Taim Wanpela Long Famili i Lusim Jehova

MARK na Louise i Witnes Bilong Jehova.a Long pasin laikim na gutpela pasin ol i bin skulim ol pikinini bilong ol long tok bilong Baibel, olsem Baibel i tok ol papamama Kristen i mas mekim. (Sindaun 22:6; 2 Timoti 3:15) Tasol sori tru, sampela pikinini bilong ol i no mekim moa wok bilong Jehova taim ol i kamap bikpela. Louise i tok: “Mi wari tru long ol dispela pikinini i lusim Jehova. Mi bel hevi tru long dispela samting long olgeta de. Taim ol narapela i stori long ol pikinini man bilong ol, bel bilong mi i bagarap stret na mi laik krai.”

Yes, taim man i laik lusim Jehova na pasin bilong wokabaut long rot Baibel i makim, ol famili i stap gut long God ol i save bel hevi stret. Irene i tok: “Mi laikim tru susa bilong mi. Mi redi long mekim olgeta kain samting na bai em i ken kam bek long Jehova!” Maria, em brata bilong em i lusim Jehova na i mekim pasin pamuk, em i tok: “Mi hatwok tru long karim dispela bel hevi, long wanem, long olgeta narapela rot, em i bin stap gutpela brata tru long mi. Mi save wari tru long em taim mipela famili i gat sampela bikpela bung.”

Bilong Wanem i Hatwok Tru?

Taim pikinini o narapela long famili i lusim Jehova, bilong wanem dispela i save bagarapim tru bel bilong ol wanblut Kristen? Long wanem, ol i save Baibel i tok promis olsem ol man i stap gut long Jehova ol bai kisim laip oltaim long wanpela paradais long graun. (Song 37:29; 2 Pita 3:13; KTH 21:​3-5) Ol i wet long kisim dispela gutpela samting wantaim poroman marit, ol pikinini, papamama, bratasusa, na ol tumbuna pikinini bilong ol. Ol i bel hevi tru long tingim olsem ol famili husat i no mekim moa wok bilong Jehova ol inap lus long kisim dispela gutpela samting! Bilong i stap gut long nau tu, ol Kristen i save olsem ol lo na stiatok bilong Jehova i helpim ol tru. Olsem na ol Kristen i bel hevi tru long lukim wanpela long famili i mekim pasin i kamapim kaikai nogut.​—Aisaia 48:​17, 18; Galesia 6:​7, 8.

Ating ol lain husat i no bin karim dispela kain hevi, ol i no inap pilim tru bel hevi bilong famili we wanpela i lusim Jehova. Dispela i mekim sampela samting long olgeta samting bilong i stap bilong famili. Louise i tok: “Em i hatwok moa long sindaun long ol miting Kristen na lukim ol papamama i lap na toktok wantaim ol pikinini bilong ol. Mi save bel hevi long olgeta bung bilong amamas, long wanem, sampela bilong famili i no stap.” Wanpela elda Kristen i tingim 4-pela yia em pikinini bilong meri bilong em i no inap bung wantaim ol. Em i tok: “Planti taim ol samting bilong amamas i kamapim bel hevi. Sapos mi givim presen long meri bilong mi o long wiken mi kisim em i go long wanpela naispela hap, em i save krai, em i tingim olsem pikinini meri bilong em i no stap na kisim dispela amamas wantaim mipela.”

Yu ting ol dispela Kristen i bel hevi tumas? Ating nogat. Taim ol i bel hevi, ating ol i kamapim sampela pasin bilong Jehova husat i bin wokim ol man i kamap olsem em yet. (Stat 1:​26, 27) Wanem mining bilong dispela tok? Jehova i pilim olsem wanem taim lain bilong em, lain Israel, i bikhet long em? Long Song 78:​38-41, yumi kisim save olsem em i bel hevi tru long dispela. Tasol em i no les long stretim ol na givim tok lukaut long ol, na planti taim em i fogivim ol taim ol i soim olsem ol i tanim bel. Jehova i laikim tru ol lain ‘em i bin wokim,’ na em i no hariap long lusim ol. (Jop 14:15; Jona 4:​10, 11) Em i bin putim long ol man pasin bilong laikim tru ol narapela, na pasin laikim insait long famili i strong moa. Olsem na yumi no kirap nogut long ol man i bel hevi taim wanpela wanblut i lusim Jehova.

Tru tumas, taim wanpela long famili i lusim Jehova, dispela em i wanpela bikpela traim bilong ol man i lotu tru long God. (Aposel 14:22) Jisas i tok sapos man i bihainim tok bilong em, dispela bai kamapim pasin birua insait long sampela famili. (Matyu 10:​34-38) I no olsem tok bilong Baibel yet i kamapim pasin birua insait long famili. Nogat. Ol famili i no wanbilip o i lusim bilip, ol inap brukim famili long rot bilong sakim, o lusim, o birua long pasin Kristen. Tasol yumi ken amamas tru long Jehova i save helpim ol man i stap gut long em long karim ol traim i painim ol. Sapos nau yu bel hevi long wanpela long famili i bin lusim Jehova, orait wanem ol stiatok bilong Baibel i ken helpim yu long karim bel hevi na helpim yu long stap amamas na belgut?

Karim Hevi

“Strongim bel bilong yupela, . . . na larim [God] i laikim yupela oltaim.” (Jut 20, 21) Ol samting long sindaun bilong yu inap mekim na long nau yu no inap mekim wanpela samting bilong helpim wanpela long famili husat i no mekim moa wok bilong Jehova. Tasol yu inap strongim yu yet na ol narapela long famili i stap gut long God, na em samting yu mas mekim. Veronica i gat tripela pikinini man na tupela i lusim tok i tru, em i tok: “Sampela i tokim mi na man bilong mi olsem, sapos mipela i stap strong long ol samting bilong spirit, long dispela rot mipela inap helpim ol pikinini man bilong mipela taim ol i kisim gutpela tingting na i kam bek. Pikinini man i lusim papa, em Baibel i stori long em, em bai go we sapos papa i no stap strong bilong em i ken kisim bek pikinini bilong em?”

Bilong yu ken i stap strong, givim bel long ol wok bilong lotu i tru. Olsem: Stadi oltaim long ol strongpela tok bilong Baibel na go long ol miting Kristen. Helpim ol narapela insait long kongrigesen inap long skel na sindaun bilong yu. Tru, ating pastaim i hatwok long mekim ol dispela samting. Veronica i tok: “Pastaim mi laik stap mi yet olsem wanpela animal i bin kisim bagarap. Tasol man bilong mi i strong long mipela i mas mekim yet ol wok bilong lotu i tru. Em i strong long mipela i go long ol miting. Taim kibung i kamap, mi mas strongim tru bel bilong mi na bai mi ken i go na bungim ol narapela. Tasol program i helpim mipela long i go klostu moa long Jehova. Dispela kibung i bin strongim tru pikinini man bilong mipela husat i stap gut long God.”

Maria, em pastaim yumi stori long em, em i ting pasin bilong givim bel long autim tok i save helpim em tru, na long nau em i wok long helpim 4-pela man long save long Baibel. Laura tu i tok: “Tru, mi save krai yet long olgeta de. Wok bilong mi long mekim bikpela long ol pikinini i no bin kamap gutpela olsem wok bilong sampela papamama, tasol mi tok tenkyu long Jehova long mi holim gutpela tok bilong Baibel em dispela tok inap helpim ol famili long dispela taim bilong las de.” Ol pikinini bilong Ken na Eleanor i bikpela pinis ol i lusim kongrigesen. Orait, tupela i stretim rot na ol i go sindaun long hap i sot long ol man bilong autim tok bilong Kingdom na bilong ol i ken autim tok fultaim. Dispela i bin helpim tupela long holimpas stretpela tingting na bel hevi i no daunim ol olgeta.

Bilip na wet long gutpela samting bai kamap. Man i gat pasin laikim em i “wetim God i helpim em.” (1 Korin 13:7) Ken, em yumi stori pinis long em, em i tok: “Taim ol pikinini bilong mipela i lusim tok i tru, mi ting i olsem ol i dai. Tasol taim susa bilong mi i dai, tingting bilong mi i senis. Mi amamas long ol pikinini bilong mi i no dai tru na Jehova i larim rot i op i stap bilong ol i ken kam bek long em.” Tru tumas, planti man husat i bin lusim tok i tru, bihain ol i kam bek.​—Luk 15:​11-24.

No ken ting yu gat asua. Planti papamama i save tingting i go bek na bel hevi long pasin ol i bin mekim taim sampela samting i bin kamap. Tasol bikpela tok long Esekiel 18:​20, em olsem Jehova i ting man husat i mekim sin​—i no papamama​—i gat asua long rot nogut em i bin makim. Buk Sindaun i mekim planti tok long wok bilong papamama long skulim pikinini long bihainim stretpela rot, tasol planti taim moa dispela buk i tok olsem ol yangpela i mas putim yau na bihainim tok bilong papamama bilong ol. Yes, ol pikinini i gat wok long bihainim ol tok bilong Baibel em papamama i no gutpela olgeta i skulim ol long en. Ating yupela papamama i bin mekim ol samting yupela inap mekim long dispela taim. Tasol sapos yu ting yu bin mekim sampela popaia na em i asua bilong yu, ating dispela i no makim olsem ol popaia bilong yu i mekim na wanpela long famili i lusim tok i tru. Sapos yu bel hevi oltaim long ol samting yu bin mekim o yu no bin mekim, dispela i no inap helpim yu. Ol popaia bilong yu inap skulim yu, yu mas tingting strong long yu no ken mekim gen ol dispela popaia, na beten askim Jehova long fogivim yu. (Song 103:​8-14; Aisaia 55:7) Lukluk i go long taim bihain, no ken lukluk i go bek.

No ken les kwik long ol narapela. Ating sampela i hatwok long save long olsem wanem ol i ken strongim o mekim gut bel bilong yu, na moa yet sapos dispela kain hevi i no bin painim ol. Na tu, samting i strongim na mekim gut bel bilong wanpela, i no strongim na mekim gut bel bilong narapela. Olsem na sapos sampela i mekim tok i bagarapim bel bilong yu, bihainim tok bilong aposel Pol i stap long Kolosi 3:13: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.”

Daun long rot bilong Jehova long stretim man. Sapos kongrigesen i bin stretim wanpela wanblut bilong yu, tingim olsem dispela em i wanpela rot Jehova i bin kamapim na i bilong helpim olgeta, em i helpim tu man i bin mekim rong. (Hibru 12:11) Olsem na sakim pasin bilong skelim skelim ol elda husat i insait long wok bilong stretim wanblut o disisen ol i bin mekim. Tingim, nambawan gutpela samting i save kamap taim yumi mekim ol samting long rot Jehova i makim, tasol sapos yumi sakim ol pasin Jehova i putim, dispela i mekim bel hevi i go bikpela.

Taim lain Israel i lusim pinis Isip, Moses i mekim wok olsem jas. (Kisim Bek 18:​13-16) Taim em i sindaun na harim kot, ating em i tokaut olsem wanpela man i no gat asua na narapela man i gat asua, olsem na ating sampela i no amamas long ol disisen Moses i mekim. Ol i sutim tok long wok jas bilong Moses na ating sampela taim dispela i kirapim ol man long bikhet long wok bos bilong em. Tasol Jehova i mekim wok long Moses bilong soim rot long lain bilong Em, na Em yet, i no Moses, i givim strafe long ol bikhetman na famili bilong ol husat i sapotim ol. (Namba 16:​31-35) Yumi ken kisim skul long dispela na wok strong long daun long ol brata i go pas long kongrigesen long nau na wok gut wantaim ol disisen bilong ol.

Delores i tingting i go bek long em i bin hatwok tru long holimpas stretpela tingting taim kongrigesen i stretim pikinini meri bilong em. Em i tok: “Samting i bin helpim mi, em mi ritim planti taim ol stori i toktok long ol pasin em Jehova i putim ol i gutpela na i stret. Mi raitim long wanpela notbuk ol poin bilong sampela tok na stori i helpim mi long sanap strong na mekim yet wok bilong Jehova.” Dispela i kirapim yumi long tingim narapela bikpela rot i helpim yumi long karim hevi.

Kamapim tingting bilong yu. Ating em bai helpim yu tru sapos yu kamapim bel na tingting bilong yu long wanpela o tupela pren i pilim hevi bilong yu em yu inap trastim ol. Taim yu mekim olsem, toktok wantaim ol pren husat bai helpim yu long holimpas gutpela tingting. Na samting i helpim yu tru em pasin bilong beten long Jehova na “autim olgeta hevi na olgeta tingting” bilong yu.b (Song 62:​7, 8) Bilong wanem dispela bai helpim yu? Long wanem, Jehova i pilim tru ol tingting i stap long bel bilong yu. Olsem: Yu inap pilim olsem i no stret long yu mas karim bikpela bel hevi long dispela samting, long wanem, yu no bin lusim Jehova. Kamapim ol tingting i stap long bel bilong yu long Jehova, na askim em long helpim yu long kisim stretpela tingting na bai dispela hevi i no ken givim bikpela pen tumas long yu.​—Song 37:5.

Ating bihain bai yu inap bosim gut moa ol tingting i stap long bel bilong yu. Tasol nau yu mas wok strong long mekim ol samting Papa bilong yu long heven i laikim, na yu no ken ting ol dispela wok i samting nating. (Galesia 6:9) Tingim, sapos yumi lusim Jehova, bai yumi karim yet ol hevi. Tasol sapos yumi stap gut long em, em bai helpim yumi long karim ol hevi i painim yumi. Olsem na yu ken save olsem Jehova i pilim bikpela bel hevi bilong yu na em bai wok yet long strongim yu long taim stret.​—2 Korin 4:7; Filipai 4:13; Hibru 4:16.

[Ol Futnot]

[Blok long pes 19]

Rot Bilong Karim Hevi

◆ “Strongim bel bilong yupela, . . . na larim [God] i laikim yupela oltaim.”​—Jut 20, 21.

◆ Bilip na wet long gutpela samting bai kamap.​—1 Korin 13:7.

◆ No ken ting yu gat asua.​—Esekiel 18:20.

◆ No ken les kwik long ol narapela.​—Kolosi 3:13.

◆ Daun long rot bilong Jehova long stretim man.​—Hibru 12:11.

◆ Kamapim tingting bilong yu.​—Song 62:​7, 8.

[Blok/Piksa long pes 21]

Yu Bin Lusim Jehova?

Sapos yu bin lusim Jehova, maski i gat wanem as na yu mekim olsem, pasin pren bilong yu wantaim Jehova na laip oltaim bilong yu inap lus. Ating yu gat tingting long kam bek long Jehova. Olsem wanem? Yu wok strong long mekim olsem long nau? O yu wok long surikim dispela i go inap long “taim i gutpela long mekim olsem”? Tingim, Armagedon i wok long kam klostu hariap. Na tu, laip bilong yu long dispela taim nau i sotpela na kain kain samting inap painim yu. Yu no inap save sapos tumora yu bai stap laip o nogat. (Song 102:3; Jems 4:​13, 14) Wanpela man i kisim save olsem em i gat bikpela sik bilong i dai, em i tok: “Mi kisim dispela sik taim mi mekim wok bilong Jehova fultaim, na i no gat sampela rong samting mi bin mekim em mi haitim i stap. Dispela samting i mekim gut bel bilong mi nau long dispela taim.” Tasol em bai pilim olsem wanem sapos dispela sik i kisim em long taim em i wok long tok olsem, “Wanpela de bai mi go bek long Jehova!” Sapos yu bin lusim Jehova, nau em i gutpela taim long kam bek.

[Ol Piksa long pes 18]

Pasin bilong givim bel long ol wok bilong lotu i tru inap helpim yu long holimpas stretpela tingting