Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim long bekim ol dispela askim i stap daunbilo:

• Olsem Song 72:12 i tok, Jisas bai “helpim ol rabisman” olsem wanem?

Taim em i bosim graun, em bai mekim stretpela pasin long olgeta man, na i no gat pasin korapsen. Planti taim ol bikpela pait bilong graun i as na planti manmeri i stap rabis, tasol Krais bai kamapim gutaim na bel isi tru. Em i pilim hevi bilong ol man na em bai bungim olgeta man wantaim, na em bai mekim ol samting na bai i gat planti kaikai inap long olgeta man. (Song 72:​4-16)​—5/1, pes 7.

• Olsem wanem yumi ol Kristen i ken kamapim pasin bilong “i no pret long tokaut”? (1 Timoti 3:13; Efesus 6:19; 2 Korin 3:12)

Yumi ken mekim olsem taim yumi strongim bel na autim tok long ol narapela, taim yumi skulim man na givim tok kaunsel long taim i stret long mekim na em i pilim gut na i bihainim, na long taim yumi beten na kamapim tru bel bilong yumi long God long wanem yumi bilip olsem em bai harim beten bilong yumi na helpim yumi.​—5/15, pes 14-​16.

• Aninit long Lo, bilong wanem sampela samting bilong maritpasin i mekim man i “kamap doti”?

Ol lo i kolim ol samting i mekim man i kamap doti, em taim man i slip na wara i kamap nating long sem bilong em, meri i kisim sik mun, na taim meri i karim pikinini. Ol dispela lo i helpim ol Israel long i stap klin long sindaun bilong ol na long samting bilong maritpasin, i kamapim klia olsem blut em i samting i holi, na i kamapim olsem ol i mas mekim ol samting bilong tekewe sin bilong ol.​—6/1, pes 31.

• Sapos wanpela man i laik i stap amamas tru, bilong wanem i gutpela long em i skelim Buk Song?

Ol man bilong raitim Buk Song ol i save olsem taim man i pas gut wantaim God, em i stap amamas tru. (Song 112:1) Ol i kamapim klia olsem i no gat wanpela man, mani samting man i holim, o wok samting man i bin kamapim gut, inap givim em kain amamas em “ol manmeri i putim Bikpela i stap God bilong ol,” ol i save kisim. (Song 144:15)​—6/15, pes 12.

• Lain Israel bilong bipo i stap olsem wanem wantaim Jehova?

Long 1513 B.C.E., Jehova i kisim lain Israel olsem lain manmeri bilong em, na em i mekim kontrak wantaim ol. (Kisim Bek 19:​5, 6; 24:7) Bihain long dispela, taim ol pikinini bilong ol Israel i kamap, ol i kamap insait long dispela lain bilong God i dediket long em. Tasol wan wan Israel i mas mekim disisen bilong em yet long em bai lotuim God o nogat.​—7/1, pes 21-2.

• Long olgeta samting yumi mekim, bilong wanem yumi “no ken toktok planti”? (Filipai 2:14)

Planti stori bilong Baibel i kamapim olsem pasin bilong toktok planti i bin bagarapim lain bilong God. Yumi mas tingting gut long ol samting nogut dispela pasin inap kamapim long nau. Yumi sinman i gat pasin bilong komplein, olsem na yumi mas was gut na luksave long ol mak bilong dispela pasin na abrusim.​—7/15, pes 16-17.

• Olsem wanem yumi save olsem gutpela na stretpela tingting long Sindaun 8:​22-32, em i no wanpela pasin tasol?

Jehova i “wokim” gutpela na stretpela tingting olsem savetingting paslain long em i kirap wokim ol samting. Long olgeta taim God i bin i stap na em i gat savetingting, em i no bin wokim dispela savetingting. Tasol gutpela na stretpela tingting em Sindaun 8:​22-31 i toktok long en, em i bin i stap wantaim God olsem “saveman i bosim wok,” na em i makim dispela spirit husat i kamap Jisas na em i wok wantaim God long wokim ol samting. (Kolosi 1:17; KTH 3:14)​—8/1, pes 31.