Gutpela Pasin na Pasin Nogut—Tupela i Save Pait

LONG ol stori i save kamap long piksa wokabaut bilong bipo, ol “gutpela man” i save win na daunim ol man nogut. Tasol ol samting i save kamap tru long graun i no olsem​—⁠planti taim ol man nogut i save win na daunim gutpela man.

Ol ripot i kamap long ol nius na redio samting long olgeta de ol i kamapim klia ol samting nogut ol man i save mekim long nau. Long Amerika, wanpela man bilong Milwoki i kilim i dai 11-pela man na em i katkatim skin bilong ol na haitim long bokis ais. Na long Teksas wanpela man i holim gan na i go insait long haus kaikai na sutim 22 man na kilim ol i dai, na bihain em i kilim i dai em yet. Na long Korea wanpela man i bel nogut long ol Witnes Bilong Jehova na em i kukim Haus Kingdom na kilim i dai 14 manmeri ol i mekim lotu.

Tru, ol dispela kain samting nogut i save kamap long ol wan wan hap tasol. Tasol i gat wanpela samting i kamap, em i nogut moa yet na i kisim planti kantri​—⁠em pasin bilong pinisim wanpela lain olgeta. Long taim bilong yumi sampela lain politik samting ol i laik pinisim narapela lain, olsem: Ol i kilim i dai wan milion manmeri bilong Amenia, na 6 milion Juda, na wan milion Kambodia. Na long hap bipo ol i kolim Yugoslavia, sampela i wok strong long pinisim wanpela lain olgeta, na planti ol i bagarap. Na yumi no save hamas manmeri moa i wok long kisim bagarap long ol narapela hap na ol man i mekim nogut tru long ol.

Orait, bilong wanem ol man i save mekim pasin nogut olsem? Yumi no ken tok, wan wan man em tingting i paul, ol tasol i save mekim. Nogat. Nau dispela pasin i go bikpela na i kamap long olgeta hap.

Taim man i mekim wanpela pasin nogut, i no olsem em i mas mekim olsem. Em i ken mekim gutpela pasin o em i ken mekim pasin nogut. Tasol ating tingting bilong em i go nogut na em i no inap skelim wanem pasin i stret na wanem pasin i no stret, na nau pasin nogut i win na em i kirap mekim. Tasol yumi laik save, i gat wanem as na dispela kain pasin i kamap? na em i kamap olsem wanem?

Ol lotu i gat kain kain tingting long dispela, olsem wanpela bikman bilong lotu Katolik (Thomas Aquinas), em i tok, ‘Sapos God i no larim pasin nogut i kamap, bai yumi lus long planti gutpela samting.’ Na planti man bilong lotu Talatala i gat nem, ol tu i gat wankain tingting, olsem pasin nogut i mas i stap na bai yumi ken pilim tru gutpela pasin na amamas long en. Tasol dispela tingting i no stret, a? I olsem yumi tokim wanpela man i gat sik kensa, em i mas i gat dispela sik na bai ol narapela man i ken amamas long ol yet i no gat sik!

Tasol ol man i save kisim we dispela laik long mekim pasin nogut? Yu ting God i gat hap asua? Baibel i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ ” Orait, sapos God i no gat asua, husat i gat asua? Baibel i tok moa olsem: “Laik nogut bilong yumi yet i save grisim yumi na giamanim yumi, bilong kirapim yumi long mekim sin.” (Jems 1:​13-15) Taim wanpela laik nogut i kamap long bel na man i wok long tingim na em i no rausim, em bai kirap mekim dispela samting nogut. Tasol i no dispela as tasol na ol man i mekim pasin nogut.

Baibel i tok, ol laik nogut i save kamap long bel, long wanem, sin i stap long yumi. Aposel Pol i tok: “Wanpela man i bin mekim sin, na . . . sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Sin i mekim na yumi save tingim yumi yet tasol, na yumi no mekim gut long ol man; na laik bilong mekim nogut long man, dispela i daunim laik bilong mekim pasin sori.

Tru planti man i save, wanem pasin i no stret. Olsem Pol i tok, “lo God i bin raitim long bel bilong ol” olsem maus bilong bel, em i save pasim ol long mekim pasin nogut. (Rom 2:15) Tasol sapos man i go bikpela namel long pasin nogut na pasin bilong bagarapim man, dispela bai daunim gutpela pasin long bel bilong em; na sapos man i sakim maus bilong bel, dispela inap mekim na bel i no inap kotim em moa.a​—⁠Lukim 1 Timoti 4:⁠2.

Tasol olsem wanem? Dispela tasol i as na pasin bilong bagarapim man i go bikpela tru? Wanpela saveman (Jeffrey Burton Russell) i tok, ‘Tru pasin nogut i stap long bel bilong yumi olgeta, tasol dispela i no as na man inap mekim samting nogut tru olsem i bin kamap long [bikpela banis kalabus] Auswis. Pasin nogut ol i mekim i narapela kain tru, na ol i mekim long bikpela lain tru.’ Jisas yet i kamapim as tru bilong pasin nogut ol man i save mekim.

Paslain liklik long taim Jisas i dai, em i tokaut olsem, ol man i tingting long kilim em i dai, i gat wanpela man i stiaim tingting bilong ol. Jisas i tokim ol: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai.” (Jon 8:44) Satan, em “hetman i save bosim dispela graun” olsem Jisas i tok, em i save kirapim ol man long mekim pasin nogut.​—⁠Jon 16:11; 1 Jon 5:19.

Sin i stap long skin bilong man, na Satan i stiaim ol man, na dispela i mekim na planti man i kisim bikpela pen moa inap planti tausen yia. Na i olsem dispela pasin nogut i no ken pinis liklik. Olsem wanem? Pasin nogut bai stap oltaim? o bihain gutpela pasin bai pinisim olgeta pasin nogut?

[Ol Futnot]

[Piksa Kredit Lain long pes 2]

Cover: U.S. Army photo

[Piksa Kredit Lain long pes 3]

U.S. Army photo