ol, ol i beten o autim tok profet long kongrigesen. Long kain taim olsem, ol i save karamapim het long laplap bilong soim olsem dispela i no wok bilong ol meri.a (1 Korin 11:5) Na tu, long taim bilong Pol na long nau tu, ol sista wantaim ol brata ol i gat wok long tokaut long bilip bilong ol. (Hibru 10:​23-​25) Ol sista i save mekim olsem long taim bilong wok autim tok, na tu, ol i autim bilip na strongim ol arapela long taim bilong ol miting bilong kongrigesen​—long rot bilong bekim tok taim brata i singautim ol long mekim, na long rot bilong ol asainmen ol i kisim bilong insait long sampela soim o mekim tok long Skul Tiokratik.

Olsem na taim ol meri Kristen i “pasim maus,” dispela i makim olsem ol i no traim long kisim wok bilong man na skulim kongrigesen. Na ol i no kamapim ol askim em inap daunim namba bilong man i skulim kongrigesen. Taim ol sista Kristen i mekim wok bilong ol yet insait long kongrigesen, dispela i save mekim bikpela wok bilong helpim kongrigesen long stap wanbel na ol samting i kamap long ol miting i save “strongim sios.”​​—1 Korin 14:​26, 33.

[Futnot]