Olsem Wanem Gutpela Pasin Bai Daunim Pasin Nogut?

King Devit em i wanpela gutpela man. Em i laikim tru God, laikim stretpela pasin, na em i gat bikpela sori long ol man nating. Tasol dispela gutpela king i bin pamuk wantaim meri bilong wanpela gutpela wokman bilong em. Na taim Devit i kisim save olsem Batseba, meri bilong dispela wokman, i kisim bel long em, em i wokim rot long kilim i dai man bilong dispela meri. Em i laik haitim rong bilong em, olsem na em i maritim Batseba.​—2 Samuel 11:​1-27.

DISPELA i soim olsem ol man inap mekim gutpela pasin. Olsem na bilong wanem ol i save mekim planti pasin i nogut tru? Baibel i kamapim sampela as. Baibel i kamapim olsem long rot bilong Krais Jisas, God bai pinisim tru olgeta pasin nogut inap oltaim oltaim.

Ol i Save Tingting Long Mekim Pasin Nogut

King Devit i kamapim wanpela as bilong ol pasin nogut. Bihain long taim rong bilong em i kamap ples klia, Devit i putim asua bilong dispela rong i go long em yet. Em i pilim tru dispela rong na em i tok: “Taim mama i karim mi, mi kamap man bilong mekim pasin nogut. Taim mi stap yet long bel bilong mama, mi man bilong mekim sin.” (Song 51:5) Em i no laik bilong God long ol mama i kamapim ol pikinini na ol pikinini bai mekim sin, nogat. Tasol taim Iv na bihain Adam​—long laik bilong tupela yet ol i bikhet long God​—ol i no inap moa long kamapim ol pikinini i no gat sin. (Rom 5:12) Taim ol man i gat sin i kamap planti, ol samting ol i mekim i kamapim klia olsem “stat long taim ol manmeri i yangpela yet ol i save tingting long mekim ol pasin nogut.”​—Stat 8:21.

Sapos man i no daunim tingting bilong mekim pasin nogut, dispela tingting bai kirapim em long mekim “pasin pamuk . . . pasin birua na belhat na kros na bel nogut na mangal na pasin bilong ting long yu yet tasol na tok pait na brukim lain, na pasin bilong bel kaskas long ol man i stap gut,” na ol narapela pasin nogut em Baibel i kolim olsem “pasin bilong olpela bel.” (Galesia 5:​19-21) King Devit i bin larim laik nogut bilong skin i kirapim em long mekim pasin pamuk, na dispela i kamapim kros pait. (2 Samuel 12:​1-12) Em inap daunim dispela laik nogut bilong em. Tasol nogat, em i tingim tingim Batseba, na kirap mekim samting em disaipel Jems i stori long en, olsem: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, em i olsem meri i kisim bel, na bihain em i save kamapim sin, olsem meri i karim pikinini. Na taim sin i kamap bikpela, em i save kamapim dai.”​—Jems 1:​14, 15.

Olsem long stori i kamap paslain, pasin bilong kilim i dai planti manmeri, reipim ol meri, na bagarapim ol samting, em ol samting i save kamap taim ol man i larim ol laik nogut bilong ol i bosim ol samting ol i mekim.

Ol i No Gat Stretpela Save

Samting i painim aposel Pol i kamapim namba tu as na ol man i save mekim ol pasin nogut. I go inap long taim em i dai, Pol i kisim gutpela nem olsem man bilong pasin isi na laikim ol arapela. Em i bin givim em yet bilong helpim ol brata na sista Kristen bilong em. (1 Tesalonaika 2:​7-9) Tasol pastaim taim Pol i holim yet dispela nem Sol, em i bin ‘tok strong long bagarapim ol disaipel bilong Bikpela na kilim ol i dai.’ (Aposel 9:​1, 2) Bilong wanem Pol i orait na insait long pasin bilong mekim nogut tru long ol Kristen? Em i tok: “Mi bin mekim ol dispela pasin, long wanem, mi no bin save gut long [Krais].” (1 Timoti 1:13) Tru, Pol ‘i strong tumas long bihainim pasin God i laikim. Tasol em i no klia gut long laik tru bilong God, na em i mekim.’​—Rom 10:2.

Olsem Pol, planti gutpela man i bin mekim ol pasin nogut, long wanem, ol i no gat stretpela save long laik bilong God. Jisas i tok lukaut long ol disaipel bilong em olsem: “Bihain bai taim i kamap, na ol man i kilim yupela i dai, ol bai i ting ol i mekim gutpela wok bilong God.” (Jon 16:2) Ol samting i painim ol Witnes Bilong Jehova long nau i kamapim olsem tok bilong Jisas em i tru. Long planti kantri, ol man i tok ol i mekim wok bilong God ol i mekim nogut long ol Witnes na kilim ol i dai. Em i klia tru, pasin ol i mekim i no amamasim God tru.​—1 Tesalonaika 1:6.

Satan​—As Bilong Pasin Nogut

Jisas i kamapim as tru bilong pasin nogut. Em i tokim ol hetman bilong lotu em ol i laik kilim em i dai olsem: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai.” (Jon 8:44) Satan tasol i bin pulim Adam na Iv na ol i bikhet long God, long wanem, em i laik inapim laik bilong em yet tasol. Dispela pasin bikhet i kamapim sin na indai long olgeta manmeri.

Ol samting Satan i mekim long Jop i kamapim klia olsem Satan em wanpela kilman. Taim Jehova i larim Satan i traim bilip bilong Jop, Satan i tekewe olgeta mani kago bilong Jop tasol em i laik mekim sampela samting moa. Em i mekim na 10-pela pikinini bilong Jop i dai. (Jop 1:​9-19) Insait long yia 1900 i kam inap long yia 2000, ol manmeri i kisim hevi long pasin nogut i go bikpela nogut tru​—as bilong dispela em ol man i gat sin na ol i no gat stretpela save long laik bilong God, na tu, Satan i wok strong long stiaim ol samting i kamap long sindaun bilong ol man. Baibel i tokaut olsem ‘ol i tromoi Satan i go daun long graun, na ol i tromoi ol ensel bilong en i go daun wantaim em.’ Na tu, dispela tok profet i tokaut stret olsem Satan i no inap go bek long heven, olsem na dispela bai kamapim “bikpela hevi” long graun. Tru Satan i no inap fosim ol man long mekim pasin nogut, tasol em i hapman bilong “giamanim olgeta manmeri bilong graun.”​—KTH 12:​9, 12.

Rausim Tingting Bilong Mekim Pasin Nogut

Sapos ol man i laik pinisim tru pasin nogut long dispela graun, orait ol i mas stretim ol dispela samting olsem; laik bilong mekim pasin nogut, ol man i no gat stretpela save long laik bilong God, na strong bilong Satan long pulim ol man long mekim pasin nogut. Namba wan samting: Olsem wanem man inap rausim laik bilong mekim pasin nogut i stap long bel bilong em?

I no gat wanpela dokta o marasin ol man i kamapim inap rausim dispela laik bilong mekim pasin nogut i stap long bel bilong man. God Jehova i bin stretim pinis rot bilong rausim sin, na olgeta man husat i laik, ol inap kisim helpim long en. Aposel Jon i tok: “Blut bilong Jisas . . . i save rausim olgeta sin bilong yumi na yumi kamap klin.” (1 Jon 1:7) Taim Jisas, em man i gutpela olgeta, i givim laip bilong em, em “i karim sin bilong yumi long bodi bilong em yet. Em i mekim olsem bai yumi ken lusim pasin bilong sin olgeta, na yumi ken i stap laip na bihainim ol pasin i stret olgeta.” (1 Pita 2:24) Indai bilong Jisas olsem ofa bai rausim sin em pasin nogut bilong Adam i bin kamapim. Pol i tok Krais Jisas i kamap olsem man bilong “baim bek olgeta manmeri.” (1 Timoti 2:6) Tru tumas, dai bilong Krais i opim rot bilong olgeta manmeri i ken kamap gutpela olgeta, em dispela samting Adam i bin lusim.

Tasol ating bai yu askim, ‘Sapos dai bilong Jisas i bin kamap 2,000 yia i go pinis i opim rot bilong ol man long kamap gutpela olgeta, orait bilong wanem na pasin nogut na dai i stap yet?’ Sapos yumi painim bekim bilong dispela askim, dispela bai helpim yumi long stretim dispela namba tu as bilong pasin nogut​—ol man i no gat stretpela save long laik bilong God.

Stretpela Save i Helpim Man Long Mekim Gutpela Pasin

Taim man i kisim stretpela save long ol samting Jehova na Jisas i wok long mekim long nau bilong pinisim pasin nogut, dispela bai pasim em long mekim nating wanpela pasin nogut o “pait long God.” (Aposel 5:​38, 39) God Jehova i redi long lusim tingting long ol rong man i mekim, long wanem, em i no bin kisim stretpela save. Aposel Pol i autim tok long ol man long Atens, na em i tok: “Bipo ol man i no gat save, na God i no toktok planti long ol samting ol i bin mekim long dispela taim. Tasol nau em i tok strong long olgeta man long olgeta ples i mas tanim bel. Em i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”​—Aposel 17:​30, 31.

Pol i save olsem Jisas i kirap bek pinis, long wanem, Jisas yet i bin toktok wantaim Pol na pasim em long mekim nogut long ol Kristen long dispela taim bipo. (Aposel 9:​3-7) Taim Pol i kisim stretpela save long laik bilong God, em i senis na kamap gutpela man i bihainim pasin bilong Krais. (1 Korin 11:1; Kolosi 3:​9, 10) Na tu, Pol i givim bel long autim tok bilong “gutnius bilong kingdom.” (Matyu 24:14) Insait long dispela 2,000 yia samting kirap long taim Jisas i dai na kirap bek, Krais i bin makim ol man, na olsem Pol ol bai mekim wok king wantaim Krais long Kingdom bilong em.​—KTH 5:​9, 10.

Kirap long 1900 i kam inap long nau, ol Witnes Bilong Jehova i givim bel long inapim tok bilong Jisas: “Go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:​19, 20) Ol man i harim na bihainim dispela tok​—ol inap wet long kisim laip i stap oltaim long graun aninit long kingdom bilong Krais i stap long heven. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Wok bilong helpim man long kisim dispela save, em nambawan gutpela pasin wanpela inap mekim long narapela.

Maski pasin nogut i pulap long olgeta hap, ol man i harim na bihainim dispela gutnius bilong Kingdom, ol i mekim ol gutpela pasin olsem, ‘laikim tru ol arapela, amamas, stap bel isi, i no belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel.’ (Galesia 5:​22, 23) Ol i bihainim pasin bilong Jisas na ol i no “bekim pasin nogut” long ol narapela man. (Rom 12:17) Olgeta wan wan i wok strong long ‘mekim gutpela pasin na bai ol i daunim pasin nogut.’​—Rom 12:21; Matyu 5:44.

Pasin Nogut Bai Pinis Olgeta

Long strong bilong ol yet, ol man i no inap winim Satan, em man i as bilong pasin nogut. Tasol klostu nau, Jehova bai mekim wok long Jisas long krungutim het bilong Satan. (Stat 3:15; Rom 16:20) Na tu, Jehova bai stiaim Krais Jisas long ‘daunim na bagarapim’ olgeta wok politik, em planti bilong ol i as bilong planti pasin nogut i bin painim ol manmeri. (Daniel 2:44; Saveman 8:9) Long dispela de bilong kot, olgeta man em ol ‘i no bihainim gutnius bilong Jisas, ol bai i kisim pe nogut olsem. Ol bai i bagarap i stap oltaim oltaim.’​—2 Tesalonaika 1:​8, 9; Sefanaia 1:​14-18.

Taim Jisas i rausim pinis Satan na ol man i sapotim em, em bai stap long heven na helpim ol manmeri i abrusim bagarap long stretim bek dispela graun i kamap gutpela olsem long pastaim. Na tu, Krais bai kirapim bek ol man i dai pinis, em ol man we i stret long ol i kisim laip long dispela graun. (Luk 23:​32, 39-43; Jon 5:​26-29) Long taim em i mekim olsem, em bai rausim ol samting i givim hevi long ol manmeri.

Jehova i no inap fosim ol man long bihainim gutnius bilong Jisas. Tasol, em i opim rot long ol manmeri long kisim dispela save i bringim man long laip. Em i bikpela samting long yumi mas kisim dispela save taim rot i op yet long yumi long nau! (Sefanaia 2:​2, 3) Sapos yu mekim olsem, yu bai lain long olsem wanem yu inap karim ol hevi i painim yu long nau. Na tu, yu bai save long olsem wanem Krais bai go pas long daunim pasin nogut.​—KTH 19:​11-16; 20:​1-3, 10; 21:​3, 4.

[Piksa long pes 5]

Sol i ting pasin nogut em i mekim i stret, long wanem, em i no gat stretpela save

[Piksa long pes 7]

Wok bilong helpim man long kisim stretpela save long God em nambawan gutpela pasin wanpela inap mekim long narapela