Gutpela Pasin Inap Daunim Pasin Nogut?
KLOSTU olsem 2 tausen yia bipo Jisas i sanap long kot, tasol em i no bin mekim wanpela rong. Ol man nogut i wokim rot bilong kilim em i dai, long wanem, em i autim tok i tru. Ol i giaman na tok, em i laik daunim gavman, olsem na ol man i singaut long em i mas i dai. Namba wan gavman i laik grisim ol man na bai ol i laikim em, olsem na em i tok long Jisas i mas i dai. Em nau, i olsem ol man nogut i win, na gutpela man i lus.
Tasol long nait paslain long em i dai, Jisas i tokim ol disaipel: “Mi winim pinis strong bilong dispela graun.” (Jon 16:33) Wanem insait bilong dispela tok? Em i olsem: Pasin nogut bilong graun i no mekim em i bel nogut na em i laik bekim nogut long ol man, nogat. Ol man bilong graun i no inap subim em long bihainim pasin nogut bilong ol. (Rom 12:2) Taim em i laik i dai em i beten long helpim ol man i wok long kilim em i dai; em i tok: “Papa, yu ken lusim sin bilong ol. Ol i no save long dispela samting ol i mekim.”—Luk 23:34.
Inap long taim Jisas i dai, em i kamapim klia olsem yumi inap winim pasin nogut. Em i laik kirapim lain bilong em bambai ol yet i mas mekim pait bilong daunim pasin nogut. Ol i ken mekim olsem wanem? Ol i mas bihainim tok bilong Baibel, olsem “no ken bekim pasin nogut long ol” man, na ol i mas ‘mekim gutpela pasin na bai ol i daunim pasin nogut.’ (Rom 12:17, 21) Tasol sapos ol i mekim olsem, dispela inap helpim ol tru?
Ol i Daunim Pasin Nogut Long Dakau
Wanpela meri bilong Jemani, nem bilong em Else, em i bin kalabus long Dakau, na em i givim wanpela gutpela presen tru long wanpela yangpela meri Rasia i gat 14 krismas—em i givim bilip long yangpela meri na em inap wetim gutpela samting bai kamap bihain.
Dakau em i wanpela banis kalabus nogut tru—ol i bin kilim i dai planti tausen manmeri, na ol i bin mekim nogut tru long planti handet moa, olsem dispela yangpela meri Rasia, na ol i kisim bikpela pen tru. I olsem Dakau i as bilong olgeta pasin nogut. Tasol gutpela samting i kamap long dispela ples nogut.
Ol was bilong haus kalabus ol i bin repim mama bilong yangpela meri long ai bilong em. Else i sori nogut tru long yangpela meri na em i wok long painim rot bilong toktok wantaim meri long tok promis bilong Baibel long ol man i dai pinis bai kirap bek. Else i skulim yangpela meri long em i no ken bel nogut long ol man. Else i helpim em gut na em i winim dispela bikpela pen na hevi long Dakau na em i no i dai.
Else inap kisim bagarap long dispela wok em i mekim bilong helpim yangpela meri Rasia, tasol em i laik bihainim pasin bilong Jisas, em i no bin tingim skin bilong em yet—em i tingim ol narapela man. Else em i wanpela Witnes Bilong Jehova, na em i bin lain olsem yumi no ken bekim nogut long man, na bilip bilong em i kirapim em long lainim ol narapela man olsem. Em i bin kisim bikpela pen na hevi long Dakau, tasol em i winim pasin nogut na strong bilong dispela gavman nogut. Na i no Else tasol i bin mekim olsem.
Long wanpela buk, Pol Jonson (Paul Johnson) i tok, ‘[Ol Witnes Bilong Jehova] ol i sanap strong na ol i no helpim gavman bilong Hitler. Klostu olgeta i bin kisim nogut long dispela gavman.’ (A History of Christianity) Olsem wanem? Ol i bin lus long daunim pasin nogut? Long wanpela buk (Values and Violence in Auschwitz) wanpela meri (Anna Pawelczynska) em i tok long ol Witnes olsem: ‘Dispela liklik lain kalabus i sanap strong long bilip na ol i winim strong bilong gavman bilong Hitler.’
Tru, planti bilong yumi i no gat dispela kain hevi yumi mas winim. Tasol yumi gat pait long daunim tingting nogut i stap long bel bilong yumi na i laik kirapim yumi long mekim pasin nogut. I olsem yumi gat pait long yumi yet.
Daunim Pasin Nogut i Stap Long Bel
Aposel Pol i tok long dispela pait olsem: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.” (Rom 7:19) Pol i pilim pinis, sampela taim i hatwok long mekim gutpela pasin, long wanem, skin i no laik mekim.
Oikenyoa em i yangpela man Spen, na inap tupela yia em i gat pait long daunim laik nogut i stap long bel bilong em. Em i tok, ‘Kirap long taim mi liklik yet, laik nogut bilong mekim pasin pamuk i stap long bel bilong mi. Taim mi yangpela man, mi save mekim pasin sodom.’ Orait, wanem samting i kirapim Oikenyo na em i laik lusim dispela pasin nogut?
Oikenyo i tok, ‘Mi laik bai God i orait long mi, na mi kisim save long Baibel olsem God i no orait long dispela pasin mi save mekim. Olsem na mi pasim tok long bel olsem mi mas kamap narapela kain man na bihainim ol lo bilong God. Long olgeta de mi mas wok strong long daunim ol tingting nogut i save kamap long bel. Tasol mi strong long mi mas winim dispela pait, olsem na oltaim mi beten askim God long helpim mi. Tupela yia bihain, i olsem mi winim pinis dispela pait, tasol mi mas strong yet long bosim skin bilong mi. Dispela hatwok bilong mi i kamapim gutpela samting olsem: Mi no sem moa long i stap bilong mi, na mi marit pinis na marit bilong mi i gutpela, na bikpela samting tru, em mi stap pren bilong God. Mi save pinis, yumi inap tru long rausim ol tingting na laik nogut i stap long bel taim ol i no kamapim yet ol pasin nogut. Yumi mas wok strong long mekim na no ken les.’
Taim yumi rausim wanpela tingting nogut o yumi no laik bekim nogut long man, em nau, gutpela pasin i daunim pasin nogut. Tru, yumi amamas taim yumi daunim strong bilong pasin nogut, tasol tupela as bilong pasin nogut i stap yet: Maski yumi strong tru long daunim sin i stap long skin bilong yumi, yumi no inap daunim olgeta; na narapela as, em Satan i stap yet na em i givim tingting nogut long ol man. Orait yumi laik save, dispela pasin bai senis?
Strong Bilong Satan Bai Pinis
Jisas i stap gut long God i go inap long em i dai, na dispela i daunim tru strong bilong Satan. Na Satan i strong long kirapim Jisas long lusim God, tasol Jisas i sanap strong, na dispela i makim olsem bihain bai Satan i pinis. Olsem Baibel i tok, Jisas i dai bambai “em i ken bagarapim Satan.” (Hibru 2:14) Taim Jisas i kirap bek long matmat em i tokim ol disaipel: “God i givim mi bikpela namba na strong bilong bosim olgeta samting long heven na long graun.” (Matyu 28:18) Na em bai mekim wok long dispela strong bambai em i ken pinisim ol wok nogut bilong Satan.
Hap bilong Kamapim Tok Hait long Baibel i stori long taim Jisas bai rausim Satan long heven, na dispela man nogut wantaim ol ensel nogut bilong em, ol i mas kalabus i stap long hap bilong dispela graun. Olsem na Baibel i toksave olsem pasin nogut bai go bikpela tru: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”—KTH 12:7-9, 12.
Ol tok profet bilong Baibel i makim olsem dispela bikpela samting i kamap pinis—olsem long taim bilong Namba Wan Pait Bilong Olgeta Hap.b Olsem na long nau pasin nogut i go bikpela tru. Tasol liklik taim nau na Satan bai kalabus olgeta na em i no inap kirapim ol man long mekim pasin nogut.—Lukim KTH 20:1-3.
Bihain long dispela, olsem wanem long ol man bilong graun?
‘Ol i No Ken Mekim Nogut Long Narapela’
Jisas i stap King long Kingdom, na liklik taim em bai mekim wok long ‘namba na strong bilong em’ na stretim wok bilong skulim ol manmeri long ol samting bilong spirit. “Yu save . . . skulim ol [manmeri bilong yu] long stretpela pasin.” (Aisaia 26:9) “Bai i no gat wanpela i mekim nogut long narapela, long wanem, olgeta samting long graun bai i save tru long [Jehova].”—Aisaia 11:9.
Nau tu yumi inap daunim planti laik nogut bilong bel. Na taim Satan i no i stap moa, bai yumi no hatwok long “givim baksait long pasin nogut, na bihainim gutpela pasin tasol.”—1 Pita 3:11.
Yumi ken bilip tru olsem gutpela pasin bai daunim pasin nogut, long wanem, God em i gutpela Man, na ol man i gat laik long mekim gutpela pasin, em bai helpim ol long daunim pasin nogut. Ol samting Jisas i bin mekim i kamapim klia dispela samting. (Song 119:68) Ol man i wok strong long daunim pasin nogut ol inap tingting long i stap long gutpela klinpela graun em Kingdom bilong God i bosim, em wanpela gavman i gat wok long pinisim olgeta pasin nogut. Baibel i tok: “Long dispela taim bai ol manmeri i laikim tru ol arapela na mekim gutpela pasin long ol. Na bai ol i stap stret na bel isi na sindaun gut wantaim.”—Song 85:10, 11.
[Ol Futnot]
a Dispela i no nem tru bilong em.
b Bilong kisim sampela save moa long dispela samting, lukim buk Yu Inap i Stap Oltaim Long Paradais Long Graun, pes 20-22, em Sosaiti Wastaua bilong Nu Yok i wokim.