Yu Save Toktok Gut Wantaim Poroman Marit?
“PAS Man o Meri i Gat 60 Krismas i Raitim Long Lewa Bilong Em.” Em nem bilong wanpela kain resis wanpela beng long Japan i bin kamapim long sampela yia i go pinis. Em i kirapim ol Japan i gat 50 i go 70 krismas long kamapim “tingting i stap tru long bel bilong ol” long poroman marit bilong ol. Wanpela man i raitim pas long meri bilong em olsem: “Ating bai yu lap, tasol bai mi bel hevi sapos mi no mekim dispela tok, orait mi laik tokim yu stret olsem: Tenkyu long yu bin maritim mi.”
Long sampela kantri, na long sampela kantri long Esia tu, ol i no save strongim ol man long kamapim tingting i stap long bel bilong ol. Tasol winim 15,000 manmeri i laik insait long dispela resis bilong raitim pas long lewa bilong ol. Planti man i laikim tru dispela resis, olsem na ol i kamapim narapela resis bihain long en, na ol i wokim sampela buk i gat tok bilong ol dispela pas. Dispela i soim olsem insait tru long bel bilong ol, planti man i gat laik long tokim gutpela poroman marit bilong ol long ol i ting olsem wanem long em. Tasol sampela i no laik mekim olsem. Bilong wanem? Ating ol i hatwok tru o ol i no gat save long pasin bilong kamapim tingting i stap long bel bilong ol long narapela man—olsem long poroman marit.
Hitoshi Kato i raitim buk i stori long taim ol man i ritaia pinis, na em i tok long Japan namel long ol marit i lapun, planti meri i go pas long katim marit, long wanem, insait long planti yia pasin bilong bel hevi long ol man bilong ol i go bikpela. Na em i tok moa: “Tasol narapela as bilong ol i katim marit, em ol marit i no save toktok gut wantaim long taim hevi i kamap.”
Taim man i ritaia long wok, em inap kirap nogut long meri bilong em i tok em i laik katim marit. Ating inap planti yia tupela marit i no bin kamapim tingting i stap long bel bilong ol, olsem narapela i ting olsem wanem long narapela. Ating man na meri i bin traim long kamapim tingting bilong ol, tasol ol i no inap toktok long gutpela pasin. Taim ol i toktok, dispela i no helpim tupela long pas gut wantaim, nogat, planti taim ol i tok pait tasol.
Olsem wanem man na meri inap toktok isi wantaim long ol hevi bilong ol na long gutpela pasin ol i kamapim tingting i stap long bel bilong ol? Mipela i laik tokim yu olsem ol nambawan gutpela tok bilong helpim ol marit i no stap long wanpela buk bilong helpim ol marit em wanpela man i raitim. Nogat. Ol dispela tok i stap long wanpela olpela buk ol man i bin amamas tru long en inap planti handet yia—em Baibel.