Ol Wasman Husat i Stap Gutpela Piksa

“Lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim dispela wok . . . Yupela i mas i gat laik tru long mekim . . . Yupela i mas mekim gutpela pasin tasol, bai ol i ken lukim na bihainim.”​—1 PITA 5:​2, 3.

1, 2. (a) Jisas i givim wanem gutpela wok long aposel Pita? I gat wanem as na Jisas i ken bilip long Pita? (b) Jehova i ting wanem long ol wasman em i bin makim?

PASLAIN long Pentikos bilong 33 C.E., Pita na sikspela arapela disaipel i kisim kaikai bilong moningtaim Jisas i bin redim long nambis bilong raunwara Galili. Dispela i no namba wan taim Pita i lukim Jisas bihain long Em i bin kirap bek, na ating em i amamas tru long save olsem Jisas i stap laip. Tasol ating Pita i tingting planti. Sampela de paslain long dispela, em i bin tokaut long ai bilong ol man olsem em i no save long Jisas. (Luk 22:​55-60; 24:34; Jon 18:​25-27; 21:​1-14) Yu ting Jisas i bin kotim Pita long bilip bilong em i no strong? Nogat. Jisas i givim gutpela wok long Pita long givim kaikai na lukautim ol “pikinini sipsip” bilong em. (Jon 21:​15-17) Olsem stori bilong Baibel long kongrigesen Kristen bilong pastaim i kamapim, i gat as na Jisas i ken bilip long Pita. Pita wantaim ol arapela aposel na ol hetman long Jerusalem ol i bin lukautim kongrigesen Kristen long taim bilong ol bikpela traim na taim bikpela lain man i kam insait hariap long kongrigesen.​—Aposel 1:​15-26; 2:14; 15:​6-9.

² Long nau, long rot bilong Jisas Krais, Jehova, i makim ol man long stap olsem wasman i lukautim ol sipsip long ol samting bilong lotu. Em i givim wok long ol wasman long soim rot long ol sipsip bilong Em long dispela bikpela taim nogut i painim ol man. (Efesus 4:​11, 12; 2 Timoti 3:1) Yu ting i gat as na Jehova i ken bilip long ol dispela man? Yes, pasin wanbel namel long ol brata Kristen long olgeta hap i kamapim ples klia dispela. Tru, ol dispela wasman em ol man bilong popaia, wankain olsem Pita. (Galesia 2:​11-14; Jems 3:2) Tasol Jehova i bilip olsem ol inap lukautim ol sipsip “em i bin baim long blut bilong Pikinini bilong em yet.” (Aposel 20:28) Jehova i laikim tru ol dispela man, em i ting i stret ol arapela i ‘givim biknem long ol.’​—1 Timoti 5:17.

3. Olsem wanem ol wasman i holimpas pasin bilong amamas na laik tru long mekim wok?

³ Olsem wanem ol wasman i holimpas pasin bilong amamas na laik tru long mekim wok, na long dispela rot ol i stap gutpela piksa? Olsem Pita na ol arapela wasman long taim bilong ol aposel, ol i bilip long holi spirit bilong God, na dispela holi spirit i strongim ol inap long ol i ken mekim wok. (2 Korin 4:7) Na holi spirit i helpim ol long kamapim ol pasin holi spirit i as bilong en​—pasin laikim, amamas, bel isi, no belhat kwik, pasin helpim, gutpela pasin, bilip, stap isi, na daunim laik bilong olpela bel. (Galesia 5:​22, 23) Yumi ken skelim sampela rot we ol wasman i stap gutpela piksa long kamapim ol dispela pasin long taim ol i lukautim ol sipsip bilong God i stap long han bilong ol.

Laikim Tumas Lain Sipsip na Ol Sipsip Wan Wan

4, 5. (a) Olsem wanem Jehova na Jisas i kamapim olsem ol i laikim lain sipsip? (b) Wanem sampela wok ol wasman bilong sipsip i save mekim na dispela i kamapim olsem ol i laikim tru lain sipsip?

⁴ Nambawan gutpela pasin em holi spirit bilong God i kamapim em pasin laikim. Jehova i kamapim olsem em i laikim lain sipsip taim em i givim ol kaikai bilong spirit long ol. (Aisaia 65:​13, 14; Matyu 24:​45-47) Tasol em i no givim kaikai tasol long ol, nogat. Em i tingim na laikim olgeta wan wan sipsip. (1 Pita 5:​6, 7) Jisas tu i laikim tumas lain sipsip. Em i lusim laip bilong em long helpim ol, na em i save long ol sipsip wan wan, “em i save kolim nem bilong ol wan wan.”​—Jon 10:​3, 14-16.

⁵ Ol wasman i save bihainim pasin bilong Jehova na Jisas. Ol i kamapim olsem ol i laikim tru lain sipsip taim ol i ‘wok long skulim gut’ kongrigesen. Ol tok bilong Baibel ol i mekim i givim kaikai long ol sipsip na i lukautim ol, dispela wok ol i mekim i stap ples klia we olgeta inap lukim. (1 Timoti 4:​13, 16) Tasol samting i no stap ples klia tumas, em haptaim ol i lusim long stretim ol ripot samting, ol pas, wokim ol sediul, na long lukautim planti narapela samting na bai ol miting bilong kongrigesen na ol arapela samting i ron gut. (1 Korin 14:40) Ol dispela wok i no samting ol narapela i lukim ol i mekim na ating ol narapela i no save tok tenkyu long en. Tru tumas, pasin laikim i as na ol i mekim dispela wok.​—Galesia 5:13.

6, 7. (a) Wanem wanpela rot ol wasman i bihainim bilong save gut moa long ol sipsip? (b) Bilong wanem i gutpela long kamapim bel bilong yumi long wanpela elda?

⁶ Ol gutpela wasman i wok strong long tingim olgeta wan wan sipsip long kongrigesen. (Filipai 2:4) Wanpela rot ol wasman i bihainim bilong save gut moa long ol wan wan sipsip, em long rot bilong wok wantaim ol long taim bilong autim tok. Planti taim Jisas i raun autim tok wantaim ol disaipel na long kain taim olsem em i givim ol gutpela tok bilong strongim ol. (Luk 8:1) Wanpela wasman Kristen i save gut long wok i tok: “Long tingting bilong mi, nambawan gutpela rot long save gut long wanpela brata o sista na strongim ol em long wok wantaim ol long autim tok.” Sapos longpela taim liklik yu no bin wok wantaim wanpela elda long autim tok, stretim rot kwiktaim long mekim olsem.

⁷ Pasin laikim i bin kirapim Jisas long pilim amamas na bel hevi bilong ol lain bilong em. Olsem: Taim 70 disaipel i kam bek na ol i amamas tru long wok autim tok bilong ol, Jisas i “amamas.” (Luk 10:​17-21, lukim sta long Luk 10:1) Tasol long taim em i lukim samting dai bilong Lasarus i bin mekim long Maria na ol famili bilong em na long ol pren, “Jisas i krai.” (Jon 11:​33-35) Olsem tasol, ol gutpela wasman long nau i save pilim ol samting i kamap long bel na tingting bilong ol sipsip. Pasin laikim i kirapim ol long ‘amamas wantaim ol man i amamas. Na krai wantaim ol man i krai.’ (Rom 12:15) Sapos samting i mekim yu amamas o yu bel hevi, orait no ken surik long kamapim dispela long ol wasman Kristen. Stori bilong ol samting i givim amamas long yu bai strongim bel bilong ol. (Rom 1:​11, 12) Taim ol i save long ol traim i painim yu, dispela bai helpim ol long strongim yu na mekim gut bel bilong yu.​—1 Tesalonaika 1:6; 3:​1-3.

8, 9. (a) Wanpela elda i bin mekim wanem bilong kamapim pasin laikim long meri bilong em? (b) Olsem wanem em i bikpela samting long wasman i kamapim pasin laikim long famili bilong em?

⁸ Pasin laikim wasman i mekim long famili bilong em yet i kamapim klia tingting bilong em long lain sipsip. (1 Timoti 3:​1, 4) Sapos em i marit, orait taim em i kamapim olsem em i laikim na litimapim nem bilong meri bilong em, em i makim gutpela piksa ol arapela man marit i ken bihainim. (Efesus 5:25; 1 Pita 3:7) Tingim tok bilong Linda, em wanpela meri Kristen. Man bilong em i bin mekim wok wasman winim 20 yia paslain long em i dai. Linda i tok: “Olgeta taim man bilong mi i bisi stret long lukautim ol samting bilong kongrigesen. Tasol pasin em i mekim long mi i kirapim mi long pilim olsem mitupela i wanwok tru. Planti taim em i tok tenkyu long mi sapotim em, na mipela i save poroman wantaim taim em i no mekim wok bilong kongrigesen. Olsem na mi pilim olsem em i laikim mi tru na mi no bel hevi long ol haptaim em i lusim bilong helpim kongrigesen.”

⁹ Ol wasman Kristen husat i gat ol pikinini em ol i save stretim ol long pasin sori na oltaim ol i mekim tok amamas long ol. Ol dispela wasman i stap gutpela piksa ol arapela papamama i ken bihainim. (Efesus 6:4) Pasin laikim em i mekim long famili i kamapim klia tru olsem i stret em i holim wok holi spirit i makim em long mekim.​—1 Timoti 3:​4, 5.

Pasin Bilong Toktok Gut i Kamapim Amamas na Bel Isi

10. (a) Wanem samting inap bagarapim amamas na bel isi bilong kongrigesen? (b) Wanem tok pait i kamap na dispela inap bagarapim bel isi bilong kongrigesen long taim bilong ol aposel? Ol i mekim wanem bilong stretim dispela hevi?

¹⁰ Holi spirit inap kamapim amamas na bel isi long bel bilong wanpela Kristen, long wanpela lain elda, na long kongrigesen olgeta. Tasol sapos i no gat pasin bilong toktok gut wantaim, dispela inap bagarapim dispela amamas na bel isi. Solomon i bin tok: “Sapos man i no toktok gut wantaim ol narapela, ol samting em i laik mekim i no inap kamap gut.” (Sindaun 15:​22, NW) Tasol pasin bilong soim rispek na toktok klia na stret wantaim narapela i save kamapim amamas na bel isi. Olsem: Taim tok pait long pasin bilong katim skin i laik bagarapim bel isi bilong kongrigesen long taim bilong ol aposel, lain hetman long Jerusalem i laik bai holi spirit i ken stiaim tingting bilong ol. Ol i kamapim ol narapela narapela tingting bilong ol long pasin bilong katim skin. Ol i toktok gut wantaim i go i go na bihain ol i kamapim disisen bilong ol. Olgeta hetman i wanbel long disisen ol i kamapim, na taim ol i tokaut long dispela long ol kongrigesen, ol brata “ol i amamas long kisim dispela gutpela tok bilong strongim ol.” (Aposel 15:​6-23, 25, 31; 16:​4, 5) Dispela i kamapim amamas na bel isi.

11. Ol elda i ken mekim wanem bilong kamapim amamas na bel isi insait long kongrigesen?

¹¹ I wankain long nau, long rot bilong toktok gut wantaim ol arapela, ol wasman i wok long kamapim amamas na bel isi. Taim ol hevi i laik bagarapim bel isi bilong kongrigesen, ol i bung wantaim na olgeta i kamapim tingting bilong ol. Long pasin rispek ol i putim yau long tok bilong ol arapela wasman. (Sindaun 13:10; 18:13) Pastaim ol i beten askim God long givim holi spirit. Bihain ol i skelim ol stiatok bilong Baibel na ol tok “wokboi i gat gutpela tingting” i kamapim long ol buk samting na ol i wokim ol disisen. (Matyu 24:​45-47; 1 Korin 4:6) Taim lain elda i kamapim wanpela disisen em Baibel i as bilong en, orait olgeta elda i sapotim disisen em holi spirit i stiaim ol long mekim, maski wanpela bilong ol i gat narapela tingting. Gutpela pasin daun bilong ol i save kamapim amamas na bel isi na i stap gutpela piksa ol sipsip i ken bihainim taim ol i lotuim God. (Maika 6:8) Olsem wanem? Long pasin daun yu save bihainim ol disisen em Baibel i as bilong en, em ol wasman bilong kongrigesen i kamapim?

No Ken Les Kwik, Mekim Pasin Helpim

12. Bilong wanem Jisas i mas kamapim pasin helpim na no ken les kwik long ol aposel?

¹² Maski ol aposel i mekim rong planti taim, ol samting Jisas i mekim i soim olsem em i no les kwik long ol na em i mekim pasin helpim. Olsem: Planti taim Jisas i laik kirapim ol long kisim tingting olsem pasin daun em i bikpela samting. (Matyu 18:​1-4; 20:​25-27) Tasol long laspela nait bilong Jisas hia long dispela graun, na bihain liklik long em i bin wasim lek bilong ol bilong skulim ol long pasin daun, “ol disaipel i stat long pait long toktok long husat em i namba wan bilong ol.” (Luk 22:24; Jon 13:​1-5) Yu ting Jisas i bin krosim ol aposel? Nogat, long pasin isi em i toktok gut wantaim ol na i tok: “Husat em i namba wan? Ating man i sindaun kaikai o wokman i sutim kaikai na bringim i kam long en? Namba wan em dispela man i sindaun kaikai, em tasol. Tasol mi stap namel long yupela olsem wokman bilong helpim yupela.” (Luk 22:27) Pasin bilong Jisas long no ken les kwik, kamapim pasin helpim, na i stap gutpela piksa, dispela i mekim na bihain ol aposel i pilim dispela samting long bel.

13, 14. Ol wasman i mas kamapim pasin helpim moa yet long wanem taim?

¹³ Na olsem tasol, ating planti taim wanpela wasman bilong kongrigesen i mas stretim wanpela brata husat i save mekim wankain rong. Dispela inap mekim na wasman inap kros long dispela brata. Tasol taim wasman i wok long “stretim pasin bilong ol man,” em i save tingim olsem em tu i save popaia. Dispela i mekim na em inap kamapim pasin helpim long brata na em i no les kwik long em. Long dispela rot em i bihainim pasin bilong Jisas na Jehova, em ol i save mekim ol dispela pasin long olgeta Kristen​—na long ol wasman tu.​—1 Tesalonaika 5:14; Jems 2:13.

¹⁴ Sampela taim ol wasman i mas givim sampela strongpela tok kaunsel long brata i bin mekim bikpela sin. Sapos dispela brata i no tanim bel ol wasman i mas rausim em long kongrigesen. (1 Korin 5:​11-13) Tasol maski ol i mas mekim olsem, long tok na pasin ol i mekim, ol wasman bai kamapim olsem ol i nolaik tru long sin man i mekim, i no olsem ol i no laikim dispela sinman. (Jut 23) Gutpela pasin ol wasman i mekim long man i mekim sin inap helpim sipsip i lus long kam bek insait long lain sipsip.​—Luk 15:​11-24.

Bilip i Kirapim Man Long Mekim Gut Long Ol Narapela

15. Wanem wanpela rot we ol wasman i kamapim gutpela pasin bilong Jehova? Wanem samting i kirapim ol long mekim olsem?

¹⁵ Jehova “i save mekim gutpela pasin long olgeta manmeri.” Em i mekim olsem long ol man husat i no save tenkyu long ol samting em i mekim bilong helpim ol. (Song 145:9; Matyu 5:45) Samting i kamapim tru gutpela pasin bilong Jehova em pasin bilong em long salim ol manmeri bilong em long autim “gutnius bilong kingdom” long ol narapela. (Matyu 24:14) Ol wasman i kamapim gutpela pasin bilong God taim ol i go pas long mekim wok autim tok. Wanem samting i kirapim ol long no ken les long mekim ol dispela wok? Ol i bilip strong long Jehova na ol promis bilong em.​—Rom 10:​10, 13, 14.

16. Olsem wanem ol wasman i ken “mekim gutpela pasin” long ol sipsip?

¹⁶ Ol wasman i save “mekim gutpela pasin long ol arapela” taim ol i autim tok, na tu, ol i gat wok long strong tru long mekim “gutpela pasin long ol arapela manmeri i bilip long Bikpela.” (Galesia 6:10) Wanpela rot ol i save mekim olsem em taim ol i mekim ol visit bilong wasman bilong strongim ol brata. Wanpela elda i tok: “Mi save amamas long mekim ol visit bilong wasman. Dispela i save opim rot long mi ken tok amamas long ol brata na sista long ol gutpela wok ol i mekim na helpim ol long save olsem mipela i tingim tru hatwok bilong ol.” Sampela taim ol wasman inap tokim ol brata long ol samting ol i ken mekim bilong mekim gut moa wok bilong Jehova. Taim ol i mekim olsem, ol wasman i gat savetingting ol i save bihainim pasin bilong aposel Pol. Skelim pasin bilong em long toktok wantaim ol brata long Tesalonaika: “Bikpela i mekim mipela i save gut olsem, yupela i mekim olgeta pasin mipela i tok long yupela i mas mekim. Na bihain tu yupela bai i mekim olsem tasol.” (2 Tesalonaika 3:4) Ol kain tok i kamapim olsem wasman i bilip tru long sipsip na dispela i kirapim ol sipsip long mekim gutpela pasin. Na tu, dispela i mekim na ol sipsip i no hatwok long bihainim tok bilong ol wasman. (Hibru 13:17) Taim ol wasman i kam visitim yu na dispela i strongim yu, em gutpela sapos yu tok tenkyu long ol.

Bilong Mekim Pasin Isi, No Ken Belhat Kwik

17. Pita i bin kisim wanem skul long Jisas?

¹⁷ Jisas i bin mekim pasin isi long ol man, maski man i skrapim bel bilong em. (Matyu 11:29) Taim ol i kamapim em long ol birua na holimpasim em, Jisas i kamapim pasin isi na em i bosim gut bel bilong em. Wantu Pita i kamautim bainat bilong bekim pait. Tasol Jisas i tokim em: “Ating yu no save, mi inap askim Papa bilong mi, na em bai i salim planti ensel moa, i winim 12-pela lain ami, na ol bai i kam helpim mi?” (Matyu 26:​51-53; Jon 18:10) Dispela i bin skulim gut Pita na bihain em i tokim ol Kristen: “Krais tu i bin karim pen bilong . . . soim yupela pinis dispela pasin bilong em, bai yupela i ken bihainim. . . . Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat.”​—1 Pita 2:​21-23.

18, 19. (a) Long wanem taim ol wasman i mas kamapim moa yet pasin bilong isi long narapela na bosim gut bel? (b) Bai yumi skelim wanem ol askim bihain?

¹⁸ Na olsem tasol, ol gutpela wasman i save mekim pasin isi maski ol man i no mekim stretpela pasin long ol. Olsem: Sampela insait long kongrigesen ol i no amamas taim ol wasman i laik helpim ol. Sapos pasin bilong brata long pas gut wantaim God i no strong tumas, orait taim wasman i mekim sampela tok bilong stretim em, brata inap mekim tok i “bagarapim bel . . . olsem bainat i sutim” dispela wasman. (Sindaun 12:18) Tasol ol wasman i bihainim pasin bilong Jisas na ol i no mekim tok bilong bagarapim bel bilong narapela o mekim sampela samting bilong bekim pe nogut long narapela. Nogat. Ol i bosim gut bel na kamapim olsem ol i tingim tru narapela. Dispela inap kamapim gutpela samting long man i mas kisim helpim. (1 Pita 3:​8, 9) Olsem wanem? Yu save bihainim pasin bilong ol elda long mekim pasin isi na bosim gut bel taim yu kisim tok kaunsel?

¹⁹ Tru tumas, Jehova na Jisas i amamas long bikpela wok em planti tausen wasman i amamas long mekim bilong lukautim lain sipsip i stap long olgeta hap. Na tu, Jehova na Pikinini bilong em i laikim tumas ol planti tausen kongrigesen sevan husat i helpim ol elda long ‘helpim ol manmeri bilong God.’ (Hibru 6:10) Tasol i gat wanem as na sampela brata husat i baptais pinis ol i no laik mekim dispela “gutpela wok”? (1 Timoti 3:1) Na olsem wanem Jehova i save skulim ol man em i makim ol long kamap wasman? Bai yumi skelim ol dispela askim long stadi i kamap bihain long dispela.

Yu Inap Tingim?

• Wanem sampela rot we ol wasman i save kamapim pasin laikim long ol sipsip?

• Olgeta long kongrigesen i ken mekim wanem bilong kamapim amamas na bel isi?

• Bilong wanem ol wasman i no save kros kwik na ol i mekim gutpela pasin long ol brata taim ol i givim tok kaunsel long ol?

• Ol elda i mekim wanem bilong kamapim gutpela pasin na pasin bilong bilip?

[Piksa long pes 18]

Pasin laikim i save kirapim ol elda long mekim wok bilong helpim kongrigesen

[Ol Piksa long pes 18]

Ol i save lusim sampela haptaim long kisim amamas wantaim famili bilong ol . . .

. . . na long autim tok wantaim ol

[Piksa long pes 20]

Pasin bilong ol elda long toktok gut wantaim i save kamapim amamas na bel isi insait long kongrigesen