No Ken Pret​—Jehova i Stap Wantaim Yu!

WINIM 50 yia i go pinis, bihain liklik long taim ol i bin tromoi ol namba wan bom nuklia, saientis Harold C. Urey husat i bin winim Prais Nobel, em i stori long ol samting bai kamap bihain na em i tok: “Bai yumi pret na yumi kaikai, yumi pret na yumi slip, yumi pret na yumi wokabaut, yumi pret na yumi dai.” Na tru tumas, long nau ol man i pret long planti samting, na i gat as na ol i pret! Long olgeta de ol niuspepa i stori long ol samting nogut tru ol lain teroris i mekim, na pasin bilong bagarapim man, na ol narakain sik nogut i kamap.

Yumi ol Kristen i save long as na ol dispela hevi i kamap. Ol i makim olsem yumi stap long “taim bilong las de” bilong pasin nogut bilong dispela graun, na Baibel i tok profet olsem “planti hevi nogut tru bai i kamap” long dispela taim. (2 Timoti 3:1) Olsem na yumi inap bilip tru olsem klostu nau God Jehova bai kamapim nupela taim em stretpela pasin tasol bai stap long en. (2 Pita 3:13) Tasol long nau yu ting yumi ol Kristen i no save pret long ol samting nogut i kamap?

Lain Bilong God na Pasin Bilong Pret

Jekop, Devit, na Elaija em sampela wokman bilong Jehova i bin pret taim ol i lukim olsem bagarap inap painim ol. (Stat 32:​6, 7; 1 Samuel 21:​11, 12; 1 King 19:​2, 3) Ol dispela man i no sot long bilip, nogat. Ol i kamapim klia olsem ol i bilip strong long Jehova. Tasol Jekop, Devit na Elaija ol i man bilong graun tasol, olsem na sampela taim ol i pret. Disaipel Jems i tok: “Elaija em i man wankain olsem yumi.”​—Jems 5:17.

Ating yumi tu i pret taim yumi tingting long wanpela hevi i painim yumi long nau o wanpela hevi inap painim yumi long bihain. I gat as na yumi pret olsem. Baibel i tok Satan i strong long mekim “pait” long ol manmeri “i save bihainim ol lo bilong God, na ol i save autim tok bilong Jisas.” (KTH 12:17) Tru, dispela tok i go long ol Kristen God i bin makim, tasol Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Tasol yumi no ken pret na guria nogut tru taim sampela hevi i painim yumi. Bilong wanem i olsem?

‘God i Helpim Yumi na Yumi Stap Gut’

Devit, man bilong raitim song, em i tok: “God bilong yumi yet i save helpim yumi na yumi stap gut.” (Song 68:20) Planti taim Jehova i bin kamapim klia olsem em inap tru long helpim lain bilong em na ol i no bagarap​—sampela taim em i kisim bek ol long ol bagarap i laik painim ol o em i givim strong long ol bilong karim hevi bilong ol. (Song 34:17; Daniel 6:22; 1 Korin 10:13) Long stadi yu bin mekim long Baibel, yu inap tingim hamas taim Jehova i bin ‘helpim ol man na ol i stap gut’?

Yu ken mekim wok long buk Watch Tower Publications Index,a na painim ol stori tru tru bilong ol samting i bin kamap, olsem Bikpela Tait long taim bilong Noa, God i kisim bek Lot wantaim tupela pikinini meri bilong em long Sodom na Gomora, ol Israel i lusim Isip na ol i wokabaut na brukim solwara Retsi, o Haman i laik wokim rot bilong bagarapim ol Juda tasol em i lus tru. Pasin bilong ritim na tingim tingim long bel ol dispela gutpela stori, bai strongim bilip bilong yu olsem Jehova em i God bilong helpim ol man na ol i stap gut. Na dispela bai helpim yu long strongim bel na yu no ken pret taim ol hevi i kamap bilong traim bilip bilong yu.

Ol i Karim Hevi Long Nau

Yu inap tingim sampela man o meri long hap bilong yu yet em ol i bin sanap strong na karim ol hevi? Ating wanpela i bin stap gut long God na long dispela as ol i kalabusim em. O yu inap tingim wanpela lapun Kristen i mekim yet wok bilong Jehova maski em i gat sik. O yu ken tingim sampela yangpela husat i stap narapela kain long ol lain bilong dispela graun, maski ol wanskul i laik subim ol strong long bihainim pasin bilong ol. Na i gat ol papa o mama wanpis, em ol i wok long mekim bikpela long ol pikinini na i no gat poroman bilong helpim ol, o ol singel i mekim wok bilong Jehova maski ol i pilim olsem ol i stap wanpis. Stori bilong ol i skulim yu long wanem samting? Taim yu tingim pasin bilong ol long stap gut long bilip bilong ol, dispela inap helpim yu long sanap strong na no ken pret, maski wanem kain hevi i painim yu.

Yumi mas i gat strongpela bel na no ken pret sapos ol man i birua na mekim nogut long yumi, na sapos yumi kisim tupela tingting olsem Jehova i laikim yumi o nogat. Yumi mas kisim pasin bilong bilip strong olsem ofa bilong Krais long baim bek ol man em i bilong helpim yumi wan wan. (Galesia 2:20) Orait nau yumi ken beten long Jehova na yumi no pret pret o bel i guria. Sapos yumi ting yumi no gutpela man inap long Jehova i ken laikim yumi, orait yumi ken tingim tok Jisas i bin mekim long ol disaipel bilong em: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.”​—Matyu 10:​29-31.

Planti taim nius Wastaua na Kirap! i kamapim stori bilong sampela Witnes Bilong Jehova long nau em ol bikpela traim i bin painim ol na ol i no pret. Tasol i no olsem ol i no bel hevi long samting i bin painim ol, nogat. Ol i no larim dispela bel hevi i mekim na ol i lusim wok bilong Jehova. Stori bilong ol i stap long ol dispela nius inap helpim yu tu long sanap strong na karim hevi na no ken pret. Yumi ken tingim tupela stori olsem.

Wanpela Bagarap i Senisim i Stap Bilong Em

Kirap! bilong Julai-Septemba 2003 i kamapim stori, “Olsem Wanem Wanpela Bagarap i Senisim i Stap Bilong Mi.” Stanley Ombeva, wanpela Witnes Bilong Jehova long Kenya, i stori long bikpela bagarap i bin painim em taim wanpela ka i spit na i bamim em. Bodi bilong em i wok long bagarap na ol i pinisim em long wok na em i lus long kisim helt insurens samting long wok mani em i bin mekim. Brata Ombeva i tok: “Taim mi kisim save long sik bilong mi, mi kisim tingting olsem ol samting i nogut tasol, mi tingim mi yet tasol, na ol kain kain samting i bin skrapim bel bilong mi. Sampela taim mi kros na bel nogut.” Tasol maski dispela bikpela hevi i painim em, dispela Kristen i no pret. Em i no larim bel hevi i daunim em olgeta na em i lusim Jehova, nogat. Em i bilip na wetim Jehova i helpim em. Brata Ombeva i tok: “Long olgeta taim Jehova i helpim mi long karim olgeta hevi bilong mi​—em i helpim mi gut tru, sampela taim mi pilim sem long dispela. Mi pasim tok strong long ritim na tingim tingim long bel sampela skripsa mi save em inap mekim gut bel bilong mi.”

Dispela stori bilong Brata Ombeva i helpim planti narapela long sanap strong na karim hevi bilong ol na ol i no pret. Wanpela sista Kristen i tok: “Taim mi ritim dispela stori mi krai. Mi pilim olsem, long rot bilong dispela stori Jehova i kamapim klia olsem em i gat gutpela pasin tru na em i laik mekim gut bel bilong mi.” Narapela Witnes i tok: “Ol kain stori olsem i strongim tru bel bilong mipela ol manmeri em ol wankain hevi i painim mipela na mipela i stap isi tasol na karim hevi.”

Sik Bilong Tingting

Narapela stori yumi pilim tru, em stori bilong Herbert Jennings, het tok bilong en, ‘Yu No Save Wanem Samting Bai Painim Yu Long Tumora.’b Brata Jennings i gat wanpela kain sik bilong tingting. Em i stori long taim sik bilong em i kamap nupela na em i tok: “Mi save hatwok tru long go long ol miting Kristen. Tasol mi save tru olsem pasin bilong bung wantaim em i bikpela samting tru. Bilong karim dispela hevi, mi save go insait long Haus Kingdom taim olgeta lain i sindaun pinis, na mi save lusim Haus Kingdom bihain tasol long taim miting i pinis na ol lain i no kirap yet long toktok wantaim ol narapela.”

Na em i hatwok tu long autim tok. Brata Jennings i tok: “Taim mi kamap long wanpela haus, sampela taim mi no inap strongim bel bilong i go na pairapim belo bilong dua. Tasol mi no inap lusim dispela wok, long wanem, mi save wok bilong yumi long autim tok em bilong helpim yumi na ol man i harim tok bilong yumi long kisim laip. (1 Timoti 4:16) Bihain liklik mi bosim bel bilong mi na nau mi save go long narapela haus na traim gen. Taim mi mekim yet wok autim tok, dispela i helpim mi long stap gut long samting bilong spirit na em i helpim mi long karim dispela hevi.”

Stori bilong Brata Jennings i helpim planti manmeri i bin ritim dispela stori long karim wankain hevi na ol i no pret. Wanpela sista Kristen i tok: “Mi bin ritim Wastaua na Kirap! inap 28 yia pinis, na insait long dispela taim i no gat wanpela stori i bin kirapim tru bel bilong mi olsem dispela stori. Sik bilong mi i mekim na mi mas lusim wok bilong autim tok fultaim, na bel bilong mi i gat tok long dispela. Mi ting sapos mi gat strongpela bilip moa bai mi inap mekim yet dispela wok. Tasol taim mi ritim stori olsem sik bilong Brata Jennings i mekim na em i mas lusim wok bilong autim tok fultaim, dispela i helpim mi long kisim stretpela tingting long hevi bilong mi. I olsem Jehova i bin harim beten bilong mi!”

Wanpela brata Kristen i gat wankain hevi, em i tok: “Mi bin mekim wok elda long kongrigesen inap 10-pela yia, tasol sik bilong tingting i mekim na mi mas lusim dispela gutpela wok. Mi pilim olsem mi no inap mekim wanpela gutpela wok, olsem na sampela taim mi no inap ritim laip stori bilong sampela long lain bilong Jehova em ol i bin mekim ol bikpela wok tru. Tasol pasin bilong Brata Jennings long stap strong na karim hevi i bin strongim bel bilong mi. Mi bin ritim dispela stori planti taim.”

Strongim Bel na Wok i Go Yet

Olsem Brata Ombeva na Brata Jennings, planti Witnes Bilong Jehova i wok yet long lotuim God Jehova na ol i no pret, maski i gat ol bikpela hevi tru i laik pasim ol. Sapos yu wanpela bilong ol, yu mekim gutpela wok tru. Yu ken bilip tru olsem: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”​—Hibru 6:10.

Jehova i bin helpim lain bilong em long bipo long daunim ol birua, na olsem tasol em inap helpim yu long daunim ol hevi i painim yu. Olsem na yu mas putim gut long bel dispela tok Jehova i bin mekim long rot bilong profet Aisaia, em i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”​—Aisaia 41:10.

[Ol Futnot]

[Ol Piksa long pes 16]

Olsem Stanley Ombeva (antap) na Herbert Jennings (han sut), planti i mekim wok bilong Jehova na ol i no pret

[Piksa Kredit Lain long pes 14]

USAF photo