Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Wanem sampela as na pasin nogut i pulap long nau?

Wanpela as bilong ol pasin nogut em tingting bilong mekim ol pasin nogut i stap long bel bilong man. (Stat 8:21) Narapela samting em planti man i no klia gut long laik bilong God. Na tu, Satan i wok strong long stiaim ol samting i kamap long sindaun bilong ol man.​—1/1, pes 4-6.

• Wanem ol dispela gutpela samting bai kamap taim yumi givim tok amamas long taim stret? (Sindaun 12:25)

Dispela inap mekim man i bilip long em yet, kirapim man long mekim samting na strongim em, na em i pilim olsem em i insait long wanpela lain. Na tu, taim yumi gat laik long mekim tok amamas long narapela, dispela i helpim yumi long lukim gutpela pasin bilong ol.​—1/1, pes 16-17.

• Wanem ol samting i stap insait long Bokis Kontrak?

Em i gat tupela ston i gat tok bilong Lo na mana tu. Bihain long taim Kora i bikhet long Jehova, ol i bin putim stik wokabaut bilong Aron i go insait long dispela Bokis Kontrak​—em i stap olsem mak i kamapim bikhetpasin bilong ol Israel. (Hibru 9:4) Paslain long ol i dediketim tempel bilong Solomon, ating ol i bin rausim long Bokis Kontrak stik bilong Aron na sospen gol i gat mana long en.​—1/15, pes 31.

• Bilong wanem ol Juda long taim bilong Nehemia i mas bringim paiawut long tempel?

Lo Bilong Moses i no tokaut olsem ol man i mas bringim paiawut olsem ofa. Tasol long taim bilong Nehemia, ol i mas kisim planti paiawut moa bilong kukim ol ofa long alta.​—2/1, pes 11.

• Pepa Muratori em wanem samting?

Em i hap bilong wanpela buk manuskrip long tok ples Latin. I luk olsem ol i bin raitim pastaim long tok Grik namel long yia 170 na 200 C.E. Em i olpela rait tru i gat lista bilong ol buk bilong Ol Skripsa Grik bilong Baibel, winim ol narapela olpela rait i stap yet, na tu, em i kamapim sampela tok long ol dispela buk na i stori long ol man i bin raitim.​—2/15, pes 13-14.

• Bilong wanem Kwin Vasti bilong Persia i no laik kam long king? (Esta 1:​10-12)

Baibel i no stori i gat wanem as na em i mekim olsem. Sampela saveman i tok, kwin i no laik harim tok, long wanem, em i no laik rabisim biknem bilong em long ai bilong ol man i spak em king i bin singautim ol i kam. O ating dispela kwin i gat naispela skin tru em i no gat pasin daun, olsem na pasin nogut bilong em inap stiaim olgeta meri marit long ol provins bilong Persia.​—3/1, pes 9.

• Olsem wanem ofa bilong baim bek ol man i helpim yumi?

Ofa bilong Jisas inap baim bek yumi long sin yumi bin kisim long Adam na inap baim bek yumi long ol samting nogut sin i kamapim. (Rom 6:23) Dispela ofa i mekim na bel bilong yumi i no kotim yumi. Na taim yumi bilip long pe bilong baim bek ol man, yumi no tingting planti long yumi stap olsem wanem long ai bilong God. (1 Jon 2:1)​​—3/15, pes 8.

• Yumi inap kisim wanem skul long tok bilong Lo i tok long no ken kisim susu bilong meme na kukim pikinini bilong dispela meme long en? (Kisim Bek 23:19)

Ating pasin bilong kukim pikinini long susu bilong mama em i wanpela pasin ol haiden i bin mekim bilong kamapim ren. (Wok Pris 20:23) God i givim susu bilong mama bambai dispela i ken strongim skin bilong pikinini na helpim em i kamap bikpela. Pasin bilong kukim pikinini bilong meme long susu bilong mama bilong em i no soim rispek liklik long pasin God i bin putim na i stap namel long mama na pikinini. Dispela lo i soim yumi bikpela pasin sori bilong God.​—4/1, pes 31.