Askim

Long Lo Bilong Moses, bilong wanem sampela samting bilong maritpasin i mekim man i “kamap doti”?

God i kamapim maritpasin bambai ol manmeri i ken kamap planti na ol marit i ken kisim amamas long en. (Stat 1:28; Sindaun 5:​15-18) Tasol long sapta 12 na 15 bilong Buk Wok Pris, yumi lukim sampela lo i toktok long sampela samting i mekim ol Israel i kamap doti long ai bilong God, olsem long taim man i slip na wara i kamap nating long sem bilong em, na meri i gat sik mun, na taim meri i karim pikinini. (Wok Pris 12:​1-6; 15:​16-24) Ol dispela lo God i bin givim long ol Israel i kirapim ol long bihainim klinpela pasin long i stap bilong ol, kirapim ol long bihainim ol stretpela lo, kamapim strong olsem blut em samting i holi, na ol i mas mekim ol samting bilong tekewe sin bilong ol.

Lo Bilong Moses long ol samting bilong maritpasin i helpim ol Israel na bai ol i no gat planti sik, na lo i helpim ol long ol narapela samting tu. Buk The Bible and Modern Medicine i tok: “Taim ol i bihainim lo bilong sik mun na man i no ken slip wantaim meri bilong em long dispela taim olsem lo i makim, dispela i helpim ol long abrusim sampela sik i save kamap long rot bilong maritpasin . . . na i save pasim wanpela kain sik kensa i save kamap long sem bilong meri.” Ol dispela lo i lukautim lain bilong God na ol i abrusim ol kain sik ol i no gat save long en o i stap hait long skin bilong ol. Na pasin bilong i stap klin long ol samting bilong maritpasin i mekim na dispela lain God i bin mekim gut long ol, ol inap kamapim planti pikinini, olsem God i bin tok promis long ol, em i tok ol bai i kamap planti na i gat gutpela sindaun. (Stat 15:5; 22:17) Na tu, dispela i helpim ol Israel long i stap gutpela long tingting na bel. Taim ol marit i bihainim ol dispela lo, ol i lain long bosim gut laik bilong skin long mekim maritpasin.

Tasol nambawan bikpela samting long pasin bilong kamap doti long sampela samting bilong maritpasin, em ol samting bilong blut. Ol lo bilong Jehova long blut i kirapim ol Israel long tingim gut olsem blut em i holi, na tu, em i gat wanpela bikpela wok insait long lotu bilong Jehova, olsem long ol ofa na ol samting bilong tekewe sin.​—Wok Pris 17:11; Lo 12:​23, 24, 27.

Olsem na ol dispela samting ol Israel i mas bihainim insait long Lo, em ol samting bilong sin i stap long skin bilong ol man. Ol Israel i save, taim Adam na Iv i mekim sin pinis, ol i no inap kamapim ol pikinini i gutpela olgeta. Olgeta pikinini bilong tupela bai kisim sin bilong tupela na ol samting nogut em sin i save kamapim​—olsem skin na tingting i no gutpela olgeta, na indai. (Rom 5:12) Dispela i mekim na ol papamama inap givim laip i gat sin tasol long ol pikinini, maski God i bin wokim skin bilong man na meri na bai ol inap givim laip i gutpela olgeta long ol pikinini long rot bilong maritpasin.

Em nau, ol samting Lo i tok ol i mas mekim bilong kamap klin long ai bilong God, em bai kirapim ol long tingim sin ol i bin kisim long papamama, na i mas i gat wanpela ofa bilong baim bek ol man, em bilong tekewe sin bilong ol na ol inap kamap gutpela olgeta. Tasol yumi save, ol animal ol i bin kilim na mekim ofa long en ol i no bin mekim dispela wok. (Hibru 10:​3, 4) Wok bilong Lo Bilong Moses em i bilong bringim ol Israel i kam long Krais na bilong helpim ol long pilim tru olsem, long rot bilong nambawan gutpela skin bilong Jisas em i givim olsem ofa, long dispela rot tasol God inap lusim tru sin bilong ol man, na dispela bai opim rot bambai ol man i stap gut long God ol inap kisim laip i stap oltaim oltaim.​—Galesia 3:24; Hibru 9:​13, 14.