“Stori Moa Long Mipela!”

LONG Nezlobnaya, Rasia, wanpela haiskul i gat klas bilong skelim ol buk, na ol i stadi long ol buk bilong Mikhail Bulgakov, em wanpela man bilong Rasia i save raitim ol buk. Wanpela bilong ol dispela buk i gat stori i daunim tru Jisas Krais, na i tok Satan em i gutpela man. Taim klas i toktok pinis long dispela samting, tisa i givim ol wanpela tes long dispela buk. Tasol long gutpela pasin, Andrey, wanpela Witnes Bilong Jehova i gat 16 krismas i askim tisa long em i no ken mekim dispela tes, long wanem, maus bilong bel i no orait long em i skelim ol dispela kain buk. Em i askim tisa sapos em inap raitim wanpela stori long em i gat wanem tingting long Jisas Krais. Tisa i tok orait long dispela samting.

Long stori Andrey i raitim, em i tok olsem em i save rispektim tingting bilong ol narapela, tasol em i save olsem nambawan gutpela rot bilong kisim save long Jisas em long rot bilong ritim wanpela bilong ol 4-pela Gutnius. Sapos yu mekim olsem, “bai yu kisim save long laip bilong Jisas na ol tok em i bin skulim ol man long en, em ol man i bin lukim na i stori long en.” Andrey i tok moa: “Narapela samting mi tingting planti long en, em ol tok buk i mekim long Satan. Ating sampela man i amamas long ritim buk i tok Satan em i gutpela man, tasol mi, nogat.” Andrey i stori olsem Satan i wanpela strongpela spirit nogut i bin givim baksait long God, na kamapim pasin nogut, pen, na hevi long ol manmeri. Andrey i pinisim stori olsem: “Mi no ting dispela buk bai helpim mi sapos mi ritim, nogat. Tasol mi no gat tok long Bulgakov yet, nogat. Tasol long mi yet, mi laik ritim Baibel bilong kisim save long stori tru tru bilong Jisas Krais.”

Tisa bilong Andrey i laikim tru stori bilong Andrey na i tokim em long mekim wanpela tok i stori long Jisas Krais long klas. Andrey i amamas long mekim olsem. Long narapela klas bilong skelim ol buk, Andrey i ritim stori bilong em long ai bilong klas olgeta. Em i kamapim klia as na em i ting Jisas i nambawan man tru i winim olgeta narapela man i bin stap long graun. Bihain em i ritim wanpela sapta long Buk Matyu i stori long dai bilong Jisas. Andrey i lukim olsem haptaim bilong mekim tok i laik pinis, olsem na em i laik pinisim tok bilong em, tasol ol wanklas i singaut na i tok: “Stori moa long mipela! Wanem samting i kamap?” Olsem na em i kirap long ritim gen Buk Matyu i stori long kirap bek bilong Jisas.

Taim Andrey i pinisim tok, ol wanklas bilong em i mekim planti askim long Jisas na Jehova. Andrey i tok: “Mi bin beten askim Jehova long givim mi savetingting, na em i bin harim beten bilong mi. Na mi inap long bekim olgeta askim bilong ol!” Bihain long dispela klas, Andrey i givim buk Nambawan Man Tru i Winim Olgeta Narapela Mana long tisa na em i amamas long kisim. Andrey i tok moa olsem: “Tisa i givim mi gutpela mak long stori bilong mi na tok amamas long mi gat bilip bilong mi yet na mi no sem long tokaut long en. Em i tok tu olsem em i wanbel long sampela bilip bilong mi.”

Andrey i amamas long em i bin bihainim maus bilong bel em Baibel i skulim pinis na em i no ritim ol stori i daunim Jehova na Pikinini bilong em, Jisas Krais. Andrey i no laik ritim ol kain buk olsem na dispela i banisim em long ol tingting em Baibel i no as bilong en. Na tu, dispela i opim rot long em i ken autim ol bikpela tok i tru bilong Baibel long ol narapela man.

[Futnot]